ஸ்பெக்ட்ரம் ஊழல்: சி.பி.ஐ. குற்றப்பத்திரிகை தயாரிப்பில் தாமதம்

by தாமு Thu Jun 30, 2011 4:20 pm

புதுடெல்லி, ஜூன். 30-

2ஜி ஸ்பெக்ட்ரம் ஒதுக்கீடு ஊழலில் அரசுக்கு ரூ.1.76 லட்சம் கோடி இழப்பு ஏற்படுத்தப்பட்டது தொடர்பாக சி.பி.ஐ. விசாரணை நடத்தி வருகிறது. இதுவரை 2 குற்றப்பத்திரிகைகள் தாக்கல் செய்யப்பட்டுள்ளன.

ஸ்பெக்ட்ரம் ஒதுக்கீட்டில் முறைகேடு செய்து பயன் அடைந்ததாக முன்னாள் மத்திய மந்திரி ஆ.ராசா, கனிமொழி எம்.பி., கலைஞர் தொலைக்காட்சி நிர்வாக இயக்குனர் சரத்குமார், சுவான் டெலிகாம் ஷாகி பல்வா, தொலை தொடர்புத் துறை முன்னாள் செயலாளர் சித்தார்த் பெகுரா உள்பட 14 பேர் கைது செய்யப்பட்டு டெல்லி திகார் ஜெயிலில் அடைக்கப்பட்டுள்ளனர்.

இவர்கள் மீதான விசாரணை டெல்லியில் உள்ள சி.பி.ஐ. சிறப்பு கோர்ட்டில் நடந்து வருகிறது. தற்போது சி.பி.ஐ. கோர்ட்டுக்கு கோடை விடுமுறை விடப்பட்டுள்ளது. வரும் திங்கட்கிழமை (4-ந் தேதி) முதல் மீண்டும் விசாரணை நடைபெற உள்ளது. அதன் பிறகு ஸ்பெக்ட்ரம் விவகாரம் மீண்டும் சூடு பிடிக்கும் என்று எதிர்பார்க்கப்படுகிறது.

இதற்கிடையே 3-வது குற்றப்பத்திரிகையை தயாரிக்கும் பணியில் சி.பி.ஐ. அதிகாரிகள் தீவிரமாக ஈடுபட்டுள்ளனர். சில தனியார் தொலைத் தொடர்பு நிறுவனங்கள் பற்றி இந்த குற்றப் பத்திரிகையில் குற்றச்சாட்டுகள் இடம் பெறும் என்று எதிர்பார்க்கப்படுகிறது. இது தவிர ஸ்பெக்ட்ரம் ஊழலை முதன் முதலாக தொடங்கி வைத்த ஒரு முக்கியப் புள்ளி பற்றியும் 3-வது குற்றப்பத்திரிகையில் தகவல்கள் இடம் பெறும் என்று தெரிகிறது.

அடுத்த மாதம் முதல் வாரத்தில் இந்த குற்றப்பத்திரிகையை தாக்கல் செய்யும் வகையில் தயாரிப்பு பணிகள் நடந்து வந்தது. திடீரென அந்த பணிகளில் முட்டுக்கட்டை ஏற்பட்டுள்ளது. எனவே சி.பி.ஐ.யின் 3-வது குற்றப்பத்திரிகை குறிப்பிட்ட காலத்துக்குள் தாக்கல் செய்யப்பட முடியாமல் தாமதம் ஏற்படலாம் என்று தெரிய வந்துள்ளது.

லூப் டெலிகாம் நிறுவனத்துக்கும் எஸ்ஸார் நிறுவனத்துக்கும் ஸ்பெக்ட்ரம் தொடர்பாக தொடர்பு இருப்பதாக கூறி சி.பி.ஐ. விசாரணை நடத்தியது. லூப் டெலிகாம் நிறுவனம் எஸ்ஸார் பெயரில் முதலீடு செய்திருப்பதாக கூறி அமலாக்கப் பிரிவும் விசாரணை நடத்தியது.

இந்த தகவல்களை குற்றப்பத்திரிகையில் சேர்க்க ஏற்பாடு செய்யப்பட்டிருந்தது. இந்த நிலையில் கம்பெனி விவகாரங்களுக்கான அமைச்சகம் லூப் டெலிகாம் நிறுவனத்துக்கும், எஸ்ஸார் நிறுவனத்துக்கும் பண பரிமாற்றங்களில் தொடர்பு இல்லை என்று அதிகாரப்பூர்வமாக அறிவித்துள்ளது. இதையடுத்து குற்றப்பத்திரிகையில் சிறு மாற்றம் செய்ய சி.பி.ஐ. தீர்மானித்துள்ளது. இதன் காரணமாக 3-வது குற்றப்பத்திரிகை தாக்கல் செய்யப்படுவது தள்ளிப் போய் உள்ளது

மாலை மலர்