படப்பிடிப்பில் நடிகர் நகுலிடம் கிண்டல்: மாணவர்களை தாக்கிய ஸ்டண்ட் மாஸ்டர் கைது

by ராமகிருஷ்ணன் Tue Jul 05, 2011 12:07 pm

செங்கல்பட்டு ரெயில் நிலையத்தில் “வல்லினம்” என்ற சினிமா படப்பிடிப்பு கடந்த 2 நாட்களாக நடந்து வருகிறது. இயக்குனர் அறிவழகன் டைரக்டு செய்து வருகிறார். கதாநாயகனாக நடிகர் நகுல் நடித்து வருகிறார்.

நேற்று மாலை செங்கல் பட்டு ரெயில் நிலையத்தில் 7 மற்றும் 8-வது நடைமேடையில் படப்பிடிப்பு நடைபெற்றுக் கொண்டிருந்தது. அப்போது அங்கு வந்த சட்டக்கல்லூரி மாணவர்கள் படப்பிடிப்பை வேடிக்கை பார்த்தனர். அப்போது சில மாணவர்கள் நடிகர் நகுலிடம் இணைந்து போட்டோ எடுக்க வேண்டும் என்று கேட்டனர். சிலர் ஆட்டோகிராப் வாங்க முயன்றனர்.

அவர்களிடம், "குறிப்பிட்ட நேரத்துக்குள் நாங்கள் படப் பிடிப்பை முடிக்க வேண்டும். கொஞ்சம் காத்திருங்கள்" என்று உதவி இயக்குனர் ஒருவர் கூறினார். ஆனால் மாணவர்கள் நடிகர் நகுலை கிண்டல் செய்தனர். இதில் படப்பிடிப்பு குழுவினருக்கும், சட்டக் கல்லூரி மாணவர்களுக்கும் இடையே தகராறு ஏற்பட்டது.

நகுலை கிண்டல் செய்த மாணவர் கமலகண்ணன் என்பவரை ஸ்டண்ட் மாஸ்டர் செல்வம் தாக்கியதாக கூறப்படுகிறது. இதனால் மற்ற மாணவர்கள் தண்டவாளத்தில் அமர்ந்து மறியலில் ஈடுபட்டனர். இதனால் கடற்கரை செல்லும் மின்சார ரெயில் புறப்படுவதில் தாமதம் ஏற்பட்டது. நடிகர் நகுலையும், ஸ்டண்ட் மாஸ்டர் செல்வத்தையும் கைது செய்ய வேண்டும் என்று மாணவர்கள் கோஷமிட்டனர்.

இதனால் அங்கு பரபரப்பு ஏற்பட்டது. மாணவர்களுடன் ரெயில்வே போலீசார் பேச்சுவார்த்தை நடத்தினார்கள். பின்னர் மாணவர் கமலக்கண்ணன் கொடுத்த புகாரின் பேரில் ஸ்டண்ட் மாஸ்டர் செல்வம் மீது 323 (அடித்தல்), 294 (பி) (தகாத வார்த்தையால் திட்டுதல்) ஆகிய 2 பிரிவில் வழக்குப்பதிவு செய்து கைது செய்தனர். பின்னர் அவர் ஜாமீனில் விடுதலை செய்யப்பட்டார்.