போதை மருந்து சாப்பிட்டு கும்மாளம்: நடிகர் வினோத்கன்னா மகன் கைதாவாரா?

பிரபல இந்தி நடிகர் வினோத்கன்னா. நடிப்பில் கொடிகட்டி பறந்த இவர் திடீரென்று நடிப்புக்கு முழுக்குப் போட்டு ரஜினிஷ் ஆசிரமத்தில் சேர்ந்து பரபரப்பை ஏற்படுத்தினார்.

இவரது மகன் சாக்ஷி கன்னா மும்பையில் வசித்து வருகிறார். இவர் கடந்த ஞாயிற்றுக்கிழமை மும்பை காலாப்பூரில் உள்ள புகழ்பெற்ற கேளிக்கை விடுதியான மவுன்ட்வியூ ரிசார்ட்டில் நடந்த விருந்தில் கலந்து கொண்டார். இதில் 300-க்கும் மேற்பட்ட இளைஞர்களும், இளம்பெண்களும் கலந்து கொண்டனர்.

அப்போது போதை மருந்து சாப்பிட்டு அவர்கள் ஆட்டம், பாட்டு என்று கும்மாளம் அடிப்பதாக போலீசுக்கு புகார் வந்தது. உடனே போலீசார் சென்று திடீர் சோதனை நடத்தினார்கள். அப்போது போதை மயக்கத்தில் இருந்த சாக்ஷிகன்னாவையும் 300 இளைஞர்களையும் பிடித்துச் சென்றனர். அவர்கள் மீது வழக்குப்பதிவு செய்யப்பட்டது.

அந்த விடுதியில் பல்வேறு வகையான கொடிய போதை மருந்துகளும், ரூ.3.08 லட்சம் ரொக்கமும் சிக்கியது. இதையடுத்து பிடிபட்ட சாக்ஷி கன்னா உள்பட 300 பேரும் ரத்த மாதிரி மற்றும் சிறுநீர் பரிசோதனைக்கு உட்படுத்தப்பட்டனர். ரத்த மாதிரி மும்பை கலினாவில் உள்ள ஆய்வு கூடத்துக்கு அனுப்பி வைக்கப்பட்டன. பரிசோதனை முடிவு அடுத்த வாரம் கிடைக்கும்.

இதில் அவர்கள் போதை மருந்து சாப்பிட்டது உறுதி செய்யப்பட்டால் சாக்ஷி கன்னா கைது செய்யப்படுவார் என்று போலீஸ் அதிகாரி ஒருவர் தெரிவித்தார்.

இந்த போதை விருந்தை நடத்தியவர்களில் ஒருவரான விக்கிஷா தப்பி ஓடி விட்டார். அவரை போலீசார் தேடி வருகிறார்கள். சஸ்பெண்டான போலீஸ் இன்ஸ்பெக்டர் அனில் ஜாதவ் என்பவரும் இந்த விருந்தில் கலந்து கொண்டுள்ளார். அவரும் பிடிபட்ட சாக்ஷி கன்னா உள்பட 300 இளைஞர்களும் போலீஸ் காவலில் வைக்கப்பட்டுள்ளனர்.

மாலை மலர்