தமிழகத்தில் 6 அமைச்சர்களின் இலாகா மாற்றம், புதிய அமைச்சராக முகம்மது ஜான் நியமனம்!

by **சிவா** Tue Jun 28, 2011 4:45 pm

தமிழகத்தில் புதிய அமைச்சராக முகம்மது ஜான் நியமிக்கப்பட்டு உள்ளார். அவர் நாளை (புதன்கிழமை) பதவி ஏற்கிறார். மேலும் 6 அமைச்சர்களின் இலாகாக்களும் மாற்றப்பட்டு உள்ளது.

தமிழ்நாட்டில் நடந்து முடிந்த சட்டசபை தேர்தலில் அ.தி.மு.க. தனிப்பெரும்பான்மையுடன் வெற்றி பெற்று ஆட்சி அமைத்தது. முதல்-அமைச்சர் ஜெயலலிதா தலைமையிலான அமைச்சரவை மே மாதம் 16-ந் தேதி பதவி ஏற்றது. தேர்தலில் வெற்றி பெற்ற எம்.எல்.ஏ.க்கள் மே 23-ந் தேதி சட்டசபையில் பதவியேற்றனர்.

சுற்றுச்சூழல் மற்றும் சிறுபான்மையினர் நலத்துறை அமைச்சர் மரியம்பிச்சை பதவியேற்பு நிகழ்ச்சிக்கு வரும் வழியில் திருச்சி அருகே விபத்தில் சிக்கி, மரணம் அடைந்தார். இதைத்தொடர்ந்து, அவர் வகித்து வந்த சுற்றுச்சூழல் மற்றும் சிறுபான்மையினர் நலத்துறை, பிற்படுத்தப்பட்டோர் நலத்துறை அமைச்சர் டி.கே.எம்.சின்னையாவிடம் ஒப்படைக்கப்பட்டது.

அமைச்சரவையில் மாற்றம்

இந்த நிலையில், தமிழக அமைச்சரவையில் நேற்று மாற்றம் செய்யப்பட்டது. புதிய அமைச்சராக ராணிப்பேட்டை எம்.எல்.ஏ. முகம்மது ஜான் நியமிக்கப்பட்டார். 6 அமைச்சர்களின் இலாகாக்கள் மாற்றப்பட்டு உள்ளன.

இதுகுறித்து கவர்னர் சுர்ஜித் சிங் பர்னாலா நேற்று மாலை வெளியிட்ட உத்தரவில் கூறப்பட்டு இருப்பதாவது:-

முதல்-அமைச்சர் ஜெயலலிதாவின் ஆலோசனைப்படி, ராணிப்பேட்டை எம்.எல்.ஏ. ஏ.முகம்மது ஜான் அமைச்சர் ஆகிறார். புதிய அமைச்சருக்கு பதவியேற்புவிழா கவர்னர் மாளிகையில் நாளை (புதன்கிழமை) காலை 10 மணிக்கு நடைபெறுகிறது.

முதல்-அமைச்சர் ஜெயலலிதாவின் பரிந்துரையின்படி, 6 அமைச்சர்களுக்கு புதிய இலாகாக்கள் ஒதுக்கப்பட்டு உள்ளன. அதன் விவரம் வருமாறு:-

புதிய அமைச்சர் முகமது ஜான்

அமைச்சர் டி.கே.எம்.சின்னையா, பிற்படுத்தப்பட்டோர், மிகவும் பிற்படுத்தப்பட்டோர், சீர்மரபினர், வெளிநாடுவாழ் இந்தியர், அகதிகள் மற்றும் சிறுபான்மையினர் நலத்துறையை கவனித்து வந்தார்.

தற்போது அவரிடம் இருந்த பிற்படுத்தப்பட்டோர், சிறுபான்மையினர் நலத்துறை இலாக்காக்கள் புதிய அமைச்சர் முகம்மது ஜானுக்கு ஒதுக்கப்படுகிறது.

டி.கே.எம்.சின்னையா தொடர்ந்து சுற்றுச்சூழல் மற்றும் மாசுக்கட்டுப்பாடு அமைச்சராக இருப்பார். அவர் சுற்றுச்சூழல் துறை அமைச்சர் என்று அழைக்கப்படுவார்.

எம்.சி.சம்பத்

அமைச்சர் எம்.சி. சம்பத் வகித்து வந்த ஊரக தொழில்கள், சிறுதொழில்கள், குடிசை தொழில்கள் ஆகிய துறைகள் அமைச்சர் சி.சண்முகவேலுவுக்கு ஒதுக்கப்படுகிறது. சண்முகவேலு ஊரக தொழில்துறை அமைச்சர் என்று அழைக்கப்படுவார்.

அமைச்சர் சண்முகவேலு வகித்துவந்த தொழில்துறை, இரும்பு கட்டுப்பாடு, சுரங்கம் மற்றும் கனிமவளம் மற்றும் சிறப்பு முயற்சிகள் ஆகியவை அமைச்சர் எஸ்.பி.வேலுமணிக்கு ஒதுக்கப்படுகிறது. எஸ்.பி.வேலுமணி தொழில்துறை அமைச்சர் என்று அழைக்கப்படுவார்.

சொ.கருப்பசாமி

அமைச்சர் எஸ்.பி.வேலுமணி வகித்துவந்த சிறப்பு பணிகள் செயலாக்கத்துறை, தேர்தல் வாக்குறுதிகள் அமலாக்க துறை ஆகியவை அமைச்சர் எம்.சி.சம்பத்துக்கு ஒதுக்கப்படுகிறது. எம்.சி.சம்பத் சிறப்பு பணிகள் செயலாக்கத்துறை அமைச்சர் என்று அழைக்கப்படுவார்.

அமைச்சர் சொ.கருப்பசாமி வகித்துவந்த கால்நடை பராமரிப்புத்துறை, பால்வளத்துறை, அமைச்சர் என்.ஆர்.சிவபதிக்கு ஒதுக்கப்படுகிறது. என்.ஆர்.சிவபதி கால்நடை பராமரிப்புத்துறை அமைச்சர் என்று அழைக்கப்படுவார்.

விளையாட்டு, இளைஞர் நலத்துறை

அமைச்சர் என்.ஆர்.சிவபதி வகித்துவந்த விளையாட்டு மற்றும் இளைஞர் நலத்துறை, அமைச்சர் சொ.கருப்பசாமிக்கு ஒதுக்கப்படுகிறது. சொ.கருப்பசாமி விளையாட்டு மற்றும் இளைஞர் நலத்துறை அமைச்சர் என்று அழைக்கப்படுவார்.

இவ்வாறு கவர்னர் வெளியிட்ட உத்தரவில் கூறப்பட்டு உள்ளது.

முகம்மது ஜான் வாழ்க்கை குறிப்பு

அமைச்சராக நியமிக்கப்பட்டுள்ள முகம்மது ஜான் ராணிப்பேட்டையை சேர்ந்தவர். இவருக்கு வயது 62. பி.எஸ்சி., பி.எட். படித்துள்ளார். இவர் 2 முறை ராணிப்பேட்டை நகரசபை உறுப்பினராக இருந்துள்ளார். கடந்த 20 ஆண்டுகளாக வேலூர் மாவட்ட சிறுபான்மை பிரிவு நிர்வாகியாக பதவி வகித்துள்ளார். தற்போது சிறுபான்மை பிரிவு மாவட்ட செயலாளராக உள்ளார். இவருடைய தந்தை அப்துல்கரீம், தாய் பல்கீஸ்பேகம், மனைவி ஷாகின்பர்வீன். ஷபிஷா என்ற மகளும், அலிம்அக்தர், கிசர்உசேன், முகமதுஉமர்பாரூக் ஆகிய 3 மகன்களும் உள்ளனர்.

அமைச்சராக நியமிக்கப்பட்டது பற்றி முகம்மது ஜான் கூறுகையில், `கடந்த 20 ஆண்டுகளாக தீவிரமாக அ.தி.மு.க.வில் இருக்கிறேன். கட்சிக்கு விசுவாசமாகவும், தீவிரமாகவும் பணியாற்றி உள்ளேன். அ.தி.மு.க.வில் முதல்-அமைச்சர் ஜெயலலிதா கடைசி தொண்டனுக்கு உரிய அங்கீகாரம் கொடுப்பார். பிரபலமாகாத, சாதாரண தொண்டனான என்னை எம்.எல்.ஏ. ஆக்கி தற்போது அமைச்சராகவும் பதவி கொடுத்து உள்ளார். அவருக்கு என் நன்றியை தெரிவித்துக்கொள்கிறேன்' என்றார்.

தினதந்தி