கட்டாய திருமணத்துக்கு தந்தை ஏற்பாடு: கோர்ட்டு தீர்ப்பால் தப்பிய மாணவி; பெரியப்பாவுடன் செல்ல அனுமதி

by ரஞ்சித் Wed Jun 29, 2011 10:21 am

தஞ்சையைச் சேர்ந்தவர் ரவிச்சந்திரன். இவரது மகள் இதயா (16). இவர் மதுரை எல்லீஸ் நகரில் வசிக்கும் பெரியப்பா அன்பழகன் வீட்டில் வளர்ந்து வந்தார். ரவிச்சந்திரன் இதயாவை எல்லீஸ் நகரிலேயே சிறு வயது முதல் படிக்க வைத்து பராமரித்து வந்தார். தற்போது 10-ம் வகுப்பு தேறிய இதயாவை பிளஸ்-1 வகுப்பில் சேர்த்தார்.

இந்த நிலையில் இதயாவை தந்தை ரவிச்சந்திரன் தன்னுடன் தஞ்சைக்கு வந்து விடுமாறு அழைத்தார். அதற்கு இதயா மறுத்து விட்டார். மதுரையிலேயே தொடர்ந்து பிளஸ்-1 படிக்க விரும்புவதாக தெரிவித்தாள்.

இதை ஏற்காத ரவிச்சந்திரன் இதயா படித்த பள்ளிக்கு சென்று டி.சி.யை வாங்கிச் சென்று விட்டார். மேலும் இதயாவுக்கு திருமண ஏற்பாடும் செய்து வந்தார்.

இதை அறிந்த மாணவி இதயா மதுரையில் உள்ள தென் மண்டல ஐ.ஜி.மஞ்சுநாதாவைச் சந்தித்து புகார் செய்தார். அதில் தனது தந்தை தனக்கு கட்டாய திருமண ஏற்பாடு செய்து வருவதாகவும், திருமணத்தில் தனக்கு விருப்பம் இல்லை. பெரியப்பா சிறு வயது முதல் தன்னை நன்கு கவனித்து வருகிறார். அவரது பராமரிப்பில் இருந்து தொடர்ந்து மதுரையிலேயே படிக்க விரும்புவதாகவும் கூறி இருந்தார்.

தனக்கு தெரியாமல் தந்தை பள்ளிக்கு சென்று டி.சி.யை வாங்கிச் சென்று விட்டார். திருமணத்துக்கு சம்மதிக்குமாறு தன்னை மிரட்டுகிறார். தந்தை சொல்படி கேட்டு திருமணம் செய்து கொள்ளும்மாறு ஆண்டாள்புரம் போலீஸ் பெண் சப்-இன்ஸ்பெக்டர் ஷோபனாவும் என்னை மிரட்டுகிறார் என்றும் மாணவி இதயா தனது புகாரில் கூறியிருந்தார்.

இதற்கிடையே மாணவியின் தந்தை ரவிச்சந்திரன் மதுரை ஐகோர்ட்டு கிளையில் கேபியஸ் கார்பஸ் மனு தாக்கல் செய்தார். அதில் தனது மகள் இதயாவை அண்ணன் அன்பழகன் வீட்டில் அடைத்து வைத்து இருக்கிறார். அவளை விடுதலை செய்ய வேண்டும் என்றால் ரூ.5 லட்சம் கேட்டு மிரட்டுகிறார். எனவே எனது மகளை மீட்டு என்னிடம் ஒப்படைக்க வேண்டும் என்று மனுவில் குறிப்பிட்டு இருந்தார்.

மனுவை தாக்கல் செய்த ரவிச்சந்திரனின் வக்கீல் வாதாடுகையில், இதயாவை தந்தையிடம் ஒப்படைக்க வேண்டும், அன்பழகன் தவறான நடத்தை கொண்டவர். எனவே அவரது பராமரிப்பில் இதயா இருக்க அனுமதிக்க கூடாது என்றார்.

இந்த மனு நீதிபதிகள் எஸ்.ராஜேஸ்வரன், ஜி.எம்.அக்பர்அலி ஆகியோர் முன்னிலையில் விசாரணைக்கு வந்தது. அப்போது மாணவி இதயா கோர்ட்டில் ஆஜர் ஆகி எனது பெரியப்பா நல்லவர். அவரது பராமரிப்பில் இருந்து தொடர்ந்து படிக்க விரும்புகிறேன் என்று கூறினார்.

இதைத் தொடர்ந்து மாணவி இதயாவின் விருப்பப்படி அவளை பெரியப்பாவுடன் செல்ல நீதிபதிகள் அனுமதித்தனர். இது தொடர்பாக தந்தை தாக்கல் செய்த கேபியஸ் கார்பஸ் மனுவை தள்ளுபடி செய்து நீதிபதி உத்தரவிட்டார். அதன்படி மாணவி இதயா தனது பெரியப்பாவுடன் சென்றார்.

மாலை மலர்