2ஜி ஊழல்: SC விசாரணை வளையத்தில் தயாநிதி மாறன்

புதுடெல்லி, ஜூலை 6,2011

சென்னையைச் சேர்ந்த தொலைத்தொடர்பு மேம்பாட்டாளர் தனது ஏர்செல் நிறுவனப் பங்குகளை 'வலுக்கட்டாயமாக' மலேசிய நிறுவனத்துக்கு 2006-ல் விற்பதற்கு முக்கியப் பங்கு வகித்ததாக, மத்திய ஜவுளித்துறை அமைச்சர் தயாநிதி மாறனை 2ஜி ஸ்பெக்ட்ரம் வழக்கின் விசாரணை வளையத்துக்குள் சிபிஐ கொண்டு வந்துள்ளது.




2ஜி ஸ்பெக்ட்ரம் ஒதுக்கீடு முறைகேடு தொடர்பாக விசாரித்து வரும் சிபிஐ, தனது தற்போதைய விசாரணையின் நிலை குறித்த அறிக்கை ஒன்றை உச்ச நீதிமன்றத்தில் இன்று தாக்கல் செய்தது.

மொத்தம் 71 பக்கங்கள் கொண்ட இந்த அறிக்கையை நீதிபதிகள் ஜி.எஸ். சிங்வி மற்றும் ஏ.கே.கங்குலி ஆகியோர் அடங்கிய பெஞ்ச் முன்பு சி.பி.ஐ.யின் மூத்த வழக்கறிஞர் கே.கே.வெணுகோபால் வாசித்தார்.

தொலைத்தொடர்பு அமைச்சராக தயாநிதி மாறன் இருந்த 2004-07 காலக்கட்டத்தில், சென்னையைச் சேர்ந்த தொலைத்தொடர்பு மேம்பாட்டாளர் சி.சிவசங்கரன் தனது ஏர்செல் பங்குகளை மலேசியாவின் மேக்ஸிஸ் குழுமத்துக்கு வலுக்கட்டாயமாக விற்க வேண்டிய நிலைக்குத் தள்ளப்பட்டதாக அதில் தெரிவிக்கப்பட்டது.

டிசம்பர் 2006-ல் மலேசிய நிறுவனம் வசம் ஏர்செல் வந்த பின்பு ஆறே மாதங்களில் உரிமங்கள் பெற தயாநிதி மாறன் உறுதுணைபுரிந்ததாக குறிப்பிடப்பட்டுள்ளது.

"அந்த ஜெண்டில்மேன் (ஏர்செல் ப்ரொமோட்டர்) பல வழிகளில் கதவுகளைத் தட்டிப் பார்த்தார். ஆனால், எவ்வித பலனும் இல்லாததால் வேறு வழியின்றி தனது பங்குகளை மலேசிய நிறுவனத்துக்கு விற்றுவிட்டார்," என்று சிபிஐ தரப்பு வழக்கறிஞர் வேணுகோபால் கூறினார்.

2ஜி விசாரணை முடிவது எப்போது?

2ஜி ஸ்பெக்டரம் ஒதுக்கீடு முறைகேடு தொடர்பான விசாரணை ஆகஸ்ட் 31-ம் தேதிக்குள் முடித்துக் கொள்வதாக சிபிஐ தனது 'நிலை அறிக்கை'யில் தெரிவித்துள்ளது.

மேலும், இந்த முறைகேடு வழக்கு தொடர்பாக 2001 - 08 ஆண்டு வரையிலான காலக்கட்டத்துக்குரிய விசாரணையை வரும் செப்டம்பர் 30-க்குள் (3 மாத காலம்) முடித்துவிடுவதாக உச்ச நீதிமன்றத்தில் சிபிஐ தரப்பு உறுதியளித்துள்ளது.

இதைத் தொடர்ந்து, அடுத்த கட்ட விசாரணையை ஜூலை 11-க்கு நீதிபதிகள் தள்ளி வைத்தனர்.

முன்னதாக, 'தொழிலதிபர் சிவசங்கரனுக்கு உரிமம் வழங்க மறுத்து விட்டு, அவரது பங்குகளை வலுக்கட்டாயமாக மலேசிய நிறுவனத்துக்கு விற்க வேண்டிய கட்டாயத்தை அப்போதைய தொலைத்தொடர்பு அமைச்சர் தயாநிதி மாறன் ஏற்படுத்தினார். அதன் மூலமாக, தன்னுடைய சகோதரரின் நிறுவனத்துக்கு முதலீடுகளைப் பெற்றார்,' என்று சில புள்ளி விவரங்களுடன் உச்ச நீதிமன்றத்தில் பொது நல வழக்கு ஒன்று தொடரப்பட்டது.

ஜெ. வலியுறுத்தல்...

இதனிடையே டெல்லியில் நிருபர்களிடம் தமிழக முதல்வர் ஜெயலலிதா கூறுகையில்,
"தன் மீதான குற்றச்சாட்டுகளுக்கு தார்மீகப் பொறுப்பு ஏற்று அமைச்சர் பதவியில் இருந்து தயாநிதி மாறன் பதவி விலகுவார் என்று நாம் எதிர்பார்ப்பதில் பயன் இல்லை. எனவே, அவரை அமைச்சரவையில் இருந்து பிரதமர் தான் நீக்க வேண்டும்," என்று வலியுறுத்தினார்


விகடன்