சுப்ரீம் கோர்ட்டில் ஸ்பெக்ட்ரம் வழக்கு விசாரணை அறிக்கை, சி.பி.ஐ. இன்று தாக்கல் செய்கிறது

ஸ்பெக்ட்ரம் வழக்கில் 3-வது குற்றப்பத்திரிகை தாக்கல் செய்வதில் தாமதம் ஆவதால் விசாரணையின் தற்போதைய நிலைமை குறித்து சுப்ரீம் கோர்ட்டில் சி.பி.ஐ. சார்பாக இன்று அறிக்கை தாக்கல் செய்யப்படுகிறது.

இரண்டு குற்றப்பத்திரிகைகள்

2ஜி ஸ்பெக்ட்ரம் ஒதுக்கீடு முறைகேடு குறித்து சி.பி.ஐ. விசாரித்து வருகிறது. இந்த வழக்கை சுப்ரீம் கோர்ட்டு கண்காணிப்பில் சிறப்பு சி.பி.ஐ. கோர்ட்டு விசாரிக்கிறது. ஏற்கனவே, கடந்த ஏப்ரல் 2-ந் தேதி பிரதான குற்றப்பத்திரிகை தாக்கல் செய்யப்பட்டது. அதன் பிறகு, ஏப்ரல் 25-ந் தேதி அன்று 2-வது குற்றப்பத்திரிகையை சி.பி.ஐ. தாக்கல் செய்தது.

இந்த இரண்டு குற்றப்பத்திரிகைகளிலும் ஆ.ராசா, கனிமொழி உட்பட 14 பேருடைய பெயர்களும் 3 செல்போன் நிறுவனங்களின் பெயர்களும் இடம் பெற்றன. எனவே, குற்றப்பத்திரிகைகளில் இடம் பெற்ற ஆ.ராசா, கனிமொழி உள்ளிட்ட அனைவரும் கைது செய்யப்பட்டு டெல்லியில் உள்ள திகார் சிறையில் அடைக்கப்பட்டுள்ளனர். அதன் தொடர்ச்சியாக, ஜுலை முதல் வாரத்தில் 3-வது குற்றப்பத்திரிகை தாக்கல் செய்ய முடிவு செய்து கோர்ட்டில் தகவல் தெரிவித்தது.

ஜுலை இறுதியில்

ஆனால், 3-வது குற்றப்பத்திரிகை தாக்கல் செய்வதற்கான ஆதாரங்களை திரட்டுவதில் கால தாமதம் ஏற்பட்டுள்ளது. இது தவிர, பல்வேறு காரணங்களால் திட்டமிட்டபடி குற்றப்பத்திரிகை தாக்கல் செய்ய முடியவில்லை. எனவே, இந்த மாதம் (ஜுலை) இறுதியில் தான் குற்றப்பத்திரிகையை தாக்கல் செய்ய முடியும் என சி.பி.ஐ. கருதுகிறது.

இதைத் தொடர்ந்து, ஸ்பெக்ட்ரம் வழக்கு விசாரணையின் தற்போதைய நிலைமை குறித்த விளக்க அறிக்கையை சுப்ரீம் கோர்ட்டில் இன்று சி.பி.ஐ. தாக்கல் செய்கிறது. இது குறித்து டெல்லியில் உள்ள சி.பி.ஐ. வட்டாரங்கள் நேற்று கூறியதாவது:-

முக்கிய புள்ளிகள்

ஸ்பெக்ட்ரம் ஊழல் தொடர்பாக மொரீசியஸ் நாட்டில் நடத்திய விசாரணையில் 12-க்கும் மேற்பட்ட நிறுவனங்கள் தொடர்பாக ஆவணங்கள் கிடைத்துள்ளன. அவற்றை அலசி ஆராய்ந்து பரிசீலிக்கும் பணிகள் நடைபெறுகின்றன. இதுதவிர, சில பிரச்சினைகள் குறித்து மத்திய கம்பெனிகள் விவகார அமைச்சகத்திடமும் சி.பி.ஐ. விளக்கம் கேட்டுள்ளது. எனவே, 3-வது குற்றப்பத்திரிகை தாக்கல் செய்வதில் காலதாமதம் ஏற்படுகிறது.

தற்போது நடைபெற்று வரும் விசாரணையில், பல்வேறு நிறுவனங்களில் உயர் பதவிகளில் உள்ளவர்களின் பெயர்களும் இடம் பெற்றுள்ளன. எனவே, மேலும் பல முக்கிய புள்ளிகள் சிக்குவார்கள். 3-வது குற்றப்பத்திரிகையில் அவர்களுடைய பெயர்கள் இடம் பெறும்.

இவ்வாறு சி.பி.ஐ. தகவல்கள் தெரிவித்தன.

11-ந் தேதி வக்கீல்கள் வாதம்

இதற்கிடையே, ஸ்பெக்ட்ரம் வழக்கை பிரத்தியேகமாக விசாரித்து வரும் டெல்லி சி.பி.ஐ. சிறப்பு கோர்ட்டில் சிறப்பு நீதிபதி ஷைனி முன்னிலையில் நேற்று வழக்கு விசாரணை நடைபெற்றது. அப்போது, கனிமொழி, ஆ.ராசா உள்ளிட்ட அனைவரும் ஆஜர் படுத்தப்பட்டனர். குற்றம் சாட்டப்பட்ட அனைவருக்கும் வழக்கு தொடர்பான ஆவணங்கள் அளிக்கப்பட்டன.

அப்போது நீதிபதி ஓ.பி.ஷைனி கூறுகையில், "இந்த வழக்கில் வக்கீல்கள் வாதங்களை அடுத்த திங்கள் கிழமை (ஜுலை 11) முதல் ஆரம்பிக்கலாம். வழக்கு தொடர்பான ஆவணங்களை பரிசீலிக்கும் பணிகளை துரிதப்படுத்துமாறு சி.பி.ஐ. மற்றும் அரசு தரப்பை கேட்டுக் கொள்கிறேன். குற்றம் சாட்டப்பட்டவர்களுக்கு ஆவணங்கள் வழங்கப்படாத பட்சத்தில் கோர்ட்டு அபராதம் விதிக்க நேரிடும்'' என்றார்.

சி.பி.ஐ. மீது அதிருப்தி

ஸ்பெக்ட்ரம் விவகாரத்தில் கலைஞர் டி.வி.க்கு ரூ.214 கோடி லஞ்சம் அளித்தது தொடர்பாக சினியுக் பிலிம்ஸ் இயக்குனரும், இந்தி திரைப்பட தயாரிப்பாளருமான மொரானி கைது செய்யப்பட்டுள்ளார். அவர், டெல்லி ஐகோர்ட்டில் தாக்கல் செய்த ஜாமீன் மனு மீது நேற்று விசாரணை நடைபெற்றது. அப்போது, மொரானி உடல்நிலை குறித்து முழுமையான அறிக்கை தாக்கல் செய்யாத சி.பி.ஐ. மீது நீதிபதி அதிருப்தி தெரிவித்தார்.

இது குறித்து நீதிபதி அஜித் பரிகோகே கூறுகையில், "கோர்ட்டில் தாக்கல் செய்யப்பட்ட மருத்துவ அறிக்கையில் எம்.ஆர்.ஐ. மற்றும் ஊடுகதிர் சோதனை முடிவுகள் மட்டுமே உள்ளன. டாக்டர்கள் அளித்த அறிக்கை எதுவுமே இல்லை. இதை வைத்து என்ன செய்ய முடியும்? இன்னும் 3 நாட்களுக்குள் முழுமையான மருத்துவ அறிக்கையை தாக்கல் செய்ய வேண்டும். வழக்கின் அடுத்த விசாரணை 8-ந் தேதி நடைபெறும்'' என்றார்.

தினதந்தி!