சிறுவனை சுட்டுக் கொன்ற வழக்கு ராணுவ அதிகாரியை கைது செய்ய உத்தரவிட முடியாது:உயர் நீதிமன்றம் தீர்ப்பு

சிறுவன் தில்சன் சுட்டுக் கொல்லப்பட்ட சம்பவத்தில், ராணுவ அதிகாரியை கைது செய்ய உத்தரவிட முடியாது என்று சென்னை உயர் நீதிமன்றம் தீர்ப்பளித்தது.

சிறுவன் தில்சனை சுட்டுக் கொன்ற ராணுவ அதிகாரியை கைது செய்ய வேண்டும் என்று வக்கீல் புகழேந்தி, உயர் நீதிமன்றத்தில் பொது நல வழக்கு தொடர்ந்தார்.

இந்த வழக்கை தலைமை நீதிபதி இக்பால் மற்றும் நீதிபதி சிவஞானம் நேற்று விசாரித்தனர். மனுதாரர் சார்பாக ஆஜரான வக்கீல் ராதாகிருஷ்ணன், சிறுவன் சுடப்பட்டு 2 நாட்கள் ஆகிறது.

இதுவரை, ராணுவ அதிகாரி கைது செய்யப்படவில்லை. அவரை கைது செய்ய உத்தரவிட வேண்டும் என்றார்.அப்போது குறுக்கிட்ட தலைமை நீதிபதி, போலீசார் புலன் விசாரணை செய்து வருகிறார்கள். குற்றவாளி யார் என்பது தெரிந்த பின்னரே கைது நடவடிக்கை எடுக்க முடியும்.

இந்நிலையில், கைது செய்ய எப்படி உத்தரவு பிறப்பிக்க முடியும். இது, விளம்பரத்துக்காக போடப்பட்ட வழக்காக தெரிகிறது என்றார்.

போலீஸ் சார்பில் ஆஜரான அட்வகேட் ஜெனரல் நவநீதகிருஷ்ணன், "சம்பவம் நடந்தவுடன் சிபிசிஐடி விசாரணைக்கு தமிழக அரசு உத்தரவிட்டுள்ளது.

உயர் அதிகாரிகள் தீவிரமாக விசாரித்து வருகிறார்கள். ஆதாரம் கிடைத்தவுடன் கைது நடவடிக்கை எடுக்கப்படும் என்றார்.

ராணுவம் சார்பில் ஆஜரான மத்திய அரசின் கூடுதல் சொலிசிட்டர் ஜெனரல் எம்.ரவிந்திரன், போலீஸ் விசாரணைக்கு ராணுவ அதிகாரிகள் முழு ஒத்துழைப்பு அளித்து வருகிறார்கள்" என்றார்.

இதைக்கேட்ட நீதிபதிகள், இந்த வழக்கில் சிபிசிஐடி போலீசார் தீவிரமாக விசாரணை நடத்தி வருவதால், ராணுவ அதிகாரியை கைது செய்ய உத்தரவிட முடியாது. வழக்கை இத்துடன் முடித்துக் கொள்கிறோம் என்று தீர்ப்பளித்தனர்.

நல்ல தீர்ப்பு !!!