ஒபாமா கொல்லப்பட்ட வதந்தி: CIA, இதோ சதிகாரர்களை நெருங்குகிறது!

by தாமு Tue Jul 05, 2011 10:40 am

பாஸ்டன், அமெரிக்கா: ஜனாதிபதி ஒபாமா கொல்லப்பட்டார் என்ற வதந்தியைப் பரப்பிய சதிகாரர்களை அமெரிக்க உளவுத்துறை சி.ஐ.ஏ. நெருங்கிவிட்டதாக ஃபாக்ஸ் நியூஸ், இன்று (செவ்வாய் கிழமை) தகவல் வெளியிட்டுள்ளது. நேற்றைய தினம் இடம்பெற்ற அமெரிக்க சுதந்திர தின கொண்டாட்டங்களைக் குழப்பும் நோக்கத்துடனேயே இந்த வதந்தி பரப்பப்பட்டதாகவும் தெரிவிக்கப்படுகின்றது.

அமெரிக்க செய்தி நிறுவனம் ஃபாக்ஸ் நியூஸின் டுவீட்டர் அக்கவுன்ட் ஒன்றில் ஊடுருவியே, இந்த வதந்தி பரப்பப்பட்டுள்ளது.

“அமெரிக்க ஜனாதிபதி சற்றுமுன் கொல்லப்பட்டார். லோவாவில் உள்ள ராஸ் ரெஸ்டாரன்ட்டில் உணவு அருந்திக்கொண்டிருந்தபோது அவர் இரு தடவைகள் துப்பாக்கியால் சுடப்பட்டார். தாக்குதலில் அவர் உயிர் தப்பவில்லை. அமெரிக்க சுதந்திரதின வாழ்த்துக்கள்” என்றது அந்தச் செய்தி.

ஒபாமா கொல்லப்பட்ட செய்தி, ஃபாக்ஸ் நியூசின் டுவீட்டர் அக்கவுன்ட் மூலம் வேகமாக பரவியது. பல வெளிநாட்டு செய்தி நிறுவனங்களின் தலைப்புச் செய்தியாகவும் மாறியது.

செய்தியில் குறிப்பிடப்பட்டதுபோல அந்த நேரத்தில் ஜனாதிபதி ஒபாமா லோவாவில் இருக்கவில்லை. வாஷிங்டனில் இருந்தார்!

ஃபாக்ஸ் நியூஸ் டுவீட்டர் அக்கவுன்ட், சரியாக அமெரிக்க EST 2 மணிக்கு ஹாக் பண்ணப்படத் தொடங்கிவிட்டது. ஆரம்பத்தில் சில வைரஸ் பைல்கள் அந்த அக்கவுன்டுக்கு வந்து சேர்ந்தன. அதையடுத்து சில நிமிடங்களில் அந்த அக்கவுன்டின் முழுமையான கட்டுப்பாடும் ஹக்கர்களின் கைகளுக்குச் சென்றுவிட்டது.

சிறிது நேரத்தில் ஹக்கர்களிடமிருந்து, அறிவிப்பு ஒன்று, ஃபாக்ஸ் நியூஸ் டுவீட்டர் ஒன்றுக்கு டுவீட் செய்யப்பட்டது. “உங்களுடைய டுவீட்டர் அக்கவுன்ட் ஒன்று, முழுமையாக எம்வசம் வந்துள்ளது” என்பதே அனுப்பப்பட்ட குறும் தகவல்.

ஃபாக்ஸ் நியூஸ் பல டுவீட்டர் அக்கவுன்ட்களை வைத்திருக்கின்றது. இவற்றில் எந்த அக்கவுன்ட் ஊடுருவப்பட்டது என்ற தகவல் அறிவிக்கப்பட்டிருக்கவில்லை. இதனால், ஃபாக்ஸ் நியூஸால், இந்த எச்சரிக்கை நிஜமானதா என்று உடனடியாகத் தெரிந்துகொள்ள முடியவில்லை.

அதன்பின்தான், ஹக் பண்ணப்பட்ட டுவிட்டர் அக்கவுன்ட் மூலம், ஒபாமா கொல்லப்பட்டார் என்ற வதந்தி பரப்பப்பட்டது.

இது பற்றிய விசாரணையை உடனடியாக மேற்கொண்ட அமெரிக்க உளவுத்துறை, சில முக்கிய துப்புக்களைக் கண்டுபிடித்துள்ளதாகத் தெரிவிக்கப்படுகின்றது.

Script Kiddies என்ற குழு, இந்த ஹக்கிங்குக்கு உரிமை கோரியுள்ளது. (Script Kiddies என்றால் கம்ப்யூட்டர் ஸ்லாங்கில், மற்றையவர்களின் புரோகிராம்களைப் பயன்படுத்தும் கத்துக்குட்டிகள் என்று அர்த்தம்) “ஃபாக்ஸ் நியூஸின் பாதுகாப்பு ஏற்பாடுகள் கேலிக்குரியவை, அவர்கள் வெளியிடும் செய்திகளைப் போலவே!” என்றும் கிண்டலடித்திருக்கிறது Script Kiddies குழு.

அவர்களை நெருங்கிவிட்டதாகக் கூறும் அமெரிக்க உளவுத்துறை, இந்த ‘கத்துக்குட்டிகளை” பிடிக்கிறதா பார்க்கலாம்!

விவி