ஹசாரேயை சந்திக்க சோனியாவுக்கு நேரம் இல்லை

புதுடில்லி: ஊழலுக்கு எதிராக போர்க்குரல் கொடுத்து வரும் தியாகி அன்னா ஹசாரே லோக்பால் விவகாரம் தொடர்பாக பல்வேறு அரசியல் தலைவர்களுடன் சந்தித்து ஆதரவு திரட்டி வருகிறார். இந்நிலையில் காங்., தலைவர் சோனியாவை இன்று சந்திக்க நேரம் கேட்டும் இதுவரை எந்த ஒரு நேரத்தையும் அவர் ஒதுக்கி தரவில்லை. இதனால் ஹசாரே குழுவினர் அதிருப்தி அடைந்துள்ளனர்.

லஞ்ச ஒழிப்பு நடவடிக்கை தொடர்பான லோக்பால் மசோதா நிறைவேற்றுவதில் கால தாமதம் செய்யக்கூடாது, முக்கிய மாற்றங்கள் கொண்டு வருவது உள்ளிட்டவைகளை வலியுறுத்தி உண்ணாவிரதம் துவக்கிய பின்னர் மத்திய அரசு கையை பிசக்கி கொண்டது. இதனையடுத்து செய்ய வேண்டிய காரியங்களை செய்து தருகிறோம் என அரசு அடிபணிந்தது. இன்னொரு பக்கம் , கறுப்பு பணம் கொண்டு வருவது தொடர்பாக சாகும் வரை உண்ணாவிரதம் இருந்த யோகாகுரு பாபா ராம்தேவை போலீஸ் துணையுடன் மத்திய அரசு அடக்கி கொண்டது.

இந்த மசோதா தொடர்பான விவாதங்களை பகிர்ந்து கொள்ள வரும் 3 ம் தேதி அனைத்துக்கட்சி கூட்டத்திற்கு மத்திய அரசு அழைப்பு விடுத்திருக்கிறது. இந்த கூட்டத்தில் ஒருமித்த கருத்தை உருவாக்க வலியுறுத்தப்பட வேண்டிய விஷயங்கள் குறித்து அனைத்துக்கட்சியினர் ஆதரவு கேட்டு ஹசாரே முக்கிய தலைவர்களை சந்தித்து வருகிறார். சோனியாவை இன்று சந்திக்க நேரம் கேட்டுள்ளார் ஹசாரே. ஆனால் அவர் இவரை சந்திக்க இதுவரை நேரம் ஒதுக்கவில்லை.

காங்கிரஸ் உயர்மட்டக்குழு கூட்டத்தில் லோக்பால் மசோதா நிறைவேற்றம் தொடர்பாக எடுக்கப்பட்ட முடிவுகளை ஏற்கனவே ஹசாரே குழுவிடம் தெரிவித்து விட்டோம். இதற்கிடையில் இந்த சந்திப்பு தேவையற்றது என கருதுவதாக காங்., வட்டாரம் கூறுகிறது. சோனியா சற்று பிசியாக இருப்பதாகவும் கூறப்படுகிறது.
தினமலர்