சிறுவன் தில்ஷன் சுடப்பட்ட வழக்கு:மாஜி ராணுவ அதிகாரி கைது

சிறுவன் தில்ஷன் சுடப்பட்ட விவகாரத்தில்,ஓய்வு பெற்ற ராணுவ அதிகாரி ராமராஜன், 60, என்பவர் கைது செய்யப்பட்டார்.சென்னை தீவுத்திடல், இந்திராநகர் குடிசைப் பகுதியைச் சேர்ந்த குமார்- கல்யாணி தம்பதியின் மகன் தில்ஷன், 13. கடந்த, 3ம் தேதி, குடியிருப்பின் அருகில் உள்ள ராணுவ அதிகாரிகள் குடியிருப்பு வளாகத்தில் உள்ள பாதாம் மரங்களில், பாதாம் கொட்டைகள் பறிக்கச் சென்ற போது, அங்குள்ள ராணுவ அதிகாரி சுட்டதில் இறந்தான். இந்த விவகாரம் தொடர்பாக, சி.பி.சி.ஐ.டி., போலீசார் மற்றும் ராணுவத்தினர் விசாரணை நடத்தி வருகின்றனர்.இந்த வழக்கில் சந்தேகப்படும், லெப்டினன்ட் கர்னல் அந்தஸ்தில் இருக்கும் அதிகாரி ஒருவரிடம் சி.பி.சி.ஐ.டி., போலீசார் விசாரித்து வருகின்றனர். அவர், விசாரணையின் போது முன்னுக்குப் பின் முரணாக தகவல்கள் தருவதால், மிகுந்த குழப்பம் ஏற்பட்டுள்ளதாக கூறப்படுகிறது.
சம்பவத்தன்று, அவர்,"நான் அங்கு இல்லை' என்றும், "அப்போது தான் சென்றேன்' என்றும் மாற்றி மாற்றி கூறி வருவதாக கூறப்படுகிறது.சிறுவனின் உயிரைப் பறித்த துப்பாக்கி குண்டு குறித்த ஆய்வு முடிவு கிடைத்த பின்பு, தற்போது போலீசார் துப்பாக்கியை தேடி வருகின்றனர். இது கிடைத்தால், பயன்படுத்தியது யார் என்பதை கணிக்க முடியும் என்பது அவர்களின் கருத்து. இதற்கிடையில், தமிழக டி.ஜி.பி., ராமானுஜமும் இந்த வழக்கு தொடர்பாக விசாரணை நடத்திச் சென்றுள்ளார். ஆனாலும், சுட்டது யார்? என்பதை கண்டறிவதில், தாமதம் ஏற்பட்டு வருகிறது.
இதையடுத்து, இந்த சம்பவம் குறித்து விசாரிக்க 12 தனிப்படைகள் அமைக்கப்பட்டுள்ளன. ஒவ்வொரு தனிப்படையினரும் இந்த வழக்கின், பல கோணங்கள் குறித்து ஆய்வு செய்து வருகின்றனர். இது தவிர, சம்பவம் நடந்த அன்று, போலீசார் விசாரணையின் போது எடுக்கப்பட்ட வீடியோ பதிவுகள், "டிவி' நிறுவனங்களின் வீடியோ பதிவுகளையும் சேகரிக்கும் முயற்சியில் சி.பி.சி.ஐ.டி., போலீசார் ஈடுபட்டுள்ளனர்.ராணுவ குடியிருப்பில் உள்ளவர்களிடம் நடத்தப்பட்ட விசாரணையின் போது அவர்கள் கூறிய பதில், வீடியோ ஆதாரத்தில் அவர்கள் இருக்கிறார்களா என்பது குறித்தும் ஆய்வு செய்யப்பட உள்ளது. இதன் அடிப்படையில், சம்பந்தப்பட்ட அதிகாரியை பிடித்துவிடலாம் என, சி.பி.சி.ஐ.டி., முயற்சித்து வருகிறது. எனினும், ஓரிரு நாட்களில் தில்ஷனின் உயிரைப் பறித்த அந்த நபர் பிடிபடுவார் என, அதிகாரிகள் நம்பிக்கை தெரிவித்திருந்தனர்.இந்நிலையில் நேற்று இரவு ஓய்வு பெற்ற ராணுவ அதிகாரி ராமராஜன், 60, என்பவர் கைது செய்யப்பட்டார்.- நமது சிறப்பு நிருபர்-

தினமலர்