ஜெயலலிதாவுக்கு கொலை மிரட்டல் விடுத்தகல்லூரி பேராசிரியர் கைது; பரபரப்பு வாக்குமூலம்

செல்போன் எஸ்.எம்.எஸ். மூலம், முதல்-அமைச்சர் ஜெயலலிதாவை வெடிகுண்டு வைத்து கொல்வோம் என்று தகவல் அனுப்பிய கல்லூரி பேராசிரியர் ஒருவர் கைது செய்யப்பட்டார்.

கடந்த 11-ந் தேதி அன்று சென்னை போலீஸ் கட்டுப்பாட்டு அறைக்கு செல்போன் எஸ்.எம்.எஸ். மூலம் திடுக்கிடும் தகவல் ஒன்று வந்தது. அந்த தகவலில், `செப்டம்பர் 15-ந் தேதி அண்ணா பிறந்த நாளன்று கோட்டைக்கு வரும்போது முதல்-அமைச்சர் ஜெயலலிதாவை வெடிகுண்டு வைத்து கொல்வோம்' என்று அந்த தகவலில் தெரிவிக்கப்பட்டிருந்தது. இதை பார்த்ததும் போலீஸ் கட்டுப்பாட்டு அறை அதிகாரிகள் அதிர்ச்சி அடைந்தனர்.

இதுபற்றி கமிஷனர் திரிபாதிக்கு தெரிவிக்கப்பட்டது. அவர் இதுபற்றி உடனடியாக விசாரித்து நடவடிக்கை எடுக்க உத்தரவிட்டார். மத்திய குற்றப்பிரிவு துணை கமிஷனர் ராதிகா, கூடுதல் துணை கமிஷனர் டாக்டர் சுதாகரன் ஆகியோர் மேற்பார்வையில், இன்ஸ்பெக்டர் கவுதம் இதுதொடர்பாக வழக்குப்பதிவு செய்து விசாரித்தார். போலீஸ் விசாரணையில், குறிப்பிட்ட செல்போன் `சிம்' கார்டு கல்லூரி முதல்வர் ஒருவரது பெயரில் இருந்தது. உடனே தனிப்படை போலீசார் குறிப்பிட்ட கல்லூரி முதல்வரிடம் விசாரித்தார்கள். விசாரணையில் அவர் குற்றவாளி இல்லை என்று தெரிந்தது.

அவரது பெயரில் செல்போன் சிம் கார்டை வாங்கி, சம்பந்தப்பட்ட குற்றவாளி எஸ்.எம்.எஸ். தகவல் அனுப்பியிருப்பது கண்டறியப்பட்டது. உடனே போலீசார்
கடந்த 3 நாட்களாக தீவிர விசாரணை மேற்கொண்டனர். அப்போது உண்மையான குற்றவாளி கல்லூரி பேராசிரியர் என்பது தெரிய வந்தது. அவரது பெயர் யோகேஸ்வரன் (வயது 36) என்றும் தெரிய வந்தது. அவர் அச்சரப்பாக்கம் மேற்குமாட வீதியில் வசித்து வந்தார். திருமணமாகியுள்ள அவர் மனைவியை பிரிந்து வாழ்ந்தார். அவரை கைது செய்து நேற்று காலையில் தனிப்படை போலீசார் சென்னை அழைத்து வந்தனர்.

சென்னையில் கமிஷனர் அலுவலகத்தில் வைத்து தீவிர விசாரணை நடத்தப்பட்டது. விசாரணையில் அவர் தற்போது வேலையில் இல்லை என்று தெரியவந்தது. குறிப்பிட்ட கல்லூரி முதல்வர், அவரது வேலை பறிபோவதற்கு காரணமாக இருந்தார் என்றும், இதனால் அவரை போலீசில் மாட்டிவிடுவதற்காக அவரது பெயரில் செல்போன் சிம்கார்டு வாங்கி, அந்த செல்போனில் இருந்து மிரட்டல் தகவலை அனுப்பினேன் என்றும் கைதான யோகேஸ்வரன் போலீசாரிடம் பரபரப்பு வாக்குமூலம் கொடுத்துள்ளார்.

அவர்மீது கொலைமிரட்டல் உள்பட 4 சட்டப்பிரிவுகளின் கீழ் குற்றம் சுமத்தப்பட்டது. அவர் எம்.ஏ.எம்.பிஎல். பட்டம் பெற்றவர். தமிழ் பேராசிரியரான அவரை நேற்று கோர்ட்டில் ஆஜர்படுத்தி போலீசார் ஜெயிலில் அடைத்தனர்.

மாலை மலர்

படித்த முட்டாள்