தேச வரலாறு - அல்ஜீரியா

தலைநகர்: அல்ஜீயர்ஸ்

பரப்பளவு: 23 லட்சத்து 81 ஆயிரத்து 741 சதுர கிலோ மீட்டர்

மக்கள் தொகை: 3 கோடியே 4 லட்சத்து 89 ஆயிரம்

மொழி: அரபி, பெர்பெரி, பிரெஞ்சு

மதம்: இஸ்லாம்

நாணயம்: தினார்

எழுத்தறிவு: 98.7 சதவீதம்

அமைவிடம்: இது ஒரு வடக்கு ஆப்பிரிக்க நாடு. வடக்கில் மத்திய தரைக்கடல், கிழக்கில் டுனீஷியா, மேற்கில் மொராக்கோ, சகாரா பாலைவனமும், தெற்கே மவுரிடானியா, மாலி, நைஜரும் உள்ளன.

சரித்திரம்

பழங்காலத்தில் அல்ஜீரியப் பகுதியில் பெர்பெர் எனப்படும் இனத்தவர் அதிக அளவில் வசித்து வந்தனர். அவர்கள் காலப்போக்கில் பல்வேறு குழுக்களாகப் பிரிந்து விட்டனர். 1517 ல் அல்ஜீரியா, ஓட்டோமான் பேரரசின் கீழ் வந்தது. அந்நாட்டுக் கடற்கரையைப் பயன்படுத்தி 17-ம் நூற்றாண்டில் ஓட்டோமான்கள் கடற்கொள்ளையில் பெயர் பெற்று விளங்கினார்கள். கடற்கொள்ளை மூலம் பிடிபட்டவர்களை அடிமைகளாக்கி உள்ளனர்.

அதனால் பாதிக்கப்பட்ட அமெரிக்காவின் கடற்படை, ஆறு டச்சுக் கப்பல்களுடன் வந்து அல்ஜியர்ஸ் துறைமுகத்தையும் கப்பல்களையும் தாக்கி அழித்துவிட்டது. 1830-ல் அல்ஜீரியாவின் மீது பிரான்ஸ் படையெடுத்தது. கடுமையான எதிர்ப்பின் காரணமாகப் படையெடுப்பும் தாக்குதலும் 1900 வரை நீடித்தது. அடுத்தடுத்து நடந்த இந்த யுத்தங்களில் அல்ஜீரிய மக்கள் தொகையில் 35 சதம் இடம் பெயர்ந்து சென்றனர். பத்து லட்சம் பேர் யுத்தங்களில் கொல்லப்பட்டனர். இதற்கிடையில் அல்ஜீரியாவை பிரான்சின் ஒரு அங்கமாக அந்த அரசு அறிவித்தது.

1954-ல் தேசிய விடுதலை முன்னணி என்ற அமைப்பு அல்ஜீரிய சுதந்திரப் போரைத் தொடங்கியது. போர் முடியும் போது பிரெஞ்சு அதிபராக இருந்த சார்லஸ் டிகால், அல்ஜீரியாவின் விடுதலை குறித்த கருத்துக் கணிப்பு வாக்கெடுப்பு நடத்தினார். பிரான்சிலிருந்து விடுதலை பெறுவதற்கு ஆதரவாக பெரும்பான்மை வாக்குகள் கிடைத்தன. தேசிய விடுதலை முன்னணியின் தலைவராக இருந்த அகமது பென்பெல்லா, அல்ஜீரியாவின் முதல் அதிபரானார். சோசலிச நடவடிக்கைகளோடு ஏதேச்சதிகார ஆட்சி நடைபெற்றது. அவரது ராணுவ அமைச்சராக இருந்த ஹீவாரி பவுமெதீன், பென்பெல்லாவை அகற்றிவிட்டு 1965-ல் அதிபரானார். அவர் ராணுவத்தையே பெரிதும் நம்பியிருந்தார்.

கூட்டுப்பண்ணை விவசாயம் அமலாக்கப்பட்டது. மிகப்பெருமளவில் தொழில் வளர்ச்சி ஏற்பட்டது. எண்ணெய் எடுப்பது நாட்டுடைமை ஆக்கப்பட்டது. தேசிய விடுதலை முன்னணி தவிர மற்ற கட்சிகள் ஒடுக்கப்பட்டன. 1978-ல் சட்லி பென்ஜெடிட் அதிபரானார். அடக்கு முறை தளர்த்தப்பட்டது. ஊழல் மலிந்தது.

1800 ம் ஆண்டுகளில் கம்ïனிஸ்டுகளும், இஸ்லாமிய ஒருமைப்பாட்டாளர்களும் தங்களுக்குள் மோதிக் கொண்டே ஒரு கட்சி ஆட்சி முறையை எதிர்த்துக் கிளர்ச்சி செய்தனர். எதிர்ப்பு காரணமாக ஆட்சியாளர்கள் பணிந்தனர். 1991 டிசம்பரில் பல கட்சிகள் கலந்து கொண்ட தேர்தல் நடந்தது. முதல் சுற்றில் இஸ்லாமிய மீட்பு முன்னணி வெற்றி பெற்றது. இதில் ராணுவம் தலையிட்டு அடுத்த கட்டத் தேர்தலை ரத்து செய்து, அதிபரைப் பதவி விலகச் செய்தது. அனைத்துக் கட்சிகளையும் தடை செய்தது. அல்ஜீரியாவில் கடுமையான உள்நாட்டுக் கலவரம் ஏற்பட்டது. 1992 முதல் 2008 ஜுன் இறுதிக்குள் ஒரு லட்சத்து 60 ஆயிரம் பேர் கொல்லப்பட்டனர். பின்னர் படிப்படியாக தீவிரவாதம் குறைந்தது. 1999 ஏப்ரல் 27 அன்று அப்தலாஸிஸ் பொட்டி பெலிகா அதிபராகத் தேர்ந்தெடுக்கப்பட்டார்.

அல்ஜீரியா பொருளாதாரத்துறையில் இப்போது வேகமாக முன்னேறி வருகிறது. 18 வயது நிறைந்தவர்களுக்கு வாக்குரிமை உண்டு ஐந்தாண்டுக்கு ஒரு முறை 380 உறுப்பினர் கொண்ட நாடாளுமன்றத்துக்கு தேர்தல் நடைபெறுகிறது. 40-க்கும் மேற்பட்ட அரசியல் கட்சிகள் அங்கீகரிக்கப்பட்டிருக்கின்றன.

குடியரசு நாடான இதில் 48 மாநிலங்கள் உள்ளன. அவை 553 மாவட்டங்களாகவும், 1541 நகராட்சிகளாகவும் பிரிக்கப்பட்டுள்ளன. அல்ஜீரியாவில் உள்ள வழக்கறிஞர்களில் 70 சதவீதம் பேர் பெண்கள். இதுபோல நீதிபதிகளில் 40 சதவீதம் பேர் பெண்கள். 60 சதம் கல்லூரி மாணவர்கள் பெண்கள். மருத்துவத் துறையிலும் பெண்களே அதிகம் உள்ளனர்.

விளைபொருட்கள்: கோதுமை, பார்லி, உருளைக்கிழங்கு, மக்காச்சோளம், தேயிலை, பேரீச்சை, மாதுளை, அத்திப்பழம்.

கனிமவளம்: இரும்பு, துத்தநாகம், பாதரசம், செம்பு, பாஸ்பேட்டுகள், பெட்ரோலியம்.

தொழில்கள்: கால்நடை வளர்த்தல், மதுபானம் தயாரித்தல், ஆலிவ் எண்ணெய், பெட்ரோலியத் தொழில், உணவுப் பதப்படுத்துதல்.

அறியத்தந்தமைக்கு நன்றி தல !!