தமிழகத்தின் புதிய கவர்னர் யார்? பதவியைப் பிடிக்க 3 பேர் மும்முரம்

by **சிவா** Thu Jun 30, 2011 7:42 am

தமிழகத்தின் புதிய கவர்னர் யார் என்ற பரபரப்பு டில்லியில் கிளம்பியுள்ளது. தமிழகத்தின் கவர்னர் பொறுப்புக்கு வருவதற்கு பலரும் கடும் முயற்சியில் இறங்கியுள்ள நிலையில், மூன்று பேரின் பெயர்கள் உள்துறை அமைச்சகத்தின் தீவிர பரிசீலனையில் இருப்பதாக தெரிகிறது. விரைவில் புதிய கவர்னர் பற்றிய அறிவிப்பு வெளியாகும் என எதிர்பார்க்கப்படுகிறது.

தமிழக கவர்னர் சுர்ஜித்சிங் பர்னாலா. பஞ்சாப் மாநிலத்தைச் சேர்ந்தவரான இவர், சிரோன்மணி அகாலிதள கட்சியின் தலைவராக இருந்தவர். பஞ்சாப் மாநிலத்தின் முதல்வராகவும், மத்திய அரசில் அமைச்சராகவும் பதவி வகித்த இவர், தமிழகத்தின் கவர்னராக 1990-91ல், ஏழு மாதங்கள் மட்டும் இருந்தார். அப்போதைய தி.மு.க., அரசை கலைப்பதற்கு எதிர்ப்பு தெரிவித்து, அது குறித்த அறிக்கையை அனுப்ப இவர் மறுத்தார்.அதன் பிறகு, பீகார் மாநில கவர்னராக அனுப்பப்பட்டார். பிறகு புதிதாக உருவாக்கப்பட்ட உத்ரகண்ட் மாநிலத்திற்கு முதல் கவர்னராகவும் இருந்தார். 2000 - 2003 வரை அங்கு கவர்னராக இருந்துவிட்டு, ஆந்திர மாநிலத்திற்கு கவர்னராக ஆனார். அதன்பிறகு, 2004ம் ஆண்டு நவம்பர் 3ம் தேதி, தமிழகத்தின் கவர்னராக பொறுப்பேற்றார். சமீபத்தில் இவரது பதவிக் காலம் முடிந்தது. எனினும், புது கவர்னர் நியமிக்கப்படாததால் பர்னாலாவே, கவர்னராக தொடர்ந்து பதவி வகித்து வருகிறார். இதனால், இவர் எப்போது வேண்டுமானாலும் மாற்றப்படலாம் என்ற நிலையே இருந்து வருகிறது. அ.தி.மு.க., ஆட்சி பொறுப்புக்கு வந்துள்ளதால் அரசியல் கால சூழ்நிலைகளும் மாறியுள்ளதை கணக்கில்வைத்து, அதற்கு ஏற்ற வகையில் கவர்னர் நியமனம் இருக்க வேண்டுமென காங்கிரஸ் கருதுவதாக தெரிகிறது.

தமிழகத்தின் கவர்னர் பொறுப்புக்கு வருவதற்கு, முக்கிய தலைவர்கள் பலரும் முயற்சி செய்து வருகின்றனர். அதில் முக்கியமாக மார்க்ரெட் ஆல்வாவின் பெயர் அடிபடுகிறது. உத்ரகண்ட் மாநில கவர்னரான இவர், காங்கிரஸ் கட்சியின் மூத்த தலைவர்களில் ஒருவர். சோனியாவுடனும் நெருக்கமானவர். தென்மாநிலங்கள் ஏதாவது ஒன்றில் கவர்னர் பொறுப்பு வகிக்க வேண்டுமென்பது ஆல்வாவின் நீண்டநாள் ஆசை. மகாராஷ்டிராவில் கவர்னர் பதவி காலியானபோதுகூட அங்கு வருவதற்கு மிக கடுமையாக ஆல்வா முயற்சி செய்தார்.தமிழகத்தில் பர்னாலாவுக்கு அடுத்தபடியாக அந்த பதவியை, தான் கைப்பற்ற வேண்டுமென டில்லியில் தீவிரமாக களம் இறங்கியுள்ளார். முதல்வர் ஜெயலலிதாவின் மிக நெருக்கமான நட்பையும் இவர் பெற்றிருப்பவர் என்பதால், காங்கிரசும் இவரது பெயரை முக்கியமாக பார்க்கிறது. எதிர்வரும் நாட்களில் அரசியல் மாற்றங்கள் ஏற்படும்போது, அதற்கு ஏற்ற வகையில் ஜெயலலிதாவுடன் உறவுகளை புதுப்பித்துக் கொள்ளவோ, மேம்படுத்துவதற்கோ மார்க்ரெட் ஆல்வா வசதியாக இருப்பார் என்ற நோக்கில், இவரை நியமிக்கலாமா என்று காங்கிரஸ் நினைக்கிறது.

அடுத்து, ஆந்திர முதல்வராக இருந்த ரோசய்யாவின் பெயர் அடிபடுகிறது. இவரிடம் இருந்த ஆந்திர மாநில முதல்வர் பதவியை பறித்து கிரண்குமார்ரெட்டியிடம் கொடுத்தபோதே காங்கிரஸ் மேலிடம் இவருக்கு கவர்னர் பதவி வாக்குறுதியை அளித்து இருந்தது. இவரை, தமிழக கவர்னராக நியமிக்க காங்கிரஸ் மூத்த தலைவர்கள் பலரும் ஆதரவு தெரிவிக்கின்றனர். ஆனால், எதிர்ப்பு கோஷ்டியினர் புதிதாக ஒரு பிரச்னையை கிளப்புகின்றனர். ஆந்திர மாநிலத்தில் முதல்வராக இருந்தபோது, ஒரு கம்பெனிக்கு ஆதரவாக சில காரியங்களை ரோசய்யா செய்து கொடுத்தார் என்று குற்றம்சாட்டப்பட்டு அது குறித்த வழக்கு நிலுவையில் தற்போதும் இருந்து வருகிறது. அம்மாநில லோக் ஆயுக்தா கோர்ட்டில் இந்த வழக்கு உள்ளது. எனவே வழக்கு விசாரணையில் உள்ள ஒரு நபரை, அரசியல் சாசன பதவியில் உட்கார வைக்கக் கூடாது என்று ரோசய்யாவின் எதிர்கோஷ்டி போர்க்கொடி உயர்த்தி வருகிறது.ஆனால் அந்த வழக்கு மிகவும் சாதாரணமான வழக்கு. அதில் ஒன்றுமே இல்லை. அதையெல்லாம் பெரிதுபடுத்தக் கூடாது. கவர்னராக பதவியேற்றாலும்கூட அந்த வழக்கால் ஒரு ஆபத்தும் இல்லை என, மேலிடம் கருதுகிறது. ஆனாலும் எதிர்கோஷ்டியினர், ரோசய்யாவுக்கு கவர்னர் பதவி வழங்கக் கூடாது என தீவிரம் காட்டுகின்றனர்.

இந்த சூழ்நிலையில், "கவர்னர் பதவி வழங்கினால் தமிழகத்திலோ அல்லது கர்நாடகத்திலோ வழங்குங்கள், வேறு வட மாநிலத்தில் வேண்டாம்' என்று, கடந்த வாரம் டில்லிக்கு வந்திருந்த ரோசய்யா கறாராக மேலிடத்தில் கூறிவிட்டதாகவும் தெரிய வந்துள்ளது. இதனால், ஆல்வாவுக்கு நிகரான இடத்தில் ரோசய்யா பெயரும் இருக்கிறது.

கர்நாடக மாநில கவர்னராக இருக்கும் பரத்வாஜும், இனியும் அந்த மாநிலம் வேண்டாம் என்று மேலிடத்தில் சொல்லிவிட்டார். எடியூரப்பாவுடன் மோதல் போக்கை கடைபிடித்துக் கொண்டே இருப்பது தனக்கு பிடிக்கவில்லை என்றும், தனக்கும் மாற்றம் வேண்டுமென மேலிடத்தில் கோரிக்கை வைத்துள்ளார். ஜெயலலிதாவுடன், இவருக்கும் நல்ல நட்பு இருப்பதால், இவரது பெயரையும் காங்கிரஸ் தீவிர பரிசீலனையில் வைத்துள்ளது. இதனால், விரைவில் புதிய கவர்னர் யார் என்பது பற்றிய விவரம் வெளியாகும் என, தகவல்கள் தெரிவிக்கின்றன.

தினமலர்