உத்தரபிரதேச மாநிலத்தில் பயங்கர விபத்து, ரெயில் கவிழ்ந்து 37 பேர் பலி

உத்தரபிரதேச மாநிலத்தில் நேற்று ரெயில் தடம் புரண்டு கவிழ்ந்தது. இந்த கோர விபத்தில் 37 பயணிகள் பலி ஆனார்கள். மேலும் 250-க்கும் அதிகமான பேர் காயம் அடைந்தனர்.

ரெயில் கவிழ்ந்தது

மேற்கு வங்காள மாநிலம் ஹவுராவில் இருந்து டெல்லி வழியாக அரியானா மாநிலத்தில் உள்ள கல்கா செல்லும் கல்கா மெயில் ரெயில் நேற்று மதியம் 12.15 மணிக்கு உத்தரபிரதேச மாநிலம் பதேபூரை அடுத்த மால்வா ரெயில் நிலையம் அருகே வந்து கொண்டு இருந்தது. அப்போது எதிர்பாராதவிதமாக திடீரென்று அந்த ரெயில் விபத்துக்குள்ளாகி கவிழ்ந்தது.

என்ஜின் மற்றும் மூன்றடுக்கு படுக்கை வசதி கொண்ட 2 குளிர்சாதன வசதி பெட்டிகள், 2 அடுக்கு படுக்கை வசதி கொண்ட ஒரு குளிர்சாதன வசதி பெட்டி, 5 படுக்கை வசதி கொண்ட பெட்டிகள், 2 பொதுப் பெட்டிகள் உள்பட 13 பெட்டிகள் தண்டவாளத்தை விட்டு இறங்கி கவிழ்ந்தன. தடம் புரண்ட பெட்டிகள் ஒன்றன் மீது ஒன்று மோதி தாறுமாறாக கவிழ்ந்து கிடந்தன.

மீட்புப் பணி

இந்த விபத்து பற்றிய தகவல் கிடைத்ததும் ரெயில்வே அதிகாரிகளும் மீட்புப்படையினரும் அங்கு விரைந்து சென்று மீட்புப்பணியில் ஈடுபட்டனர். உள்ளூர் மக்களும் மீட்புப்பணிக்கு உதவினார்கள். அலகாபாத்தில் இருந்து மருத்துவ குழுவினர், ராணுவத்தினர் மற்றும் மீட்பு பணிக்கான உபகரணங்களுடன் ஒரு ரெயில் சம்பவ இடத்துக்கு சென்றது. இதேபோல் கான்பூரில் இருந்தும் ஒரு ரெயிலில் மீட்புக்குழுவினர் விரைந்தனர்.

உத்தரபிரதேச மாநில கூட்டுறவு மந்திரியும், மாநில பகுஜன் சமாஜ் தலைவருமான சுவாமி பிரசாத் மவுர்யா, தலைமைச் செயலாளர் அனூப் மிஸ்ரா ஆகியோர் விபத்து நடந்த இடத்துக்கு சென்று மீட்புப்பணிகளை பார்வையிட்டனர்.

37 பயணிகள் பலி

மீட்புக்குழுவினர், மிகவும் மோசமாக சேதம் அடைந்த பெட்டிகளை கியாஸ் வெல்டிங் மெஷின் மூலம் வெட்டி உள்ளே இருந்த பயணிகளை மீட்டனர்.

இந்த பயங்கர விபத்தில் 37 பேர் பலியானார்கள். இவர்களில் சிலர் விபத்து நடந்த இடத்தில் இடிபாடுகளில் சிக்கி பலி ஆனார்கள். காயம் அடைந்த பயணிகள் பதேபூர் மற்றும் கான்பூரில் உள்ள ஆஸ்பத்திரிகளுக்கு அனுப்பி வைக்கப்பட்டனர். அங்கு சிகிச்சை பலன் அளிக்காமல் மேலும் பலர் உயிர் இழந்தனர். இதனால் சாவு 37 ஆனது.

காயம் அடைந்த 250-க்கு அதிகமான பேர் ஆஸ்பத்திரிகளில் சிகிச்சை பெற்று பெற்று வருகிறார்கள். அவர்களில் சிலருடைய நிலைமை கவலைக்கிடமாக இருப்பதால் சாவு எண்ணிக்கை மேலும் உயரும் என்று அஞ்சப்படுகிறது.

பிரதமர் அனுதாபம்

இந்த விபத்து குறித்து பிரதமர் மன்மோகன் சிங் அதிர்ச்சியும் துயரமும் தெரிவித்து உள்ளார். விபத்தில் பலியானவர்களின் குடும்பத்தினருக்கு அவர் அனுதாபம் தெரிவித்து இருக்கிறார். ரெயில்வே இலாகா ராஜாங்க மந்திரி முகுல்ராய், ரெயில்வே வாரிய தலைவர் வினய் மிட்டல் ஆகியோரை தொடர்பு கொண்டு பேசிய மன்மோகன் சிங், மீட்புப்பணிகளை துரிதப்படுத்துமாறு கேட்டுக் கொண்டார்.

உதவித்தொகை

இந்த விபத்தில் பலியானவர்களின் குடும்பத்தினருக்கு தலா ரூ.5 லட்சமும், பலத்த காயம் அடைந்தவர்களுக்கு தலா ரூ.1 லட்சமும், லேசான காயம் அடைந்தவர்களுக்கு தலா ரூ.25 ஆயிரமும் வழங்கப்படும் என்று ரெயில்வே இலாகா ராஜாங்க மந்திரி முகுல்ராய் அறிவித்து உள்ளார்.

இதேபோல் உத்தரபிரதேச முதல்-மந்திரி மாயாவதியும் உதவித்தொகை அறிவித்து உள்ளார். இறந்தவர்களின் குடும்பத்தினருக்கு தலா ரூ.1 லட்சமும் பலத்த காயம் அடைந்தவர்களுக்கு தலா ரூ.50 ஆயிரமும், லேசான காயம் அடைந்தவர்களுக்கு தலா ரூ.10 ஆயிரமும் வழங்கப்படும் என்று அவர் அறிவித்து இருக்கிறார்.

விசாரணைக்கு உத்தரவு

இந்த விபத்தின் காரணமாக டெல்லி-ஹவுரா பாதையில் ரெயில் போக்குவரத்து பாதிக்கப்பட்டது. பல ரெயில்கள் ரத்து செய்யப்பட்டன. சில ரெயில்கள் மாற்றுப்பாதையில் திருப்பி விடப்பட்டன. விபத்துக்குள்ளான ரெயிலில் வந்த பயணிகள் தொடர்ந்து தங்கள் பயணத்தை மேற்கொள்வதற்காக அங்கு, கான்பூரில் இருந்து சிறப்பு ரெயில் ஒன்று அனுப்பி வைக்கப்பட்டது.

விபத்து நடந்த போது ரெயில் மணிக்கு 108 கிலோ மீட்டர் வேகத்தில் சென்றதாக தெரிய வந்து உள்ளது. இந்த விபத்துக்கான காரணம் உடனடியாக தெரியவில்லை. அதுகுறித்து வடக்கு மத்திய ரெயில்வேயின் பாதுகாப்பு கமிஷனர் விசாரணை நடத்துவார் என்று அறிவிக்கப்பட்டு உள்ளது.

தினதந்தி

அண்ணா ஜம்முவில் இருந்து டெல்லி வரும் ரையுலுக்கி இதனால் பாதிப்பு இருக்கிறதா என் அம்மா அமர்நாத் பயணம் முடித்துவிட்டு இன்று தான் ஜம்முவில் இருந்து புறப்படுகிறார்