இந்திய ராணுவத் தளபதி, பிறக்கும்போதே அதிரடி!

நீதித்துறையின் பரிந்துரை ஒன்று, இந்திய பாதுகாப்பு அமைச்சை சங்கடமான
நிலைமைக்குத் தள்ளியுள்ளது. அப்படியென்ன விசித்திரமான பரிந்துரை? இந்திய
ராணுவத் தளபதி வி.கே. சிங்கின் நிஜமான பிறந்த தேதி, மே 10, 1950 என்று
உறுதி செய்திருக்கின்றது இந்திய நீதித்துறை.
ராணுவத் தளபதியோ, தான் அதைவிட 1 வயது இளமையானவர் என்று கூறிக்கொள்கிறார்.
இந்திய ராணுவத்தின் ரெக்கார்டுகளில் தற்போதைய ராணுவத் தளபதியின் பிறந்த
தேதியென்று இரு வெவ்வேறு பதிவுகள் உள்ளன. ஒரு பதிவின்படி ராணுவத் தளபதி,தற்போது நீதித்துறையால் உறுதிப்படுத்தப்பட்டுள்ள 1950ம் ஆண்டில் பிறந்தவர்.
மற்றொரு பதிவின்படி அவரது பிறந்த தேதி, சரியாக 1 வருடம் தாமதமாக,
மே 10, 1951! இந்த இரண்டாவது (இளமையான) பிறந்த தேதிதான் தன்னுடையது என்கிறார் ராணுவத்தளபதி. அதன்படி அவரது பதவிக் காலம், 2013ம் ஆண்டுவரை நீடிக்கும். ஆனால், நீதியமைச்சு உறுதிப்படுத்தியுள்ள முதலாவது பிறந்த தேதியின்படி தளபதி, மே 31, 2012ல் ஓய்வுபெற வேண்டியிருக்கும்.
பாதுகாப்பு அமைச்சுக்கு தற்போது ஏற்பட்டுள்ள பெரிய தலைவலி, இவரை எந்த வருடத்தில் வீட்டுக்கு அனுப்புவது என்பதே!
ராணுவத் தளபதி சிங், 1970ம் ஆண்டில் இந்திய ராணுவத்தில் பணியில்
சேர்ந்திருந்தார். இந்திய ராணுவத்தில் வேலைக்காக அவர் விண்ணப்பித்த
விண்ணப்பப் படிவத்தில் பிறந்த தேதி கேட்கப்பட்டிருந்தது. அதில் பதிவு
செய்யப்பட்டுள்ளது 1950ம் ஆண்டு பிறந்த தேதி.அதன்பின் சிங் இடையில் கொண்டுவந்து இணைத்துக்கொண்டது, 1951ம் ஆண்டு பிறந்த தேதி.
ராணுவத்தின் பதிவுகளில் இவருக்கு இரண்டு பிறந்த தேதிகள் இருப்பது, 2006ம் ஆண்டுவரை யாராலும் கண்டுபிடிக்கப்படவில்லை.
இதற்கிடையே மற்றொரு விவகாரமும் நடந்துள்ளது.
தளபதி சிங்குக்கு 3 தடவைகள் ராணுவத்தில் பதவி உயர்வுகள்
கொடுக்கப்பட்டுள்ளன. இந்திய ராணுவத்தில் பதவியுயர்வுகளுக்கு, சர்விஸ்
வருடங்களும், அத்துடன் வயதும் கணக்கில் எடுத்துக் கொள்ளப்படும். அதன்படி
இவருக்குக் கொடுக்கப்பட்ட 3 பதவி உயர்வுகளும் இவர் 1950ல் பிறந்தவர் என்ற
அடிப்படையிலேயே கொடுக்கப்பட்டவை.
அப்போதெல்லாம் எதுவும் பேசாமல் பதவியுயர்வை பெற்றுக்கொண்ட தளபதி சிங், இப்போது ஓய்வுபெறும் காலம் நெருங்கிய நிலையில் தான் 1950ல் பிறந்தவரல்ல என்கிறார்.
இவர் தற்போது கூறுவதுபோல 1951ல் பிறந்திருந்தால், அவருக்குக் கிடைத்த 3
பதவியுயர்வுகளும் கிடைத்திருக்காது. இவரும் ராணுவத் தளபதியாக வந்திருக்க
முடியாது.இந்த பிறந்த தேதி குழப்பம் பற்றிய விசாரணை ஒன்று ராணுவ மட்டத்தில் நடைபெற்றது. அப்போது கேட்கப்பட்ட ஒரு கேள்வி – “உங்களுடைய நிஜமான பிறந்த தேதி 1951ல் என்றால், ராணுவத்தில் வேலை கேட்டு விண்ணப்பித்தபோது, அப்ளிகேஷன் பார்மில் ஏன் 1950ம் ஆண்டு என்று எழுதினீர்கள்?”
நியாயமான கேள்விதான். இல்லையா?
இந்தக் கேள்விக்கு தளபதி சிங் கூறிய பதில்தான் தமாஷானது. “அப்ளிகேஷன்
பார்மை நான் நிரப்பவில்லை. எனது பள்ளி ஆசிரியர்தான் எனக்காக
விண்ணப்பித்தார். நான் சும்மா கையொப்பம் மாத்திரம் இட்டேன்” என்பதே அவரது
பதில்.
உலகின் 4வது பெரிய ராணுவம், இந்திய ராணுவம். அதன் பிரதம தளபதி, தனது
விண்ணப்பப் படிவத்தை பள்ளி ஆசிரியர் நிரப்பிக் கொடுத்தார் என்று கூறுவதை
ஏற்றுக்கொள்ள, நீதித்துறை தயாராக இல்லை.
தளபதியின் பள்ளி ஆசிரியர் கதையை நிராகரித்து குறிப்பு எழுதியிருக்கிறது, நீதித்துறை.
நீதித்துறையின் சொல்லைக் கேட்பதா, தளபதியின் பேச்சை நம்புவதா என்று தலையை உடைத்துக் கொண்டிருக்கிறது பாதுகாப்பு அமைச்சு.

சினிமாவில், கிட்டத்தட்ட இவரது வயதிலுள்ள ஆட்கள் கல்லூரி மாணவர்களாக
நடிக்கும் ஒரு நாட்டில், பாவம், இந்தத் தளபதியை இளமையாக வாழ விடுகிறார்கள் இல்லையே!

நன்றி:விறுவிறுப்பு