தி.மு.க. ‘அண்ணன்’ கோவையில் பதுங்கினார்!

by தாமு Thu Jun 30, 2011 4:12 pm

கோவை, இந்தியா: ஆட்சி மாற்றத்தோடு முன்னாள் பெருச்சாளிகள் பலருக்குக் கெட்டகாலம் தொடங்கியிருக்கின்றது. சட்டத்தின் வலைக்குள் இவர்கள் ஒவ்வொருவராக வந்து விழத் தொடங்கியுள்ளனர். இந்த வலை முதலில் இறுகத் தொடங்கியிருப்பது கோவையில்தான்!

கோவையில் நிலம், சொத்து அபகரிப்பு குற்றங்களில் ஈடுபட்டதாக கூறப்படும் 12 நபர்களின் பட்டியலை தயாரித்துள்ளனர் போலீசார். இந்த அபகரிப்புகள் கடந்த தி.மு.க. ஆட்சிக்காலத்தில் நடைபெற்றுள்ளன. பட்டியலிலுள்ள ஆட்களில் சிலர், தி.மு.க. செல்வாக்குடன் கல்லா கட்டியவர்கள். வேறு சிலர், முன்னாள் அமைச்சர் ஒருவரின் பினாமிகள்.

இவர்கள் மீது போலீஸின் பார்வை விழுந்துள்ள விஷயம் பற்றி ஏற்கனவே விறுவிறுப்பு.காமில், கோவை ‘கில்லாடி’ கிடுக்கிப்பிடியில்! என்ற தலைப்பில் செய்தி வெளியிட்டிருந்தோம். அதைப் படிக்காதிருந்தால், ஒருமுறை படித்துவிடுங்கள்.

கைதுகளுக்கு முதல் போணியாக, மாவட்ட தி.மு.க. துணைச் செயலாளர் ஆனந்தன் கைது செய்யப்பட்டுள்ளார். இவரது தொழில் அரசியல் மாத்திரமல்ல, ரியல் எஸ்டேட் வர்த்தகமும் உண்டு. கோவையில் பண்ணை வீட்டுமனை திட்டம் என்று தொடங்கியவர் இவர்.

கடந்த ஆட்சியில் கோவையில் ஒரு கலக்குக் கலக்கிக்கொண்டிருந்த கிரீன் ஹோம் லேண்ட்ஸ்கேப் என்ற நிறுவனம், இவருடையதுதான்.

நில அபகரிப்பு அல்லது மோசடி குற்றச்சாட்டில் கோவையில் கைதாகியுள்ள முதல் தி.மு.க. பிரமுகர்என்ற பெருமையை இவர் பெறுகின்றார். கைதுகளின் தொடக்கமே சில்லரை ஆட்களில் தொடங்காமல், மாவட்ட தி.மு.க. துணைச் செயலாளரில் தொடங்கியிருக்கிறார்கள் கோவை போலீஸார்.

இதனால், தி.மு.க. பதவிகளில் இவருக்கு மேலும், கீழுமுள்ள ஆட்கள் வெலவெலத்துப் போயுள்ளனர்.

மாவட்ட தி.மு.க.வில் இவரைவிடக் குறைந்த பதவிகளில் இருந்தவர்கள், “அண்ணனிலேயே கைவைத்து விட்டார்கள். நாம எம்மாத்திரம்?” என்று நடுங்குகிறார்கள். இவரைவிடப் பெரிய பதவிக்காரர்கள், “இந்தாளைக் கைது செய்துவிட்டதால், அடுத்து இவரைவிட பெரிய ஆட்களிடம்தான் வருவார்கள்” என்று பதுங்குகின்றார்கள்.

மொத்தத்தில், கோவை மாவட்ட தி.மு.க.வே இந்த விவகாரத்தில் கலகலத்துப் போயுள்ளது.

கோவை மாவட்ட தி.மு.க. வட்டங்களுடன் உங்களுக்குப் பரிச்சயம் இருந்தால், ‘மீன்கடை’ மாயாவி என்று அழைக்கப்பட்ட நபரை உங்களுக்குத் தெரிந்திருக்கலாம். மாயாவி என்று கட்சிக்காரர்களால் இவர் சொல்லப்படுவதன் காரணம், அரசு அலுவல்களில் முடியாத விஷயங்களை முடித்துக் கொடுக்கக்கூடியவர். மீன்கடை என்பது பட்டப்பெயர்.

இவரால் காரியங்கள் எப்படி முடிகின்றன என்ற கேள்விக்கு, கோவை தி.மு.க.வினரின் பதில், “அண்ணன், அமைச்சரோட அவ்வளவு க்ளோஸ்” என்பதே!

தற்போது, ‘அண்ணனின்’ அமைச்சரின் பதவியே க்ளோஸ்! மீன்கடை அண்ணன் கைதாவதற்கு, மிக க்ளோஸ் ரேஞ்சில் வந்திருக்கிறார்!

இந்த மீ.மா. அண்ணனின் பெயர்தான் அடுத்துக் கைதாக வேண்டியவர்கள் பட்டியலில் முதலிடத்தில் இருப்பதாகச் சொல்கிறார்கள். அண்ணன் இப்போதெல்லாம் அதிகமாக வெளியே தலைகாட்டுவதில்லை.

கோவை போலீஸில், நில ஆக்கிரமிப்பு தொடர்பான பழைய விவகாரங்களை கிளறி எடுப்பதற்கு தனி டீம் ஒன்று அமைக்கப்பட்டுள்ளது.

அவர்களும் விபரமாகத்தான் செயற்படுகிறார்கள். எப்படியென்றால், எந்தவொரு நில விவகாரத்தையும் லோக்கல் போலீஸ் ஸ்டேஷனில் விசாரிக்க அனுமதிப்பதில்லை. புகார்கள், ஆதாரங்கள் அனைத்தும் இந்த தனி டீமின் மேஜைக்கு நேரில் வந்துவிடுகிறது.

லோக்கல் போலீஸ் ஸ்டேஷன்களில் இன்னமும் பழைய விசுவாசிகள் பணியில் இருக்கலாம் என்ற முன்னெச்சரிக்கையே இதற்குக் காரணம்.

கோவையில் காரியங்கள் எக்ஸ்பிரஸ் வேகத்தில் முடுக்கி விடப்பட்டுள்ளன. தி.மு.க. புள்ளிகளுக்கு இப்போதெல்லாம் கட்சி வேலைகளைக் கவனிக்க நேரமில்லை (அக் கட்சியின் தலைவருக்கே கட்சி வேலைகளைக் கவனிக்க நேரமில்லை என்பது, வேறு ஒரு சோகக் கதை!) தங்களைக் காப்பாற்றிக் கொள்வது எப்படி என்பதை ஆராய்வதிலேயே பிசியாக இருக்கிறார்கள்.

Tailpiece: தி.மு.க., பொதுக்குழுக் கூட்டம், அடுத்த மாதம் 23 மற்றும் 24ம் தேதிகளில், கோயம்புத்தூரில் நடைபெற உள்ளது.

vivi