வாலிபர் கொடூர கொலை. கழுத்தை நெரித்த கொன்று, உடலை பெட்ரோல் ஊற்றி எரித்தனர்

நாகர்கோவில், ஜுலை.10- வாலிபரை கழுத்தை நெரித்து கொன்றுவிட்டு உடலை பெட்ரோல் ஊற்றி எரித்தவர்களை போலீசார் வலைவீசி தேடி வருகிறார்கள்.

எரிந்த நிலையில் பிணம்

குமரி மாவட்டம் தக்கலை போலீஸ் சரகம் குமாரகோவில் அருகே உள்ள கோணியான்குளம் அருகே பாதி எரிந்த நிலையில் ஒரு வாலிபரின் பிணம் கிடப்பதாக கல்குளம் கிராம நிர்வாக அதிகாரி பிள்ளை என்பவர் போலீசில் புகார் செய்தார்.

அதன்பேரில் தக்கலை போலீசார் சம்பவ இடத்துக்கு விரைந்து சென்று பார்த்தனர். அப்போது 35 வயது மதிக்கத்தக்க வாலிபர் தென்னை நாரால் ஆன கயிற்றால் கழுத்து இறுக்கப்பட்டு இறந்து கிடந்தார்.

தலை முதல் இடுப்பு வரை அடையாளம் காண முடியாத வகையில் பெட்ரோல் ஊற்றி உடலை எரிக்கப்பட்டு இருந்தது. வாலிபரின் வயிற்றின் கீழ் பகுதி சிதைக்கப்பட்டு பெட்ரோல் ஊற்றி எரிக்கப்பட்டு இருந்தது. இடுப்புக்கு கீழே உள்ள பகுதி எரியவில்லை. அவரது வாய் துணியால் கட்டப்பட்டு இருந்தது.

கொலை செய்தது எப்படி?

அவர் கால் சட்டை அணிந்திருந்தார். வாலிபர் பிணத்தின் அருகே எரிப்பதற்காக பெட்ரோல் கொண்டு வரப்பட்ட பிளாஸ்டிக் பாட்டில் கிடந்தது. அருகே உள்ள தென்னந்தோப்பில் மதுபாட்டில், புரோட்டா, மட்டன் துண்டுகள், தண்ணீர் கொண்டுவந்த பாட்டில் ஆகியவை கிடந்தன.

எனவே இந்த சம்பவத்தில் இறந்து கிடந்த வாலிபருடன் 2 பேர் அல்லது அதற்கு மேற்பட்டோர் பிணம் கிடந்த இடத்துக்கு அருகே உள்ள தென்னந்தோப்பில் மது அருந்திவிட்டு, வாலிபரை கயிற்றால் கழுத்தை நெரித்துக் கொலை செய்திருக்க வேண்டும். அப்போது அவர் சத்தம்போடாமல் இருக்க வாயில் துணியை கட்டியிருக்க வேண்டும். கொலை செய்தபிறகு வாலிபரின் உடலை கொலையாளிகள் பெட்ரோல் ஊற்றி எரித்திருக்கலாம் என்று போலீசாரால் சந்தேகிக்கப்படுகிறது.

மோப்ப நாய்

இதுதொடர்பாக துப்பு துலக்க கொண்டுவரப்பட்ட போலீஸ் மோப்பநாய், பிணத்தை மோப்பம் பிடித்துவிட்டு குமாரகோவில் விலக்கு வரை ஓடி பின்னர் நாகர்கோவில் ரோட்டில் சிறிது தூரம் சென்று ரோட்டோரம் நின்று விட்டது.

நெல்லையில் இருந்து வந்த நுண்ணறிவுப்பிரிவு போலீசார் சடலத்தை ஆய்வு செய்ததில், பிணமாக கிடந்தவரின் ஒரு கால் ஏற்கனவே ஒடிந்து பிளேட் போட்டு அறுவை சிகிச்சை செய்திருப்பதை கண்டுபிடித்தனர். பின்னர் அந்த வாலிபரின் உடல் பிரேத பரிசோதனைக்காக தக்கலை அரசு ஆஸ்பத்திரிக்கு கொண்டு செல்லப்பட்டது.

காரணம் என்ன?

இதுகுறித்து தக்கலை போலீசார் வழக்குப்பதிவு செய்து பிணமாக கிடந்த வாலிபர் யார்? எந்த பகுதியைச் சேர்ந்தவர்? அவர் ஏன் கொலை செய்யப்பட்டார்? வயிற்றின் கீழ்பகுதி சிதைக்கப்பட்டு எரிக்கப்பட்டிருப்பதால் பிணமாக கிடந்த வாலிபருக்கும், ஒரு பெண்ணுக்கும் ஏற்பட்ட கள்ளத்தொடர்பை ஏற்றுக்கொள்ள முடியாத பெண்ணின் உறவினர்கள் இந்த கொலையை செய்திருக்கலாமோ? கொலையாளிகள் யார்? என்பன போன்ற பல்வேறு கோணங்களில் போலீசார் விசாரணை நடத்தி வருகிறார்கள்.

மேலும் மாவட்ட போலீஸ் சூப்பிரண்டு அருண் உத்தரவின்பேரில் தனிப்படை அமைக்கப்பட்டுள்ளது. அவர்களும் கொலையாளிகளை தீவிரமாக தேடி வருகிறார்கள்.

தினதந்தி

கள்ளத்தொடர்பு கள்ளத்தொடர்பு .... எந்த செய்தியைப் பார்த்தாலும் அதன் முடிவில் தகாத திருட்டு உறவுகளில் தான் முடிகிறது...சமூகத்தில் இது போன்ற தவறுகள் தற்போது மலிந்து விட்டது.
தங்களின் பகிர்விர்க்கு நன்றி திரு சிவா...