பல நூற்றாண்டுகளாய்...எங்களூர் ஸ்வாமி.

by **rameshnaga** Sun Jul 03, 2011 11:14 pm

நான் எங்களூரின் கோவிலுக்குப் போயிருந்தேன்.

தான் பிறந்த மண்ணை விட்டு வரமாட்டேன் -எனத் தன்
பாதி சிதிலமடைந்த பழைய வீட்டை மாற்ற அனுமதிக்காமல்
பிடிவாதம் பிடிக்கும் என் தாத்தனைப் போலவே
ஸ்வாமியும் இருந்தார் -ஒரு இடிந்த கோவிலுக்குள்.

நான் கும்பிடச் சென்ற போது.. எனது கடவுளின் தோளில்..
மரம் முளைத்திருந்தது.
அவரது இடுப்பை முத்தமிட்டபடி நகர்ந்தது ஒரு பாம்பு.
கால்களுக்குக் கீழே ..அவர் கொன்ற
கற்காலத்திய அசுரன் மல்லாந்த படி.
அசுரனின் சாபம்..அவர் கால்களைச் சிதைத்திருந்தது..
என்றாலும்-

பல நூற்றாண்டுகளாய்..மாறாத தன் புன்னகையோடு
இருந்தார் எங்களூர் ஸ்வாமி..
எல்லாக் கோவில்களிலும் இருக்கும் ஸ்வாமிகளைப் போலவே.