சிந்தாதிரிப்பேட்டையில் 10 மாத ஆண் குழந்தை கடத்தல்

சென்னை சிந்தாதிரிப்பேட்டை நாவலர் நெடுஞ்செழியன் காலனியை சேர்ந்தவர் முகமது ரபி, இவர் அந்த பகுதியில் தள்ளு வண்டியில் சிக்கன் பக்கோடா தயாரித்து வியாபாரம் செய்து வருகிறார்.

இவரது மனைவி சாயிராபானு. இவர்களுக்கு சப்னம் பானு (வயது 2), ஆரிப்பாஷா (10 மாதம்) என 2 குழந்தைகள் உள்ளனர். நேற்று மாலை முகமது ரபி வியாபாரத்துக்கு சென்றுவிட்டார். அவருக்கு உதவியாக மனைவி சாயிரா பானுவும் உடன் சென்றார்.

வீட்டில் குழந்தைகளை முகமது ரபி தாயார் பானுபீவி கவனித்து வந்தார். இரவு ஆரிப்பாஷா வீட்டில் தூங்கிக் கொண்டு இருந்தான். அந்த நேரம் பாட்டி பானுபீவி பார்சல் கட்டுவதற்காக பேப்பரை கடையில் கொடுக்க சென்றார். திரும்பி வந்து பார்த்தபோது கட்டிலில் படுத்திருந்த குழந்தையை காணவில்லை.

பதறி போன பானுபீவி அக்கம் பக்கத்தில் யாராவது எடுத்து சென்ற இருப்பார்களோ என விசாரித்து தேடினார். ஆனால் கண்டுபிடிக்க முடியவில்லை. பின்னர் குழந்தையை யாரோ கடத்தி சென்று இருக்கலாம் என உணர்ந்தார்.

விசாரணை இதுகுறித்து முகமது ரபி சிந்தாதிரிப்பேட்டை போலீசில் புகார் செய்தார். குழந்தை மாயமான நேரத்தில் மழை தூறிக்கொண்டே இருந்தது. தெரு விளக்கும் எரியவில்லை.

ஒரு பிச்சைக்காரன் அங்கு அடிக்கடி சுற்றிக்கொண்டு இருப்பான். சந்தேகத்தின் பேரில் அவனை போலீசார் பிடித்து விசாரணை நடத்தினார்கள். ஆனால் எந்த பலனும் கிடைக்கவில்லை. மத்திய சென்னை இணை கமிஷனர் சங்கர் மேற்பார்வையில் திருவல்லிக்கேணி துணை கமிஷனர் புகழேந்தி தலைமையில் உதவி கமிஷனர் வெங்கடாசலபதி, இன்ஸ்பெக்டர்கள் சுப்பி ரமணி, வாசு, சப்- இன்ஸ் பெக்டர்கள் வெங்கடேஷ், குமார் ஆகியோர் கொண்ட தனிப்படை அமைக்கப்பட்டு உள்ளது.

அவர்கள் தொரப்பாக்கம் உள்பட பல்வேறு இடங்களில் சென்று விசாரணை நடத்தி வருகிறார்கள். குழந்தை கடத்தப்பட்ட சம்பவம் அந்த பகுதியில் பெரும் பரபரப்பை ஏற்படுத்தி உள்ளது.

மாலை மலர்

அந்த குழந்தை கிடைக்க என் பிரார்தனைகள்