இந்திய அணி பந்துவீச்சில் தாமதம் கேப்டன் டோனிக்கு சிக்கல்

டொமினிகா: இந்திய அணி பந்துவீச்சாளர்கள் குறிப்பட்ட நேரத்துக்குள் நிர்ணயிக்கப்பட்ட ஓவர்களைப் பூர்த்தி செய்யத் தவறி வருவதால், கேப்டன் டோனிக்கு ஒரு டெஸ்ட் போட்டியில் விளையாடத் தடை விதிக்கப்படும் நிலை ஏற்பட்டுள்ளது.
இந்தியா & வெஸ்ட் இண்டீஸ் அணிகளிடையே பார்படாசில் நடந்த 2வது டெஸ்ட் போட்டியின்போது, இந்திய அணி பந்துவீச்சாளர்கள் நிர்ணயிக்கப்பட்ட நேரத்துக்குள் குறிப்பிட்ட எண்ணிக்கையிலான ஓவர்களை வீசி முடிக்கத் தவறினர். இந்திய அணி இலக்கை விட 3 ஓவர்கள் குறைவாகப் பந்துவீசியதால் கேப்டன் டோனிக்கு போட்டிக்கான ஊதியத்தில் 60 சதவீதமும், மற்ற வீரர்களுக்கு தலா 30 சதவீதமும் அபராதம் விதிக்கப்பட்டது.
ஐசிசி விதிகளின்படி, 12 மாத காலத்தில் 3 முறை தாமதமான பந்துவீச்சுக்காக அபராதம் விதிக்கப்படும் அணியின் கேப்டனுக்கு ஒரு போட்டியில் விளையாடத் தடை விதிக்கப்படும். கடந்த ஜனவரியில் தென் ஆப்ரிக்காவுடன் கேப்டவுனில் நடந்த டெஸ்ட் போட்டியிலும், இப்போது வெஸ்ட் இண்டீசுடன் பார்படாசில் நடந்த டெஸ்ட் போட்டியிலும் இந்திய அணி குறிப்பிட்ட நேரத்துக்குள் நிர்ணயிக்கப்பட்ட ஓவர்களைப் பூர்த்தி செய்யத் தவறியதால் அபராதம் விதிக்கப்பட்டுள்ளது.
எனவே, அடுத்த ஆண்டு ஜனவரிக்குள் இந்திய அணி மீண்டும் இதே தவறை செய்தால், அடுத்த போட்டியிலேயே கேப்டன் டோனிக்கு தடை விதிக்கப்படும் அபாயம் ஏற்பட்டுள்ளது. வெஸ்ட் இண்டீசுடன் டொமினிகாவில் நாளை தொடங்கும் 3வது டெஸ்ட் போட்டியிலும் இந்திய பந்துவீச்சாளர்கள் ஆமை வேகத்தில் ஓவர்களைப் பூர்த்தி செய்தால், இங்கிலாந்துடன் லண்டன் லார்ட்ஸ் மைதானத்தில் நடக்க உள்ள முதல் டெஸ்டில் (ஜூலை 21&25) டோனி களமிறங்க முடியாது.
வேகப்பந்து வீச்சாளர்கள் இஷாந்த் ஷர்மா, பிரவீன் குமார் மற்றும் சுழற்பந்து வீச்சாளர் ஹர்பஜன் சிங் ஆகியோர் ஒவ்வொரு பந்தையும் வீசி முடிக்க அதிக நேரம் எடுத்துக் கொள்வதும், கேப்டன் டோனி பீல்டிங் வியூகத்தை அடிக்கடி மாற்றுவதுமே தாமதத்திற்கு முக்கிய காரணம் என்பது குறிப்பிடத்தக்கது. மொத்தத்தில், லார்ட்ஸ் டெஸ்டில் டோனி விளையாடுவது இந்திய பந்துவீச்சாளர்களின் கைகளில்தான் உள்ளது.