இலங்கை தமிழர்களுக்கு மலேசிய தமிழர்கள் உதவ வேண்டும் - சாமிவேலு

சிறீலங்காவில் உள்நாட்டு போரால் கடுமையாக பாதிக்கப்பட்டு பெரும் துன்பங்களை அனுபவித்து வரும் அந்நாட்டு தமிழர்களுக்கு மலேசிய தமிழர்கள் உதவ வேண்டும் என்று முன்னாள் மலேசிய அமைச்சர் ச.சாமிவேலு கூறினார்.

“சிறீலங்காவில் நடந்து முடிந்த உள்நாட்டு போரால் பாதிக்கப்பட்ட தமிழ் மக்கள் பெரும் துன்பங்களை அனுபவித்து வருகின்றனர். அவர்களுக்கு நாம் உதவ வேண்டும். தமிழர்கள் என்பதற்காக மட்டுமல்ல. சக மனிதர்கள் என்ற அடிப்படையில் மலேசிய தமிழர்கள் சிறீலங்கா தமிழர்களுக்கு உதவ வேண்டும்”, என்று நேற்றிரவு கிளப் கோல்ப் நெகாரா சுபாங்கில் நடந்த நிதி திரட்டும் நிகழ்வில் பெரும் தொகையை நன்கொடையாக வழங்கி உரையாற்றிய ச.சாமிவேலு கேட்டுக்கொண்டார்.

தமிழர் பேரவை மலேசியா நேற்றிரவு கிளப் கோல்ப் நெகாராவில் ஏற்பாடு செய்திருந்த மனித இன நல நிதி திரட்டும் விருந்து சிறீலங்காவில் போரால் உள்நாட்டிலேயே இடம் பெயர்ந்தும் மலேசியாவில் அகதிகளாகவும் வந்துள்ள தமிழர்களுக்கு பல்வேறு தேவையான உதவிகளை வழங்குவதற்கு ரிம1 மில்லியன் திரட்டும் நோக்கத்தைக் கொண்டிருந்தது.

மலேசிய முன்னாள் அமைச்சர் ச.சாமிவேலுவின் தலைமையில் அந்த நிதி திரட்டும் நிகழ்ச்சி நடைபெற்றது.

அவ்விருந்து நிகழ்ச்சியில் உரையாற்றிய தமிழர் பேரவை மலேசியாவின் தலைவர் டாக்டர் என். ஐங்கரன் மலேசியாவில் அகதிகளாகப் பதிவு செய்யப்பட்டுள்ள 4,000 க்கு, 500 குழந்தைகள் உட்பட, மேற்பட்ட சிறீலங்க தமிழர்களுக்கும் சிறீலங்காவிலுள்ள இடம் பெயர்ந்த தமிழர்களுக்கும் தமிழர் பேரவை மலேசியா செயல்படுத்தி வரும் பல்வேறு திட்டங்களை விவரித்தார்.

இத்திட்டங்களைத் தொடர்ந்து நடத்துவதற்கு தேவைப்படும் நிதியைத் திரட்டுவதற்காக ஏற்பாடு செய்யப்பட்டது இவ்விருந்து என்று கூறிய அவர், மலேசிய முன்னாள் அமைச்சர் ச.சாமிவேலு ரிம415,000 நன்கொடையாக வழங்கியுள்ளதைச் சேர்த்து ரிம750,000 திரட்டப்பட்டுள்ளதாக அறிவித்தார்.

இவ்விருந்தில் 500 க்கு மேற்பட்டோர் கலந்து கொண்டனர். அவர்களில் மலேசிய இந்து சங்கத்தின் முன்னாள் தலைவர் அ. வைத்திலிங்கம், நாடாளுமன்ற உறுப்பினர்கள் எம்.மனோகரன், டாக்டர் எஸ்.இராமகிருஷ்ணன், சிலாங்கூர் மாநில ஆட்சிக்குழு உறுப்பினர் டாக்டர் சேவியர் ஜெயக்குமார், மலாயா பல்கலைக்கழக நிறைநிலைப் பேராசிரியர் டாக்டர் கூ கே கிம் ஆகியோரும் அடங்குவர்.

உலகத் தமிழர் பேரவையின் தலைவர் பாதிரியார் இமேனுவல் தமது நீண்ட உரையில் சிறீலங்கா தமிழர்களுக்கு எதிராக இழைக்கப்படும் கொடுமைகளை ஹிட்லரின் ஆட்சியில் நடந்த கொடுமைகளுடன் ஒப்பிட்டார்.

உலகமுழுவதும் பரவியுள்ள தமிழர்கள் சிறீலங்கா தமிழர்களுக்கு பல்வேறு உதவிகளை வழங்கி வருகின்றனர் என்றாரவர்.

பெருமளவில் உதவிகள் வழங்கி வரும் மலேசிய தமிழர்களுக்கு அவர் நன்றி கூறினார்.

முன்னாள் அமைச்சர் ச.சாமிவேலு அவர் வழங்க முன்வந்திருந்த ரிம300,000 த்தோடு மேலும் ரிம115,000 ஐ தமிழர் பேரவை தலைவர் டாக்டர் ஐங்கரனிடம் வழங்கினார்.

மேலும், விருந்தின் மூலம் ரிம1 மில்லியன் திரட்டும் இலக்கை எட்ட இன்னும் ரிம250,000 தேவைப்படுவதைச் சுட்டிக் காட்டிய ச. சாமிவேலு, இன்னும் ஒரு வாரத்தில் அதற்கான ஏற்பாட்டை செய்வதாக கூறினார். விருந்தினர்கள் மகிழ்ச்சியுடன் அந்த அறிவிப்பை பலத்த கைத்தட்டலுடன் வரவேற்றனர்.

மலேசியாஇன்று