மகளுடன் கொஞ்சி பேசியதால், டிரைவரை தீர்த்துக் கட்டிய பெண் சிக்கினார்

திருவொற்றியூர் திருவீதியம்மன் கோயில் தெருவை சேர்ந்தவர் ஆனந்த் (48), அதிமுக மகளிரணி மாவட்ட பொருளாளர் இந்திரா சண்முகம் என்பவரின் கம்பெனி கார் டிரைவர். கடந்த மாதம் 21ம் தேதி காலை, எர்ணாவூர் ரயில்வே மேம்பாலத்தின் கீழ் தண்டவாளத்தில் தலையில் பலத்த வெட்டுக் காயத்துடன் ஆனந்த் இறந்து கிடந்தார். இதுகுறித்து, எண்ணூர் போலீசார் வழக்குப் பதிந்து விசாரித்தனர்.



சந்தேகத்தின்படி, திருவீதியம்மன் கோயில் தெருவைச் சேர்ந்த மாரிமுத்து (35) என்பவரை பிடித்து விசாரித்தனர். அதே பகுதியைச் சேர்ந்த விசாலாட்சி, அரவாணி நாகராஜ் ஆகியோருடன் சேர்ந்து, ஆனந்தை கொலை செய்ததாக மாரிமுத்து கூறினார். இதையடுத்து, மாரிமுத்து, விசாலாட்சி (40) இருவரையும் நேற்று முன்தினம் மாலை போலீசார் கைது செய்தனர்.



விசாரணையில் கிடைத்த தகவல்கள் வருமாறு: கைதான மாரிமுத்து எர்ணாவூரில் மாட்டு இறைச்சி கடை நடத்தி வருகிறார். இவரிடம் ஆனந்த் சில ஆண்டுகள் வேலை செய்துள்ளார். அதே பகுதியைச் சேர்ந்த விசாலாட்சி, மாரிமுத்து கடையில் கறி வாங்கி பிரியாணி வியாபாரம் செய்துள்ளார். அடிக்கடி கடைக்கு வந்ததால் மாரிமுத்து, ஆனந்த், விசாலாட்சி ஆகியோருடன் நெருங்கிய பழக்கம் ஏற்பட்டது.



விசாலாட்சி வீட்டுக்கு ஆனந்த் அடிக்கடி வந்துள்ளார். அப்போது, அவரது மகளிடம் ஆனந்த் கொஞ்சி கொஞ்சி பேசுவாராம். இது, விசாலாட்சிக்கு பிடிக்கவில்லை. இருவரையும் கண்டித்திருக்கிறார். அதன்பிறகும் அவர்களின் பழக்கம் நீடித்தது. ஆத்திரமடைந்த விசாலாட்சி, ஆனந்தை தீர்த்துக் கட்ட முடிவு செய்தார்.



இதுபற்றி மாரிமுத்துவிடம் கூறினார்; அவரும் சம்மதித்தார். சம்பவத்தன்று மாரிமுத்து, விசாலாட்சி, அதே பகுதியைச் சேர்ந்த அரவாணி நாகராஜ் ஆகியோர், தொலைபேசியில் ஆனந்தை தொடர்பு கொண்டு, கறிக்கடை அருகே வருமாறு அழைத்தனர். அங்கு வந்ததும் ஆனந்தை மாரிமுத்து, நாகராஜ் இருவரும் சரமாரியாக கத்தியால் குத்தினர்.



ரத்த வெள்ளத்தில் துடிதுடித்து ஆனந்த் இறந்ததும் போலீஸ் கவனத்தை திசை திருப்ப, சடலத்தை தண்டவாளத்தில் போட்டுவிட்டு தப்பி உள்ளது தெரிய வந்துள்ளது. இதையடுத்து மாரிமுத்து, விசாலாட்சி இருவரையும் திருவொற்றியூர் நீதிமன்றத்தில் ஆஜர்படுத்தி புழல் சிறையில் அடைத்தனர். தலைமறைவான அரவாணி நாகராஜை தேடி வருகின்றனர்.

tamilcnn.com