விசாரணையில் சிக்கியது, அழகிரியின் ரூ50 கோடி சொத்து!

by தாமு Thu Jul 14, 2011 11:05 am

மதுரை, இந்தியா: தமிழகம் எங்கும் முடுக்கி விடப்பட்டுள்ள நில அபகரிப்பு விசாரணையில் சிக்கியுள்ள முதலாவது வி.ஐ.பி. என்ற பெருமையைப் பெறுகிறார் மு.க.அழகிரி. விசாரணையில் சிக்கியுள்ள இவரது ஒரு நிலத்தின் மதிப்பு 50 கோடி என்று கணிப்பிடப்பட்டுள்ளது.

குறிப்பிட்ட இந்த நிலம் இருப்பது மதுரையில் அல்ல, கோடைக்கானலில்! மு.க.அழகிரிக்காக இந்த நிலத்தை அபகரித்துக் கொடுத்தவர் என்ற குற்றச்சாட்டில் கைது செய்யப்பட்டுள்ளார், கொடைக்கானல் தி.மு.க. நகர்மன்றத் தலைவர் முகமது இப்ராஹிம். நில அபகரிப்பில் இவருக்கு உதவியதாக மேலும் இருவரையும் கைது செய்துள்ளது கோடைக்கானல் போலீஸ்.

கொடைக்கானலில் நாயுடுபுரம் பகுதிக்கு அருகிலுள்ள சிவனடி சாலையில் உள்ள இந்த நிலத்தின் அளவு, நாலரை ஏக்கர். மதிப்பு ரூ50 கோடி. இந்த நிலத்தின் ஒரிஜினல் உரிமையாளர், பிரிட்டிஷ் பிரஜை ஒருவர். அவரிடமிருந்து சேவியர் மைக்கேல் என்பவர் இந்த நிலத்தை வாங்கி, வசித்து வந்திருக்கிறார்.

திடீரென சென்னையிலிருந்து வந்த ஒருவர், இந்த நிலத்தை பிரிட்டிஷ் பிரஜை தனக்கு எழுதிக் கொடுத்துவிட்டார் என்று தகராறு செய்திருக்கிறார். அவரது ஏஜென்ட் என்று திண்டுக்கல்லைச் சேர்ந்த மற்றொருவரும் வந்துள்ளார். இவர்களுக்கு உதவியாக போலீஸ் இலாகா செயற்பட்டிருக்கிறது. சேவியர் மைக்கேலை அங்கிருந்து வெளியேற்றும் பொறுப்பு, கொடைக்கானலில் தி.மு.க. நகர்மன்றத் தலைவர் முகமது இப்ராஹிமுக்குக் கொடுக்கப்பட்டிருந்தது.

முகமது இப்ராஹிம், கடந்த 7.2.2010ம் தேதியன்று சேவியர் மைக்கேல் மற்றும் அவரது குடும்பத்தினரை அங்கிருந்து வெற்றிகரமாக விரட்டி விட்டுள்ளனர். இதுகுறித்து அப்போது பதவியிலிருந்த டி.ஜி.பி.க்கு சேவியர் மைக்கேல் புகார் மனு அளித்தும், எவ்வித நடவடிக்கையும் எடுக்கப்படவில்லை.

குறிப்பிட்ட நிலம் சென்னைப் பார்ட்டிக்கு என்று சொல்லப்பட்டாலும், அதன் நிஜ உரிமையாளர் மு.க.அழகிரிதான் என்றும், அதனால் இது குறித்து எந்த நடவடிக்கையும் எடுக்கக்கூடாது என்றும் லோக்கல் போலீஸ் ஸ்டேஷனில் வாய்மொழி உத்தரவே போடப்பட்டிருந்தது. இதனால், போலீஸ் இதில் தலையிடாமல் முழுமையாக ஒதுங்கிக் கொண்டது.

அதன்பின் அழகிரியின் மனைவி வழி உறவினர் என்று சொல்லிக்கொண்டு வந்த ஒருவர், நிலத்தைச் சுற்றிப் பார்த்துவிட்டுச் சென்றார். நிலத்தைப் பார்க்க அவரை அழைத்து வந்ததே லோக்கல் போலீஸ்தான்.

குறிப்பிட்ட ‘உறவினர்’ மதுரையிலிருந்து கோடைக்கானல் வந்தபோது அவரது வண்டியுடன், மதுரை காவல்துறை உயரதிகாரி ஒருவரின் டிப்பார்ட்மென்ட் வண்டியும் துணைக்கு அனுப்பப்பட்டிருந்தது. ‘உறவினருக்கு’ வேண்டியதைச் செய்து கொடுக்குமாறு மதுரையிலிருந்து லோக்கல் போலீஸ் ஸ்டேஷனுக்கு உத்தரவு போட்டதும், மதுரை உயரதிகாரிதான்.

இப்போது ஆட்சி மாறி நில ஆக்கிரமிப்பு விசாரணைகள் சூடு பிடித்துள்ள நிலையில், இந்த நில விவகாரம் மீண்டும் தூசுதட்டி எடுக்கப்பட்டுள்ளது. போலீசார் விசாரணை நடத்தி, கொடைக்கானல் தி.மு.க. நகர்மன்றத் தலைவர் முகமது இப்ராஹீமை கைது செய்துள்ளனர். இவருடன் கைது செய்யப்பட்ட மற்றைய இருவரும், லோக்கல் நில புரோக்கர்கள். திண்டுக்கல் நபர், முன்ஜாமீன் பெற்றிருக்கிறார்.

சென்னை பார்ட்டியை அடையாளம் கண்டுள்ள போலீஸார், அவருக்கும் அழகிரிக்கும் உள்ள சம்மந்தம் என்ன என்று விசாரித்து வருகின்றனர். கோடைக்கானல் சென்ற அழகிரியின் மதுரை உறவினர், தற்போது மலேசியாவில் இருக்கிறார்.

-மதுரையிலிருந்து இரா.பிரபாகரின் குறிப்புகளுடன், ரிஷி