"ஸ்மைல் ப்ளீஸ்"

by **rameshnaga** Sat Jul 02, 2011 1:43 pm

அடுப்பில் எரிகிறது..
தாலி கட்டிக் கொண்ட விறகு.
**************************
நத்தை சுமக்கும் மூட்டையில்
வாழ்க்கையின் என்ன பாடம் இருக்கும்?
****************************
வானத்தில் சிறகின் ஓசை ..
கனவில் உணர்கிறது..
கூண்டுக்கிளி.
****************************
உனக்கு..
எனக்குப் பிடித்த கடவுளின் பெயரை வைத்தேன்..
நீ வளர்ந்த பிறகு ..
நினைவுக்கு வருவதில்லை அந்தக் கடவுள்.
***********************************
கால் இல்லை;வால் இல்லை;
தலை இல்லை; கண்ணும் இல்லை;
தரையில் புள்ளியாய் நகரும் இந்த எறும்பு..
எப்படி கண்டு பிடிக்கும் தான் தொலைத்த காதலியை?
***************************************
புகைப் படத்தில் அம்மா சிரிக்கிறாள்..
அதுவும் "ஸ்மைல் ப்ளீஸ்" என்றதால்.
****************************************
அம்மா நிலவைக் கூப்பிடுகிறாள்..
அமாவாசையிலும்..
குழந்தைக்குச் சோறூட்டிக் கொண்டே..
**************************************
பத்தாயத்தில்..
சேகரித்து வைக்கப் பட்ட நெல்லாய்..
கொட்டிக் கிடக்கிறது வார்த்தைகள்..
நான்
ஒரு எலியைப் போலத் திருடுகிறேன்.
************************************
வெளிச்சம் வந்த பிறகு..
அம்மாவின் "எழுந்திரு" அதட்டலுக்கு..
அப்புறம் "பறப்பதாய்" சொல்லிப் புரள்கிறது..
சிட்டுக் குருவி.
************************************
வான் ஓடையில் நக்ஷத்திரப் பூக்கள்..
காதலனைத் தொலைத்த "சகுந்தலை"யாய் நிலா....
அழுகிறது மழையாய்.
காலையில் பறவைகளாகி விடும் நக்ஷத்திரங்கள்
தினமும் தேடுகின்றன.. நிலவின் காதலனை பூமியிலும்.
************************************