செலுத்துவதோ ரூ.5000; செலவு வைப்பதோ ரூ.21,000

by positivekarthick Tue Jul 05, 2011 7:51 am

மதுரை:மதுரை திருமலை நாயக்கர் மகாலில், படப்பிடிப்பு நடத்தும் சினிமா குழுவினர், விதிமுறைகளை மீறி ஆணி அடித்து சேதப்படுத்துகின்றனர். வெள்ளை நிற தூண்களில் அழுக்கு கைகளை வைத்தும்,கிறுக்கியும் வருவதால், அதன் அழகு கெடுகிறது. இங்கு படப்பிடிப்பு நடத்த அனுமதிக்கக்கூடாது என்ற தொல்லியல் துறையின்பரிந்துரையை செய்தி மக்கள்தொடர்பு துறை கண்டுகொள்வதில்லை. மதுரையின் அடையாளமாக இருப்பவைகளில் ஒன்றான திருமலை நாயக்கர் மகாலில், ஒருநாள் சினிமா படப்பிடிப்பு கட்டணம் ரூ.5 ஆயிரம். இதற்கான அனுமதியை சென்னையில் செய்தி மக்கள் தொடர்பு துறையிடம் பெறுகின்றனர்.மதுரையின் அழகை படம்பிடிக்கிறேன் என்றுக்கூறி கிளம்பி வரும் சினிமா குழுவினர், மகால் அழகை தங்களால் முடிந்தளவிற்குபாழ்படுத்துகின்றனர்.
சுற்றுலாபயணிகளுக்கு இடையூறாகவும் படப்பிடிப்பு நடத்துகின்றனர். படப்பிடிப்பின்போது பழங்கால சின்னத்தில் எந்த மாற்றங்களோ, சிதைவுகளோ செய்யக்கூடாது என்ற விதியை மீறி, தங்கள் இஷ்டத்திற்கு தூணின் மேற்பகுதியில் ஆணி அடித்து, கம்பி கட்டி வண்ண துணிகளை கட்டுகின்றனர்.பின், ஆணியை பிடுங்குவதற்கு பதில், சுண்ணாம்பு பூச்சை பெயர்த்து எடுக்கின்றனர். சில இடங்களில் ஆணியும், கம்பிகளும் அப்படியே இருக்கின்றன. காதல் கிறுக்கர்கள் : இங்கே பாடல் காட்சிகள்தான் அதிகம் எடுக்கப்படுகின்றன. இதில் நடிக்கும் நடனக் குழுவினர், வெள்ளை நிற தூண்கள் மீது அழுக்கு கைகளை வைத்தும், கிறுக்கியும் வருகின்றனர். இவர்களுக்கு போட்டியாக காதல் ஜோடிகளும் கிறுக்குவது தனி கதை.படப்பிடிப்பு சாதனங்களை தூண்கள் மீது சாய்த்து வைப்பதால், அதன் அழகு கெடுகிறது. இதை சரிசெய்ய தூண் ஒன்றிற்கு குறைந்தது ரூ.21,000 செலவாகும் என்கின்றனர் தொல்லியல் துறையினர்.
சமீபத்தில்தான் ரூ.3 கோடிக்கு மகால் சீரமைக்கப்பட்டது. ஆனால் அதற்கான எந்த அடையாளமும் இல்லாத அளவிற்கு மகால் சீரழிக்கப்படுகிறது. வெளிநாட்டவருக்காக அமைக்கப்பட்ட மேற்கத்திய கழிப்பறையையும் சேதப்படுத்தியுள்ளனர். "சென்னை அனுமதி' என்பதால், மகாலை நிர்வகிக்கும் தொல்லியல் துறை அதிகாரிகள், எதுவும் செய்ய முடியாமல் தவிக்கின்றனர். நஷ்டம் ஏற்பட்டால் அதற்குண்டான செலவுகளை சினிமா குழுவினர் ஏற்க வேண்டும் என்பது விதி. ஆனால் வசூலிப்பதில்லை. படப்பிடிப்பு முடிந்தவுடன் அனைத்து பகுதிகளையும் தூய்மைப்படுத்தி கொடுக்க வேண்டும் என்ற விதியையும் சினிமாகுழுவினர் மதிப்பதில்லை. மகாலில் படப்பிடிப்பு நடத்த அனுமதிக்கக்கூடாது என்று அரசுக்கு இங்குள்ள தொல்லியல் துறைஅதிகாரிகள் கடிதம் எழுதியும்பலனில்லை.முன்பு இங்கு படப்பிடிப்பு நடத்த கட்டணமாக ரூ.50 ஆயிரம் வசூலிக்கப்பட்டது. இதனால் மகால் பக்கம் வரவே சினிமாகாரர்கள் தயங்கினர். கடந்த தி.மு.க., ஆட்சியில், இக்கட்டணத்தை ரூ.5 ஆயிரமாக மாற்றியதே மகால் அழகு கெடுவதற்குகாரணம்.இங்கு படப்பிடிப்பு நடத்ததடை விதித்து, மகாலின்தொன்மையை காக்க வேண்டும்.
தினமலர்