மோசடி புகாரில் சிக்கிய புதுமுக நடிகர் தற்கொலை முயற்சி

தாம்பரம், ஜூலை 7-


மோசடி புகாரில் சிக்கிய புதுமுக நடிகர் தற்கொலை முயற்சியில் ஈடுபட்டார். உச்ச கட்டம் என்ற படத்தில் கதாநாயகனாக அறிமுகமானவர் விக்னேஷ் (வயது 28), இவர் சிட்ல பாக்கத்தில் உள்ள மருது பாண்டி தெருவில் வசிக்கிறார். விக்னேசுக்கும் கோயம் புத்தூரை சேர்ந்த பழனிச்சாமி, கண்ணன் ஆகியோருக்கும் பழக்கம் ஏற்பட்டது.

அம்பத்தூரில் நிலம் வாங்குவது தொடர்பாக பழனிச்சாமி, கண்ணன் ஆகியோரிடம் இருந்து விக்னேஷ் பணம் வாங்கியதாக கூறப்படுகிறது. அந்த பணத்தை திருப்பி கொடுக்கவில்லையாம். தங்களிடம் இருந்து ரூ.16 1/2 லட்சம் வாங்கிவிட்டு ஏமாற்றி விட்டதாக விக்னேஷ் மீது பழனிச்சாமி, கண்ணன் இருவரும் புறநகர் போலீஸ் கமிஷனர் கரன்சின்காவிடம் புகார் அளித்தனர்.

இது குறித்து விசாரிக்கும்படி சிட்லபாக்கம் போலீசாருக்கு கமிஷனர் உத்தர விட்டார். போலீசார் வழக்கு பதிவு செய்து விக்னேசிடமும் அவரது தாய் வசந்த லட்சுமியிடமும் விசாரணை நடத்தினர். இதனால் விக்னேஷ் மனமுடைந்து தனது வயிற்றில் கத்தியால் குத்தி தற்கொலைக்கு முயன்றார்.

உறவினர்கள் அவரை குரோம்பேட்டையில் உள்ள தனியார் ஆஸ்பத்திரியில் சிகிச்சைக்காக சேர்த்தனர். அங்கு அவருக்கு சிகிச்சை அளிக்கப்பட்டு வருகிறது.

இது குறித்து விக்னேஷ் கூறும் போது பழனிச்சாமி, கண்ணனிடம் ரூ.5 லட்சம் தான் வாங்கினேன். ஆனால் அவர்கள் ரூ.16 1/2 லட்சம் வாங்கியதாக மிரட்டி என் வீட்டை எழுதி வாங்கிக் கொண்டனர். போலீசார் விசாரணை என்ற பெயரில் எங்களை துன்புறுத்தினர். எனவேதான் தற்கொலைக்கு முயன்றேன் என்றார்.


மாலை மலர்