ஊட்டியில் கன மழையால் வீடுகளில் வெள்ளம் புகுந்தது

ராமகிருஷ்ணன் · 18/06/2011

ஊட்டி : ஊட்டியில் நேற்று பெய்த கன மழையால் வீடுகளுக்குள் மழை நீர் புகுந்தது. நீலகிரி மாவட்டத்தில் கடந்த ஒரு மாதத்துக்கும் மேலாக பரவலாக மழை பெய்து வருகிறது. நேற்று காலை ஊட்டியில் 11 மணிக்கு மழை பெய்ய தொடங்கி, தொடர்ந்து 4 மணி நேரம் இடைவிடாமல் கொட்டி தீர்த்தது. இதனால், ஊட்டியில் இருந்து குன்னூர் செல்லும் சாலையில் சேரிங்கிராஸ் பகுதியில் மழை நீர் ஆறு போல பெருக்கெடுத்து ஓடியது. சிறிய ரக வாகனங்களை இயக்க முடியவில்லை. பெரும்பாலான இரு சக்கர வாகனங்கள் நீரில் இழுத்துக் செல்லப்பட்டன.

கோடப்பமந்து கால்வாயில் தண்ணீர் பெருக்கெடுத்து ஓடியதால் கிரீன்பீல்டு பகுதிகளில் உள்ள சில வீடுகளில் மழை நீர் புகுந்தது. இதேபோல் கோத்தகிரி சாலையில் சேரிங்கிராஸ் பாலத்தில் பாலம் கட்டும் பணிகள் நடந்து வருகிறது. பாலத்தில் தண்ணீர் செல்ல முடியாத நிலையில் அங்கு தாழ்வான பகுதியில் இருந்த வீடுகளுக்குள் மழை நீர் புகுந்தது. கோடப்பமந்து அம்பேத்கார் காலனி பகுதியில் மண் சரிவு ஏற்பட்டது. லோவர் பஜார், மத்திய பஸ் நிலையம், மைசூர் சாலை, படகு இல்லம் சாலையிலும் மழை நீர் தேங்கி நின்றதால் வாகனங்கள் செல்ல முடியாமலும், பொதுமக்கள் மற்றும் சுற்றுலா பயணிகள் நடந்து செல்ல முடியாமல் கடும் அவதிக்குள்ளாகினர்.

கன மழை காரணமாக மினி கார்டனில் மழை நீர் புகுந்தது. அங்கு சுற்றுலா பயணிகள் விளையாட முடியாத நிலை ஏற்பட்டது. படகு இல்லத்தில் துடுப்பு, மிதிபடகு மற்றும் மோட்டார் படகுகள் இயக்கப்படவில்லை. ரோஜா பூங்கா, தாவரவியல் பூங்கா போன்றவையும் மழை காரணமாக சுற்றுலா பயணிகள் வருகை குறைந்து வெறிச்சோடி காணப்பட்டன.

ஊட்டியில் கன மழையால் வீடுகளில் வெள்ளம் புகுந்தது

ஊட்டியில் கன மழையால் வீடுகளில் வெள்ளம் புகுந்தது

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக