"பணிபுரியும் கிராமத்தில் வி.ஏ.ஓ.,க்கள் கட்டாயம் வசிக்க வேண்டும்'

பொள்ளாச்சி : "கிராம நிர்வாக அலுவலர்கள் பணியாற்றும் கிராமத்தில் தான் கட்டாயம் வசிக்க வேண்டும்' என, வருவாய் கோட்டாட்சியர் அறிவுறுத்தினார். பொள்ளாச்சி நகராட்சி ஆண்கள் மேல்நிலைப்பள்ளியில் கிராம நிர்வாக அலுவலர்களுக்கு நில அளவை குறித்த பயிற்சி வகுப்பு நேற்று துவங்கியது. பல்லடம், மடத்துக்குளம், உடுமலை, பொள்ளாச்சி, ஊட்டி ஆகிய தாலுகாவை சேர்ந்த 31 கிராம நிர்வாக அலுவலர்களுக்கு பயிற்சி நடக்கிறது. தினமும் காலையில் வகுப்பு பயிற்சியும், மதியம் களப்பயிற்சியும் நடக்கிறது. ஒரு மாத காலத்திற்கான பயிற்சி வகுப்பை துவக்கி வைத்து பொள்ளாச்சி வருவாய் கோட்டாட்சியர் அழகிரிசாமி பேசியதாவது: கிராம நிர்வாக அலுவலர்களுக்கு நிறைய பொறுப்புகள் உள்ளன. தங்களுக்கான பொறுப்பையும், கடமையையும் உணர்ந்து செயல்பட வேண்டும். மண்ணையும் மனிதர்களையும் அரசுக்கு அடையாளம் காண்பிக்கும் முக்கிய பொறுப்பு இவர்களுக்கு உண்டு. மாவட்ட அளவில் கலெக்டருக்கு இருக்கும் அதிகாரத்தை போன்று, கிராம அளவில் கிராம நிர்வாக அலுவலர்களுக்கு தான் அதிகாரம் உள்ளது. அதனால் பொறுப்பை உணர்ந்து திறமையாகவும், நேர்மையாகவும் செயல்பட வேண்டும். எந்த சூழ்நிலையிலும் ஒருதலைபட்சமாக முடிவு எடுக்கக்கூடாது. கிராம நிர்வாக அலுவலர்கள் பணியாற்றும் கிராமத்தில் தான் வசிக்க வேண்டும் என்று அரசு நிபந்தனையே உள்ளது. ஆனால் கிராம நிர்வாக அலுவலர்கள் தற்போது அந்தந்த கிராமத்தில் வசிப்பதில்லை. இதனால் அந்த கிராமத்திற்கு வருபவர்களின் விபரங்கள், அடையாளங்கள், கிராமத்தின் எல்லைகளை முழுமையாக அறியாமல் உள்ளனர். பணியாற்றும் கிராமத்தில் வசிக்காமல் இருப்பது குற்றமாகும். கிராமத்தில் வசிக்காவிட்டால் கிராம உதவியாளர்களை நம்பி பணியாற்ற வேண்டும். கிராம உதவியாளர்கள் ஒரு தலைபட்சமாக செயல்பட்டால் அதற்கும் கிராம நிர்வாக அலுவலர் தான் பொறுப்பேற்க வேண்டும். அதையும் உணர்ந்து பணியாற்ற வேண்டும். இவ்வாறு, வருவாய் கோட்டாட்சியர் பேசினார். பொள்ளாச்சி தாசில்தார் ரவிச்சந்திரன் முன்னிலை வகித்தார். வட்டதுணை ஆய்வாளர் வேதக்கண், வட்ட சார் ஆய்வாளர் செல்வன், நத்தம் சார் ஆய்வாளர் பனையப்பன், முதுநிலைவரைவாளர் ரஜினி, புலஉதவியாளர் முருகன் ஆகியோர் பயிற்சி அளித்தனர்.
தினமலர்