என்ஜினீயரிங் கவுன்சிலிங்: விளையாட்டு பிரிவில் மாணவி அனகா முதல் இடம்

மருத்துவம் மற்றும் என்ஜினீயரிங் கவுன்சிலிங் விளையாட்டு, சிறப்பு பிரிவினருக்கு இன்று கவுன்சிலிங் நடந்தது.

அரசு, அரசு உதவி பெறும், சுயநிதி பொறியியல் கல்லூரிகளில் உள்ள அரசு ஒதுக்கீட்டு இடங்களுக்கான மாணவர் சேர்க்கை கலந்தாய்வு மூலம் நிரப்பப்படுகிறது. சுமார் ஒரு லட்சத்து 20 ஆயிரம் அரசு ஒதுக்கீட்டு இடங்கள் நிரப்பப்படுகின்றன.



முதல் கட்ட கலந்தாய்வு இன்று (வியாழக்கிழமை) தொடங்கியது. விளையாட்டு வீரர்களுக்கு ஒதுக்கக்கூடிய 100 இடங்களுக்கு கலந்தாய்வு நடைபெற்றது. 3457 பேர் விண்ணப்பித்து இருந்ததில் 350 பேர் மட்டும் சான்றிதழ் சரிபார்ப்பதற்கு அழைக்கப்பட்டனர். கடந்த 2 நாட்களாக சான்றிதழ்கள் சரிபார்க்கப்பட்டது.

விளையாட்டு வீரர்- வீராங்கனைகளுக்கான இடஒதுக்கீட்டில் நாகர்கோவிலைச் சேர்ந்த “ஸ்குவாஸ்” வீராங்கனை அனகா அலங்காமோனி முதல் இடம் பெற்றார். இவர் எஸ்.எஸ்.என். கல்லூரியில் கம்ப்யூட்டர் என்ஜினீயரிங் படிப்பை தேர்வு செய்தார்.

2-வது இடம் பிடித்த வீராங்கனை மோகனப் பிரியா எம்.பி.பி.எஸ். படிப்பை தேர்வு செய்தார். 3-வது இடம் பிடித்த விளையாட்டு வீரர் உசைன் சென்னை கிண்டி அரசு என்ஜினீயரிங் கல்லூரியில் மெக்கானிக் பிரிவை தேர்வு செய்தார். 4-வது இடம் பிடித்த “செஸ்” வீராங்கனை சவீதா கிண்டி அரசு கல்லூரியில் இ.சி.இ. என்ஜினீயரிங் பிரிவையும், 5-வது இடம் பிடித்த விளையாட்டு வீரர் அமுதராஜ் “மெக்கானிக்கல்” படிப்பையும் தேர்ந்து எடுத்தனர்.

தேர்வு ஆன விளையாட்டு வீரர்கள், வீராங்கனைகள் என்ஜினீயரிங் கல்லூரிகளில் சேருவதற்கான சான்றிதழ்களை அண்ணா பல்கலைக் கழக துணைவேந்தர் மன்னர் ஜவகர் வழங்கினார்.

முதல் இடம் பிடித்த வீராங்கனை அனகாவுக்கு எம்.பி.பி.எஸ். படிப்புக்கும் இடம் கிடைத்தது. என்றாலும் என்ஜினீயரிங் படிப்பையே தேர்வு செய்துள்ளார். இதுகுறித்து அவர் கூறியதாவது:-

எனக்கு விளையாட்டு துறையில்தான் ஆர்வம் அதிகம். அரசு கல்லூரியில் எம்.பி.பி.எஸ். படிப்பில் சேர்ந்தால் விளையாட்டு துறையில் ஈடுபட வாய்ப்பு கிடைக்காது. எனவே கம்ப்யூட்டர் என்ஜினீயரிங் பிரிவை தேர்வு செய்து இருக்கிறேன்.

இவ்வாறு அனகா கூறினார்.

அண்ணா பல்கலைக்கழக துணைவேந்தர் மன்னர் ஜவகர் நிருபர்களிடம் கூறியதாவது:-

விளையாட்டு வீரர்களுக்கான என்ஜினீயரிங் கவுன்சிலிங் இன்றுடன் முடிந்தது. என்றாலும், இதில் பங்கேற்க முடியாத விளையாட்டு வீரர்கள், வீராங்கனைகள் பொது “கவுன்சிலிங்”கிலும் கலந்து கொள்ளலாம்.

இவ்வாறு அவர் கூறினார்.

நாளை (1-ந்தேதி) முதல் 6-ந்தேதிவரை தொழில் பிரிவு மாணவர்களுக்கு கலந்தாய்வு நடைபெறுகிறது. 7-ந்தேதி மாற்றுத்திறனாளிகளுக்கான கவுன்சிலிங் நடக்கிறது. 8-ந்தேதி முதல் பொதுப் பிரிவினருக்கான கவுன்சிலிங் தொடங்குகிறது.

200-க்கு 200 கட்- ஆப் மதிப்பெண் பெற்று ரேங்க் பட்டியலில் முதல் 10 இடங்களை பிடித்த மாணவ-மாணவிகளுக்கு ஒதுக்கீட்டு இடத்திற்கான கடிதத்தை அமைச்சர் பழனியப்பன் வழங்குகிறார்.

மாலை மலர்

சூப்பர்