மழைநீர் சேகரிப்பால் சென்னையில் நிலத்தடி நீர்மட்டம் உயர்வு: குடிநீர் வாரிய அதிகாரி தகவல்

சென்னையில் மழைநீர் சேகரிப்பு கட்டமைப்புகள் 2003-ம் ஆண்டு அனைத்து கட்டிடத்திலும் அமைக்கப்பட்டது. சென்னை நகரில் 3 விதமான நில அமைப்புகள் உள்ளதால் குறிப்பிட்ட கிணறுகள் மூலம் நிலத்தடி நீரின் அளவு, தரம் ஆகியவை அதிகாரிகளால் கண்காணிக்கப்பட்டு வந்தது.

இதில் மணல் பகுதி, களிமண் பகுதி, பாறை பகுதிகளில் நிலத்தடி நீரின் அளவு கணிசமாக உயர்ந்திருப்பது கண்டறியப்பட்டது.



இதுபற்றி சென்னை குடிநீர் வாரிய நிர்வாக இயக்குனர் டாக்டர் கோபால் கூறியதாவது:-

சென்னையில் மணற்பாங்கான பகுதியான புதுவண்ணாரப்பேட்டை, ஜார்ஜ் டவுன், பெசன்ட் நகர், திருவான்மியூர் பகுதிகளில் ஜூலை 2003-ம் ஆண்டு சாரசரி நிலத்தடி நீர்மட்டம் தரை மட்டத்திற்கு கீழ் 6.50 மீட்டர் என்ற அளவில் இருந்தது. தற்போது ஜூன் 2011-ல் சராசரி நீர்மட்ட அளவு தரை மட்டத்திற்கு கீழ் 4.20 மீட்டராக உள்ளது. எனவே மேற்கண்ட பகுதிகளில் 2.30 மீட்டர் என்ற அளவுக்கு நீர்மட்டம் உயர்ந்துள்ளது.

இதேபோல் நீரின் உப்பு தன்மையும் 2100 பி.பி.எம். என்ற அளவில் இருந்து 600 பி.பி.எம். என்ற அளவுக்கு குறைந்துள்ளது. பாறை பகுதியான சைதை, கிண்டி, தரமணி, வேளச்சேரி பகுதிகளில் தரைமட்டத்தில் இருந்து நீர்மட்டம் 7.70 மீட்டர் என்ற அளவில் இருந்தது. தற்போது 3.80 மீட்டர் என்ற அளவில் உள்ளது. அதாவது 3.90 மீட்டர் அளவுக்கு நீர்மட்டம் உயர்ந்துள்ளது. இதேபோல் நீரின் உப்புத்தன்மையும் 2300 பி.பி. எம். அளவில் இருந்து 1000 பி.பி.எம். அளவில் உள்ளது. களிமண் பகுதிகளான கொளத்தூர், புளியந்தோப்பு, அண்ணாநகர், நுங்கம்பாக்கம், தியாகராயநகர், விருகம்பாக்கம் பகுதிகளில் தரைமட்டத்தில் இருந்து 6.90 மீட்டர் என்ற அளவில் இருந்தது.

தற்போது 4.20 மீட்டர் என்ற அளவுக்கு உள்ளது. இதே போல் நீரின் உப்புத்தன்மை 2000 பி.பி.எம். என்ற அளவில் இருந்து 900 பி.பி.எம். என்ற அளவில் உள்ளது. எனவே மழைநீர் சேமிப்பு கட்டமைப்புகளை முறையாக அனைவரும் பராமரித்தால் நிலத்தடி நீர்மட்டம் இன்னும் வேகமாக உயரும்.

இவ்வாறு அவர் கூறினார்.

மாலை மலர்