ஆ.ராசாவுக்கு டெலிபோன் இலாகா கிடைப்பதில் நீரா ராடியாவுக்கு முக்கிய பங்கு: சி.பி.ஐ. கோர்ட்டில் ஆதாரம் தாக்கல்

2ஜி ஸ்பெக்ட்ரம் ஒதுக்கீட்டில் நடந்துள்ள முறைகேடுகளை, சுப்ரீம் கோர்ட்டு மேற்பார்வையில், சி.பி.ஐ. விசாரணை நடத்தி வருகிறது. இந்த விவகாரத்தில் முன்னாள் தொலைத் தொடர்புத்துறை மந்திரி ஆ.ராசா, கனிமொழி எம்.பி. மற்றும் டெலிகாம் நிறுவன அதிகாரிகள் கைது செய்யப்பட்டு டெல்லி திகார் ஜெயிலில் அடைக்கப்பட்டுள்ளனர்.

இவர்கள் மீதான வழக்கு டெல்லி சி.பி.ஐ. சிறப்பு கோர்ட்டில் நடைபெற்று வருகிறது. ஆ.ராசாவுக்கு தொலைத் தொடர்பு இலாகா கிடைக்க, அரசியல் தரகரும், வைஷ்ணவி கம்யூனிகேசன் தலைவருமான நீரா ராடியா முயற்சி மேற்கொண்டதாக சி.பி.ஐ. குற்றம் சாட்டியுள்ளது. இது தொடர்பான முக்கிய ஆவணத்தை கோர்ட்டில் சி.பி.ஐ. தாக்கல் செய்துள்ளது.

அந்த ஆவணத்தில் கூறப் பட்டு இருப்பதாவது:-

ஸ்பெக்ட்ரம் விவகாரம் தொடர்பாக முக்கிய நிறுவனங்கள் சிலவற்றின் தொடர்பு அதிகாரியாக பணியாற்றிய நீரா ராடியாவிடம் விசாரணை நடத்தியபோது, வழக்குக்கு தொடர்புடைய தகவல்களை தெரிவித்தார்.

2009-ல் பாராளுமன்ற தேர்தல் முடிவடைந்த பின்னர் ஆ.ராசாவுக்கு தொலைத் தொடர்புத்துறை பெற்றுத்தருவதில் அவர் முக்கிய பங்கு வகித்துள்ளார். இது தொடர்பாக ஏர்டெல் அதிபர் சுனில் பாரதி மிட்டலுடன் பேசினார்.

ரிலையன்ஸ் அனில் அம்பானியிடம் ஜாக்கிரதையாக இருக்குமாறு ராசாவை எச்சரித்தார். அதற்கு ராசா அதை நான் பார்த்துக்கொள்கிறேன் என்னை ஒன்றும் செய்ய முடியாது என்று தெரிவித்து இருக்கிறார்.

தி.மு.க.வின் பொதுவான செயல்பாடுகள் மற்றும் அந்த கட்சியின் உள் விவகாரங்கள் பற்றி, கனிமொழியுடனும் பேசியுள்ளார். தந்தையுடன் இணைந்து கட்சியில் முக்கிய பங்காற்றி, ஆ.ராசாவுக்கு தொலைத் தொடர்பு துறையை பெற்றுத்தர முயற்சி செய்யுமாறு கனிமொழியிடம் கேட்டுக் கொண்டார்.

இது உங்கள் (கனிமொழி) அரசியல் வளர்ச்சிக்கு இது உகந்ததாக இருக்கும் என்றும் அவருக்கு ஆலோசனை வழங்கினார். காங்கிரஸ்- தி.மு.க. கூட்டணி குறித்து பத்திரிகையாளர் பர்கா தத் தெரிவித்த கருத்துக்களை கனிமொழி மற்றும் ஆ.ராசாவுடன் நீரா ராடியா பகிர்ந்து கொண்டார்.

டெலிபோன் உரையாடலின்போது, தொலைத் தொடர்பு துறையை தி.மு.க.வுக்கு அளிக்க காங்கிரஸ் வாக்குறுதி அளித்துள்ள விவகாரத்தை கனிமொழி, நீரா ராடியாவிடம் தெரிவித்தார். இந்த காலகட்டத்தில் ஆ.ராசா, டி.ஆர்.பாலு, தயாநிதி மாறன் ஆகியோருக்கு தொலைத் தொடர்பு துறை வழங்கப்படமாட்டாது என்று பரவிய தகவலை கனிமொழியிடம் சுட்டிக் காட்டிய நீராராடியா, ஆ. ராசாவுக்கு தொலைத் தொடர்புத்துறை வழங்கப்படும் பட்சத்தில், அதனால் ஏற்படும் சாதக- பாதக அம்சங்களை இருவரும் பகிர்ந்து கொண்டனர்.

இவ்வாறு நீராராடியா வாக்குமூலம் அளித்துள்ளதாக அந்த ஆவணத்தில் கூறப்பட்டுள்ளது. இதன் மூலம், ஆ.ராசாவுக்கு தொலைத்தொடர்பு துறையை பெற்றுத்தர நீரா ராடியா முயற்சி செய்துள்ளார் என்பது தெரிய வந்துள்ளது.

மாலை மலர்

அப்போ கணிக்கு பங்கு இல்லையா