காத்திருப்பதில் பயனில்லை - கெய்ல் முடிவு

பாலாஜி · பாலாஜி Sun 3 Jul 2011 - 0:44

தனது கிரிக்கெட் வாழ்வு குறித்து மேற்கிந்திய கிரிக்கெட் வாரியமும், ஜமைக்கா கிரிக்கெட் வாரியமும் பேச்சு நடத்தி எந்த முடிவையும் வெளியிடாததால் இனிமேல் காத்திருப்பதில் பயனில்லை என்றும் நடந்தவரை போதும் என்றும் தனது கிரிக்கெட் எதிர்காலத்தை தன்னை விரும்புவர்களிடத்தில் ஒப்படைக்க விரும்புவதாகவும் கிறிஸ் கெய்ல் தெரிவித்தார்.

மனமுடைந்த கிறிஸ் கெய்ல் தனக்கும் மேற்கிந்திய கிரிக்கெட் வாரியத்திற்கும் இடையே உள்ள மனக்கசப்பை பெரிய அறிக்கையாக வெளியிட்டுள்ளார். அதில் 2009ஆம் ஆண்டு முதலே தனக்கு எதிராக வாரிய நிர்வாகிகள் சதி வேலையைத் தொடங்கி விட்டனர் என்று கூறியுள்ளார்.

"நடந்தவரை அனைத்தும் போதும் என்ற முடிவுக்கு வந்து விட்டேன், ஜமைக்கா வாரியமும் மேற்கிந்தீய வாரியமும் கூடி என்னை விவாதித்தார்கள் என்பது தெரியும். யாரும் எதுவும் கூறவில்லை, இதனால் தீர்வு எதுவும் இல்லை என்ற முடிவுக்கு நான் வந்து விட்டேன்.

எனக்கு எதிரான குற்றச்சாற்றுகளுக்கு நான் பதிலளிக்கத் துவங்கினேன் என்றால் நான் வெஸ்ட் இண்டீஸ் கிரிக்கெட்டை சிதைப்பனவனாகக் கருதப்படுகிறேன்.

கிரிக்கெட்டில் என்னுடைய எதிர்காலம் இப்போது பிரச்சனையாக்கப்பட்டுள்ளது. எனக்கான காலம் இன்னும் சிறிது ஆண்டுகளே உள்ளன. இதனால் நான் என்னைப்பற்றி முடிவு செய்யும் நேரம் வந்து விட்டது. வெஸ்ட் இண்டீஸ் கிரிக்கெட்டிற்கு நான் தேவையில்லை என்றாகிவிட்டது. பிரச்சனையைத் தீர்ப்போம் என்ற பெயரில் நடந்தவையெல்லாம் வெறும் கேலிக்கூத்து. மக்களை ஏமாற்ற மேற்கிந்திய கிரிக்கெட் வாரியம் நடத்திய நாடகம்.

இந்தப் பின்னணியின் அடிப்படையில் இனிமேல் மேற்கிந்திய கிரிக்கெட் வாரியத்தின் முடிவுக்காக நான் கத்திருப்பதில் பயனில்லை என்ற முடிவுக்கு வந்துள்ளேன். இதனால் வேறு இடங்களில் எனது கிரிக்கெட் வாய்ப்புகளை எதிர்நோக்குகிறேன். நான் இதனை விரும்பிச் செய்யவில்லை. ஆனால் எனக்கும் வேறு வழியில்லை. என்னைப் பாதுகாக்க,என்னை வரவேற்க வேறு இடங்கள் உள்ளன.

ஆனாலும் இவையெல்லாவற்றையும் மீறி மீண்டும் எனது பிராந்தியத்திற்கும், எனது நாட்டுக்கும் நான் விளையாட முடியும் என்றே கருதுகிறேன்.

நான் மேற்கிந்திய கிரிக்கெட்டிற்கு உண்மையாக இல்லை என்று கூறுகிறார்கள். இது ஒரு கேவலமான குற்றச்சாற்று. நான் இலங்கைக்கு எதிராக 333 ரன்களைக் குவித்தது என்னுடைய அணிக்காகத்தான். மேற்கிந்திய அணியின் அழைப்பை நான் அலட்சியப்படுத்தவில்லை. மாறாக மேற்கிந்திய கிரிக்கெட் வாரியம்தான் என் விஷயத்தில் முகத்தைத் திருப்பிக் கொண்டது. என்னை அணியில் தேர்வு செய்யும் எண்ணமே அவர்களுக்கு இல்லை".

இவ்வாறு மனமுடைந்து கூறினார் கிறிஸ் கெய்ல்.

-வெப்துனியா