இலங்கை போரின் போது அமைதி காத்தது ஏன்? மத்திய அரசுக்கு கம்யூனிஸ்ட் கேள்வி

புதுடில்லி : இலங்கையில் இறுதிகட்டபோரின் போதுஆயிரகணக்கான தமிழ் மக்கள்
கொல்லபட்டபோது மத்திய அரசு அமைதி காத்தது ஏன் என இந்திய கம்யூனிஸ்ட் கட்சி
கேள்வி எழுப்பியுள்ளது. மேலும் இது தொடர்பாக பார்லிமென்டில் கேள்வி
எழுப்பப்போவதாகவும் அக்கட்சி அறிவித்துள்ளது. இது தொடர்பாக டில்லியில்
நடந்த போராட்டத்தின் போது பேட்டியளித்த இந்திய கம்யூனிஸ்ட் கட்சியின் ஏபி
பரதன் கூறுகையில், இலங்கையில் இறுதிகட்ட போரின் போது ஆயிரகணக்கான மக்கள்
மொத்தமாக கொல்லப்பட்டனர். இதற்கு இங்கிலாந்து, பிரெஞ்சு, ஐ.நா.,
பொதுச்செயலாளர் ஆகியோர் கண்டனம் தெரிவித்தனர். ஆனால் மத்திய அரசு மட்டும்
ஏன் அமைதி காத்தது என கேள்வி எழுப்பினார். இந்த விவகாரத்தில் மத்திய அரசு
ஒரு நிலைப்பாடு எடுக்கும் வகையில் பார்லிமென்டில் இந்த விவகாரம் தொடர்பாக
கேள்வி எழுப்பப்படும் என கூறினார். இந்திய கம்யூனிஸ்ட் கட்சியின் டி ராஜா
கூறுகையில், தமிழ் மக்கள் கொல்லப்பட்டது தொடர்பாக ராஜபக்ஷே அரசு உண்மையான
விசாரணை நடத்த நடவடிக்கை எடுக்க வேண்டும். குற்றவாளிகளை நீதி முன் நிறுத்த
வேண்டும். அதிகாரங்கள் பகிர்ந்தளிக்கப்பட வேண்டும். இடம்பெயர்ந்த தமிழ்
மக்கள் தங்கள் சொந்த இடங்களில் குடிபெயர வசதிகள் ஏற்படுத்தி தர வேண்டும்.
இலங்கை தமிழ் மக்கள் விவகாரத்தில் மத்திய அரசு இரட்டை நிலை வகிக்கிறது.
இலங்கை அரசுக்கு மத்திய அரசு நெருக்கடி ஏற்படுத்த வேண்டும். கடந்த சில
நாட்களுக்கு முன்னர் இலங்கைக்கு இந்தியா நெருக்கடி கொடுக்கிறது என பிரதமர்
மன்மோகன் சிங் கூறினார். அடுத்தநாளே இந்தியா எந்தவித நெருக்கடியும்
கொடுக்கவில்லை என இலங்கை அதிபர் கூறுகிறார். இதில் எதனை நம்புவது என கேள்வி
எழுப்பினார். இந்த போராட்டத்தில் அ.தி.மு.க., எம்.பி., மைத்ரேயன் மற்றும்
டி லிங்கம் ஆகியோர் கலந்து கொண்டனர்.

தினமலர்