அரசு நிலம் அபகரிப்பு விபரம் சேகரிப்பு: தி.மு.க.,வினர் கிலி

சிவகங்கை : கடந்த ஆட்சியில் அதிகாரத்தை பயன்படுத்தி அரசு புறம்போக்கு நிலங்களை, போலி பட்டா மூலம் அபகரித்த கட்சியினர் விபரத்தை வழங்குமாறு, டி.ஜி.பி.,கேட்டுள்ளதால், தி.மு.க.,வினருக்கு கிலி ஏற்பட்டுள்ளது.
கடந்த ஆட்சியில் தமிழகத்தில் பல இடங்களில் தி.மு.க.,வினர் அதிகாரத்தை பயன்படுத்தி, நிலங்களை அபகரித்துள்ளதாக புகார் எழுந்தது. இதையடுத்து, மாவட்டந்தோறும் நில அபகரிப்பு குற்ற தடுப்பு பிரிவு துவக்கப்பட்டு, இது போன்ற வழக்குகள், நில அபகரிப்பில் ஈடுபட்டவர்கள் விபரம் சேகரிக்கப்படுகிறது.

கட்சியினர் விபரம்: அரசு அன்றாடம் மாவட்ட வாரியாக பெற்ற, தகவல்படி கடந்த 2006 முதல் 2011 தி.மு.க., ஆட்சியில் பலர் அதிகாரத்தை பயன்படுத்தி நிலங்களை அபகரித்தது தெரியவந்துள்ளது. இதையடுத்து, அவர்கள் பற்றிய விபரங்கள் தனியாக கேட்கப்பட்டுள்ளது. இதில், அரசு புறம்போக்கு நிலங்களை கட்சியினர் அபகரித்து, பட்டா போட்டுள்ளனரா, அது குறித்த வழக்கு எதுவும் நிலுவையில் உள்ளதா; கைது செய்யப்பட்டார்களா; கட்சியில் எந்தவித பொறுப்பில் இருந்தனர், அரசியல் பலத்தில் நிலம் சம்பந்தமாக இன்னும் எந்தெந்த நிலங்களை வளைத்து போட்டுள்ளனர் என்பது போன்ற விபரங்களை நேற்று திடீரென சேகரித்து அனுப்பியுள்ளனர்.

கூலிப்படை : அதே போன்று, கடந்த ஆட்சியில் கூலிப்படையை வைத்து, பல கொலைகள் நடந்துள்ளதும் தெரியவந்துள்ளது. இதனால், கடந்த ஆறு ஆண்டுகளாக நடந்த கொலைகள், மர்மக்கொலை,சந்தேக மரணம் போன்றவற்றில் கூலிப்படையினர் தலையீடு இருக்கிறதா என்ற விபரத்தையும் சேகரித்து அனுப்பினர். மேலும்தேசிய அளவில் தேடப்பட்டு வரும் தீவிரவாதிகள் எனக்கருதும் 48 பேர் பெயர் பட்டியலும் மாவட்டங்களுக்கு அனுப்பப்பட்டுள்ளது. அவர்கள் தமிழகத்தில், வேறு சம்பவங்களில் ஈடுபட்டுள்ளனரா என விசாரித்து டி.ஜி.பி., அலுவலகத்திற்கு தகவல் தெரிவிக்கவும் அறிவுறுத்தப்பட்டுள்ளனர். இது குறித்து போலீஸ் அதிகாரி ஒருவர் கூறுகையில்,"" அரசியல்வாதிகள் போர்வையில் ஏராளமான நில அபகரிப்பு நடந்துள்ளதால், அவற்றை தனியாக கேட்டுள்ளனர். மேலும் மதுரையை மையமாக வைத்து தான், தமிழகத்தில் கூலிப்படை இயங்கியுள்ளது. இக்கூலிப்படையினரை ஒடுக்கும் நோக்கில் அரசு இதை சேகரிக்கிறது,'' என்றார்.

தினமலர்

ஒட்டு மொத்த தி மு க ஜெயில் போக போறாங்களா