நடாலை வீழ்த்தி சாம்பியன்; என் கனவு நனவானது -ஜோகோவிக்

ராமகிருஷ்ணன் · 18/06/2011

லண்டன், ஜூலை. 4-

கிராண்ட்சிலாம் போட்டிகளில் ஒன்றான விம்பிள்டன் டென்னிஸ் போட்டி லண்டன் நகரில் நடந்தது. நேற்று நடந்த ஆண்கள் ஒற்றையர் இறுதிப் போட்டியில் உலகின் நம்பர் ஒன் வீரரான ரபெல் நடால் (ஸ்பெயின்)- இரண்டாம் நிலை வீரரான நோவக் டிஜோகோவிக் (செர்பியா) மோதினார்கள்.

இதில் டிஜோகோவிக் 6-4, 6-1, 1-6, 6-3 என்ற செட் கணக்கில் நடாலை வீழ்த்தி முதல் முறையாக விம்பிள்டன் பட்டத்தை கைப்பற்றினார். டிஜோ கோவிக் வென்ற 3-வது கிராண்ட்சிலாம் பட்டம் ஆகும். அவர் ஆஸ்திரேலிய ஓபன் பட்டத்தை 2008, 2011-ம் ஆண்டில் வென்று இருந்தார்.

இந்த ஆண்டில் நடந்த 3 கிராண்ட்சிலாம் போட்டிகளில் ஆஸ்திரேலிய ஓபன், விம்பிள்டன் பட்டத்தை டிஜோகோவிக் பெற்றார். பிரெஞ்சு ஓபன் பட்டத்தை நடால் கைப்பற்றினார். இந்த ஆண்டின் கடைசி கிராண்ட்சிலாமான அமெரிக்க ஓபன் ஆகஸ்டு மாதம் நடக்கிறது.

விம்பிள்டன் பட்டத்தை முதல் முறையாக கைப்பற்றியது குறித்து டிஜோ கோவிக் கூறியதாவது:-

விம்பிள்டன் பட்டத்தை வெல்ல வேண்டும் என்பது சிறு வயதிலேயே கனவாக இருந்தது. அந்த கனவு தற்போது நனவானது. இந்த வெற்றி எனக்கு மிகுந்த மகிழ்ச்சியை அளித்துள்ளது. விம்பிள்டன் பட்டத்தை வென்ற இந்த நாள் எனது வாழ்க்கையில் மிகவும் சிறந்த நாள் ஆகும்.

இவ்வாறு அவர் கூறினார்.

11-வது கிராண்ட்சிலாம் பட்டத்தை தவறவிட்ட நடால் தோல்வி குறித்து கூறியதாவது:-

டிஜோகோவிக்கின் ஆட்டம் மிகவும் பிரமாதமாக இருந்தது. என்னால் வெற்றி பெறுவது என்பது முடியாததாக இருந்தது. எனது அனுபவம் எந்த வகையிலும் அவரை கட்டுப்படுத்தவில்லை. இந்த ஆட்டத்தில் நான் சில தவறுகள் செய்தேன்.

இவ்வாறு அவர் கூறினார்.

அப்துல்லாஹ் · அப்துல்லாஹ் Mon Jul 04, 2011 4:52 pm

அவர் என்ன தவறு செய்தார்? நிதானமிழந்தார். சமீப காலமாக நடால் அதிக உணர்ச்சிவசப் படுகிறார்.
ஜோகோவிச் நல்ல பாமில் உள்ளார். அவருடைய ஆட்டம் கண் கொல்லாக் காட்சி யாக இருந்தது...
திறமையாக ஆடிய ஜோகோவிச் சாம்பியன் ஆனது மனதுக்கு நிறைவாக இருந்தது...
பகிர்ந்தமைக்கு நன்றி ராமகிருஷ்ணன்...