தமிழகப் பொலிஸகாரர் உருட்டுக்கட்டையல் அடித்துக் கொலை: புதுச்சேரி அருகே சம்பவம்!

by ரஞ்சித் Tue Jul 05, 2011 2:40 pm

புதுச்சேரி அருகே, தமிழக போலீஸ்காரர், உருட்டைக் கட்டை மற்றும் கல்லால் தாக்கி படுகொலை செய்யப்பட்ட சம்பவம், பரபரப்பை ஏற்படுத்தியுள்ளது.

புதுச்சேரி அருகே உள்ள ஆலங்குப்பம் மெயின்ரோட்டைச் சேர்ந்தவர் ரங்கநாதன். இவருடைய மகன் பழனி, 36. சென்னை போலீஸ் கமிஷனர் அலுவலகத்தில், போலீஸ்காரராக பணியாற்றி வந்தார்.

மூன்றாண்டுகளுக்கு முன், பழனி, பணியின்போது குடிபோதையில் இருந்ததால், அவர் மீது ஒழுங்கு நடவடிக்கை எடுக்கப்பட்டு, இடைக்கால பணி நீக்கம் செய்யப்பட்டார். மீண்டும் பணியில் சேர, அவருக்கு, நேற்று ஆணை வந்தது.

இதற்காக அவர், நேற்று காலை சென்னைக்குச் செல்ல இருந்தார்.நேற்று முன்தினம், இரவு 1.30 மணிக்கு, பழனி, அதே பகுதியில் உள்ள சாராயக்கடைக்கு, குடிப்பதற்காக சென்றார்.

குடிபோதையில் இருந்தபோது அவருக்கும் சிலருக்கும் வாய் தகராறு ஏற்பட்டது. அங்கிருந்தவர்கள் அவரை சமாதானப்படுத்தி அனுப்பி வைத்தனர். வரும் வழியிலும் பெண் ஒருவரிடம் தகராறு செய்துவிட்டு வீட்டிற்குப் புறப்பட்டுள்ளார்.

போதையில் வீட்டிற்கு சென்று கொண்டிருந்த பழனியை பின் தொடர்ந்த சிலர், அவரை சுற்றி வளைத்து தடியால் அடித்தும், கல்லால் அடித்துவிட்டும் தலைமறைவாகிவிட்டனர்.

பலத்த காயமடைந்த பழனி சம்பவ இடத்திலேயே துடி துடித்து இறந்தார். விடியற்காலையில் அவ்வழியாக வேலைக்குச் சென்றவர்கள், பழனி கொலை செய்யப்பட்டுள்ள விவரத்தை டி.நகர் போலீசாருக்கு தெரிவித்தனர்.

இதை தொடர்ந்து இன்ஸ்பெக்டர் வீரவல்லபன், சப்-இன்ஸ்பெக்டர் பாலமுருகன் ஆகியோர் சம்பவ இடத்திற்கு சென்று விசாரணை மேற்கொண்டனர்.

சம்பவ இடத்திற்கு மோப்பநாய் மற்றும் விரல்ரேகை நிபுணர்கள் வரவழைக்கப்பட்டு தடயங்கள் சேகரிக்கப்பட்டது.கொலை தொடர்பாக டி.நகர் போலீசார் புதுச்சேரியைச் சேர்ந்த சரத்(எ)சரத்குமார் என்பவரை சந்தேகத்தின் பேரில் பிடித்து விசாரணை நடத்தி வருகின்றனர்.

பழனி குடித்துவிட்டு பெண்ணிடம் தகராறு செய்துள்ளதன் தொடர்ச்சியாக, அவர் அடித்து கொலை செய்யப்பட்டுள்ளதாக போலீஸ் விசாரணையில் தெரியவந்துள்ளது.