திருச்சி அருகே பஸ்கள் மோதலில் 2 பக்தர்கள் பலி, 37 பேர் படுகாயம்

மண்ணச்சநல்லூர், ஜுலை.17- பழனி கோவிலுக்கு சாமி கும்பிடச் சென்ற பக்தர்களின் பஸ் மீது ஆம்னி பஸ் மோதியது. இதில் 2 பேர் இறந்தனர், 37 பேர் காயம் அடைந்தனர்.

பழனி கோவிலுக்கு

புதுச்சேரியைச் சேர்ந்தவர்கள் பழனி முருகன் கோவிலில் சாமி கும்பிடுவதற்காக ஒரு தனியார் சுற்றுலா பஸ்சில் நேற்று முன்தினம் இரவு புறப்பட்டு வந்து கொண்டிருந்தனர். நேற்று அதிகாலை 1.45 மணி அளவில் அந்த பஸ் நான்கு வழிச்சாலையில் சமயபுரத்தை அடுத்து உள்ள பள்ளிவிடை என்ற இடத்தில் சென்று கொண்டிருந்தது.

அப்போது தூத்துக்குடியில் இருந்து சென்னைக்கு சென்ற ஒரு தனியார் ஆம்னி பஸ் திடீரென்று ரோட்டின் நடுவில் சிமெண்டினால் ஆன தடுப்பு கட்டையை உடைத்துக் கொண்டு கீழ் புற ரோட்டுக்குள் நுழைந்து எதிரே வந்த பக்தர்கள் பஸ்சின் மீது பயங்கரமாக மோதியது. இதில் பக்தர்கள் பஸ் நொறுங்கி ரோட்டை ஒட்டி உள்ள 20 அடி பள்ளத்தில் உருண்டு நின்றது. ஆம்னி பஸ்சும் அதே பள்ளத்தில் இறங்கி தரையில் குத்தி நின்றது. இதனால் அந்த பஸ்சின் முன் சக்கரம் கழன்று தனியாக கிடந்தது.

2 பேர் சாவு

விபத்து நடந்தபோது இரண்டு பஸ்சிலும் பயணிகள் தூங்கிக் கொண்டு வந்தனர். திடீரென்று இருட்டில் பஸ் விபத்துக்குள்ளாகி கவிழ்ந்ததும் அவர்கள் அதிர்ச்சியடைந்து அய்யோ... அம்மா... காப்பாற்றுங்கள்... காப்பாற்றுங்கள் என்று அலறினார்கள்.

இந்த விபத்தில் புதுச்சேரி கவிக்குயில் ரோடு 6-வது குறுக்குத் தெருவைச் சேர்ந்த கணேசனின் மகள் சுபாஷினி(வயது 23) அந்த இடத்திலேயே பலியானார். புதுச்சேரி குரும்பாபேட்டை பரந்தாமன் மகன் திலீப் பாரத்(12) படுகாயம் அடைந்து ஆஸ்பத்திரிக்கு கொண்டு செல்லும் வழியில் இறந்தார். இந்த விபத்தில் 37 பேர் படுகாயம் அடைந்தனர்.

இது குறித்து சமயபுரம் போலீசார் வழக்குப் பதிவு செய்து ஆம்னி பஸ் டிரைவர் திருநெல்வேலி டவுன் ரெங்கநாதபுரம் ராஜனை(32) கைது செய்தனர்.

காரணம் என்ன?

ஆம்னி பஸ் டிரைவர் தூக்க கலக்கத்தில் வண்டி ஓட்டியதால் இந்த விபத்து நடந்துள்ளதாக போலீசார் தெரிவித்தனர். ரோட்டின் நடுவில் உள்ள சிமெண்ட் தடுப்பு கட்டையும் அரை அடி உயரத்திலேயே இருப்பதால் பஸ், லாரி உள்ளிட்ட வாகனங்கள் எளிதில் தடுப்பு கட்டையை உடைத்துக் கொண்டு மறு பக்கம் சென்று விபத்து நிகழ்ந்து விடுகின்றன.

பாடாலூரில் இருந்து கொள்ளிடம் டோல்கேட் வரை தடுப்பு கட்டையின் உயரத்தை உயர்த்தினால் பெருமளவு விபத்துக்களை தவிர்க்கலாம் என்று சமூக ஆர்வலர்கள் தெரிவித்தனர்.

தினதந்தி

மிதவேகம் மிகநலம் !!