யுகே-யில் நஜிப்புக்கு கண்ணைப் பறிக்கும் மஞ்சள் நிற வரவேற்பு

பிரிட்டனுக்கு வருகை மேற்கொண்டிருக்கும் பிரதமர் நஜிப் அப்துல் ரசாக்குக்கு எங்கும் மஞ்சள் நிறமே வரவேற்பு கொடுத்துக்கொண்டிருக்கிறது.

இன்று லண்டனில் நஜிப் வணிகச் சமூகத்தவரைச் சந்திக்க ஏற்பாடு செய்யப்பட்டிருந்தது. நஜிப் வருவதற்கு ஒரு மணி நேரத்துக்கு முன்னர் மலேசியர்களும் வெளிநாட்டவர்களுமான டஜன் கணக்கான ஆர்ப்பாட்டக்காரர்கள், லண்டன் மேன்சன் ஹவுஸுக்கு வெளியில் கூடினார்கள்.

அவர்கள் மஞ்சள் நிற பதாகைகளையும், அட்டைகளையும் ஏந்தி இருந்தனர். அவற்றில் பெர்சே 2.0 பேரணிமீதான அடக்குமுறையைக் கண்டிக்கும் வாசகங்களும் அவசரக்காலச் சட்டத்தில் பிடித்து வைக்கப்பட்டிருக்கும் மலேசிய சோசலிசக் கட்சி உறுப்பினர்கள் அறுவரை விடுதலை செய்ய வேண்டும் என்ற கோரிக்கைகளும் எழுதப்பட்டிருந்தன.

சரவாக் ரிப்போர் இணையத்தளத்தின் செய்தியொன்று பெரிய வாகனத் தொகுதியில் வந்திறங்கிய நஜிப் கூட்டத்தினரைப் பார்த்துக் கை அசைத்ததாகக் கூறுகிறது.

ஆர்ப்பாட்டம் அமைதியாக நடந்து முடிந்ததாகவும் அது கூறிற்று.

ஆர்ப்பாட்டக்காரர்கள் நஜிப்பின் கூட்டத்துக்கு வரும் பேராளர்களின் கண்ணில் படாமல் இருக்க போலீஸ்காரர்கள் ஒரு சரக்கூந்தைக் கொண்டு வந்து நிறுத்தியதாக ஆர்ப்பாட்டக்கரர்களில் ஒருவரான பிகேஆர் இளைஞர் தலைவர் ஜின்னி லிம் தெரிவித்தார்.

எங்கும் மஞ்சள்

லண்டன் டவுனுங் ஸ்ட்ரீட்டில் பிரிட்டிஷ் பிரதமர் டேவிட் கெமரனைச் சந்திக்க நஜிப் சென்றபோது அங்கும் ஓர் அமைதி ஆர்ப்பாட்டம் நடைபெற்றது.

ஆர்ப்பாட்டக்காரர்கள் மஞ்சள் நிற ஆடைகள் அணிந்திருந்தனர். நேர்மையான, நியாயமான தேர்தல்கள் தேவை, எங்கள் தலைவர்களை விடுதலை செய்யுங்கள் என்று எழுதப்பட்ட மஞ்சள் நிற அட்டைகளை ஏந்தியிருந்தனர்.

இன்றிரவு 7 மணிக்கு இண்டர் கொண்டினெண்டல் ஹோட்டலில் ஒரு நிகழ்வில் கலந்துகொள்ள நஜிப் செல்வார். அங்கும் ஓர் ஆர்ப்பாட்டத்துக்கு ஏற்பாடு செய்யப்பட்டுள்ளது.

கேமரனைச் சந்திக்குமுன் நஜிப்பும் அவரின் துணைவியார் ரோஸ்மா மன்சூரும் இரண்டாம் எலிசபெத் அரசியாரைச் சந்திக்க பக்கிங்ஹெம் அரண்மனைக்கு சென்றிருந்தனர். அங்கு அரசியார் தற்செயலாக மஞ்சள் நிற உடையில் இருந்தார் என்பது குறிப்பிடத்தக்கது.

மலேசியாஇன்று

மங்களகரமாக வரவேற்கிறார்கள்

வா வா மஞ்சள் மலரே ........