மு.க. மாஜி அமைச்சர் ஆ.ராசாவின், திருச்சி பினாமிகள்!

திருச்சி, இந்தியா: ஸ்பெக்ட்ரம் முறைகேடு குற்றச்சாட்டில் கைதாகி சிறையில் இருக்கும் ஆ.ராசா, சிறைக்குள் அமைதியாகத்தான் இருக்கிறார். ஆனால், வெளியே நிலைமைகள் அமைதியாக இல்லை. காரியங்கள் வேகவேகமாக நடந்து கொண்டிருக்கின்றன.

வருமானவரித் துறையின் திருச்சி அலுவலகம், ராசா விவகாரத்தில் கடும் பிசியாக இருக்கிறது. ராசாவுடன் நேரடியாகத் தொடர்புடைய பணப் புழக்கம் தொடர்பான பைல்கள் அனைத்தும் ஏற்கனவே டில்லிக்கு அனுப்பப்பட்டு விட்டன. தற்போது திருச்சி அலுவலகம் குடையத் தொடங்கியிருப்பவை, ராசாவின் பினாமி சொத்துகள் பற்றியே!

திருச்சியைச் சுற்றியுள்ள பகுதிகளில் ரியல் எஸ்டேட் தொழிலில் பிசியாக இயங்கிவந்த க்ரீன் ஹவுஸ் புரமோட்டர்ஸ் நிறுவனம் வருமானவரித் துறையினரின் தீவிர அலசலில் இருப்பதாகத் தெரிகிறது. இந்த நிறுவனம் வாங்கி, விற்ற வீட்டு மனைகள், மற்றும் சாகுபடி நிலங்கள் தொடர்பான விபரங்கள் சேகரிக்கப்படுகின்றன.

இதிலுள்ள முக்கிய விஷயம், ஒரே நேரத்தில் இந்த நிறுவனம் வாங்கிப்போட்ட பல்வேறு நிலங்கள் பற்றியதாகவே இருக்கின்றது. நிலங்கள் வாங்கியதில் ஏதும் வில்லங்கம் கிடையாது. அப்படியிருந்தாலும் அதைக் கண்டுபிடிப்பது வருமானவரி இலாகாவின் வேலையல்ல)

வில்லங்கம் இருப்பதே, ஒரே நேரத்தில் இவ்வளவு நிலங்களை வாங்குவதற்கு இவர்களால் எப்படி பணம் புரட்ட முடிந்தது என்பதே!

நிலங்கள் வாங்கப்பட்ட பணம், முற்று முழுதாக அந்த நிறுவனத்தின் பணமல்ல என்பதுவரை வருமானவரித்துறை கண்டுபிடித்திருக்கிறது. அப்படியானால், அந்தப் பணம் எங்கிருந்து வந்தது? இந்தக் கேள்விக்கான பதிலையே தேடுகிறது திருச்சி வருமானவரித் துறை அலுவலகம்.

இந்த நிறுவனத்துடன் தொடர்புடைய பலர் ஏற்கனவே திருச்சி அலுவலகத்தால் விசாரிக்கப்பட்டுள்ளனர். பணம் வந்த விதம் பற்றி அவர்கள் கொடுத்துள்ள ஸ்டேட்மென்ட்கள் ஒன்றுக்கொன்று ஒத்துப் போகவில்லை!

இந்த பண விவகாரத்துடன் சங்கிலித் தொடராக வெவ்வேறு நிறுவனங்கள் சம்மந்தப் பட்டுள்ளன என்பதை வருமானவரித் துறை கண்டுபிடித்துள்ளது.அந்த நிறுவனங்களில் ஒன்று, சிவகாமம் மோட்டார்ஸ் என்ற பெயரில் பெரம்பலூரில் இயங்கும் நிறுவனம். அப்பகுதிக்கான பிரபல மோட்டார் சைக்கிள் டீலர்ஷிப்பை இந்த நிறுவனம் வைத்திருக்கிறது.

திருச்சியைச் சுற்றியுள்ள வெவ்வேறு இடங்களில் பல வெவ்வேறு நிறுவனங்கள் இந்த டிலர்ஷிப் நிறுவனத்துடன் இணைக்கப்பட்டுள்ளன. இந்த நிறுவனங்கள் அனேகமானவற்றின் பெயர்கள் ‘சிவகாமம்’ என்றே தொடங்குகின்றன. அதாவது சிவகாமம் ஏஜென்சி, சிவகாமம் ஆட்டோமொபைல்ஸ், சிவகாமம் ட்ரேடேர்ஸ் என்று வெவ்வேறு பெயர்கள்.

மொத்தத்தில், வருமானத்துறை ஒரு வேரிலிருந்து புறப்பட்ட, பல கிளை வேர்களை அடையாளம் கண்டுள்ளது. மெயின் வேரை உருவும்போது, பல கிளை வேர்கள் வெளியே வரப்போகின்றன.

-திருச்சியிலிருந்து ஜாபர் சையத்தின் குறிப்புகளுடன், ரிஷி.


விவி