புலிகளின் 2 படகு மூழ்கடிப்பு

நவ-18 அன்று அதிகாலை இலங்கையில் முல்லைத் தீவு அருகே விடுதலைப்புலிகளின் 2 படகுகள் அழிக்கப்பட்டதாகவும், இதில் 6 விடுதலைப்புலிகள் கொல்லப்பட்டதாகவும் இலங்கை ராணுவம் கூறியுள்ளது.

இலங்கை ராணுவம், விடுதலைப்புலிகள் மீதான தாக்குதலைத் தீவிரப்படுத்தியுள்ளது. நவ-17 அன்று புலிகளின் முக்கிய தளம் ஒன்று வீழ்த்தப்பட்டது. இந்த நிலையில் நவ-18 அன்று அதிகாலை முல்லைத் தீவு மாவட்டம் அருகே நயாறு என்ற இடத்தில் விடுதலைப்புலிகளின் 7 படகுகள் செல்வதைக் கடற்படையினர் பார்த்ததாகவும், உடனடியாகத் தாக்குதல் நடத்தியதாகவும் இலங்கை கடற்படை தெரிவித்துள்ளது.

இந்தத் தாக்குதலில் குறைந்தபட்சம் 2 படகுகள் அழிக்கப்பட்டதாகவும், மற்றொரு படகு கடும் சேதம் அடைந்ததாகவும், கடற்படையின் செய்தித் தொடர்பாளர் மகேஷ் கருணரத்னே செய்தியாளர்களிடம் கூறினார். நவ-18 அன்று காலை 7. 30 மணியளவில் இந்தத் தாக்குதல் நடத்தப்பட்டதாகக் கூறப்படுகிறது.

இலங்கை விமானப் படையின் எம்.ஐ24 போர் ஹெலிகாப்டர்கள், கடற்படையின் இந்தத் தாக்குதலுக்குத் துணை புரிந்ததாகவும் கருணரத்னே கூறியுள்ளார். இந்தத் தாக்குதலில் கடற்படையினருக்கு எந்தப் பாதிப்பும் ஏற்படவில்லை என்றும் அவர் தெரிவித்துள்ளார்.

விடுதலைப்புலிகளின் தொலைத் தொடர்பு ரேடியோ, கண்காணிக்கப்பட்டதில் இந்த தாக்குதலில் 6 விடுதலைப்புலிகள் உயிரிழந்த தகவல் தெரியவந்திருப்பதாகவும் அவர் கூறியுள்ளார்.

கடற்படையின் இந்தத் தகவல் குறித்து விடுதலைப்புலிகள் தரப்பில் கருத்து எதுவும் தெரிவிக்கப்படவில்லை. இலங்கையில் விடுதலைப்புலிகளின் கட்டுப்பாட்டில் உள்ள பகுதிகளைக் கைப்பற்றும் முயற்சியில் ஈடுபட்டு வரும் ராணுவம், கடந்த சில தினங்களுக்கு முன்பு பூநகரி கடல் தளத்தைக் கைப்பற்றியது. நவ.17 அன்று புலிகளின் கட்டுப்பாட்டில் மாங்குளம் பகுதி ராணுவத்தால் கைப்பற்றப்பட்டது குறிப்பிடத்தக்கது.