மரணத்திற்கு முன் ‌தனக்கே சமாதி கட்டிய முதியவர்

by positivekarthick Tue Jun 28, 2011 8:53 am

திருவெண்ணெய்நல்லூர்: திருவெண்ணெய்நல்லூர் அருகே,முதியவர் ஒருவர், தனக்குத் தானே சமாதி கட்டியுள்ளார்.விழுப்புரம் மாவட்டம், திருவெண்ணெய்நல்லூர் அடுத்த மணக்குப்பம் கிராமத்தைச் சேர்ந்தவர், சுப்பையா செட்டியார், 69; விவசாயி.

இவர், 1973ல் மணக்குப்பம் கூட்ரோட்டில் இடம் வாங்கி, விவசாயம் செய்தார். பல கோவில்களைக் கட்டி, கும்பாபிஷேகம் செய்தார். இந்து கோவில்கள் மட்டுமின்றி, கிறிஸ்தவ ஆலயங்களுக்கும் நன்கொடை வழங்கியுள்ளார். இவர், 2008ல், தனக்காக ஒரு சமாதியை, அருகோண வடிவில் அமைத்துள்ளார்.முருகனின் அறுபடை வீடுகளின் பெயர்களை, தனியாக கல்வெட்டில் எழுதி, சமாதியைச் சுற்றி வைத்துள்ளார். சமாதியின் மேற்புறத்தில், லிங்கத்தின் மீது, சிவன் அமர்ந்து தியானிப்பது போல், சிற்பத்தைச் செய்துள்ளார். இது சமாதி என தெரியாத சிலர், கற்பூரம் ஏற்றி வழிபட்டு வருகின்றனர்.

சுப்பையா கூறியதாவது:நான் புதுச்சேரியில் வசிக்கிறேன். பல கோவில்களுக்கு திருப்பணிகள் செய்துள்ளேன். 1978ல் மணக்குப்பம் கூட்ரோட்டில் திருமுருகாபுரம் என்ற இடத்தை உருவாக்கி, வேல் நட்டு, சிறிய அளவில் முருகன் கோவிலை கட்டினேன்.தொடர்ந்து, 2004ல், இக்கோவிலுக்கு மீண்டும் கும்பாபிஷேகம் நடத்த திட்டமிட்ட போது, உடல்நலக்குறைவு ஏற்பட்டு, சென்னை தனியார் மருத்துவமனையில் பை-பாஸ் சிகிச்சை செய்ய வேண்டுமெனக் கூறினார். அறுவை சிகிச்சை செய்யாமல் கும்பாபிஷேகத்தை நடத்தினேன். இது வரை எனக்கு உடல்நலக் குறைவு ஏற்படவில்லை. மரணத்தின் வாயில் வரை சென்ற நான், அதன் தன்மையை உணர்ந்தாலும், இறந்த பின் என்னை எங்காவது புதைத்து விடுவார்களோ என்ற அச்சத்தில், 2008ல் எனக்காக சமாதியை, அருகோண வடிவில் அமைத்தேன். சமாதியின் வெளி புறத்தில் உள்ள சாதாரண சுவற்றை இடித்து உள்ளே பார்த்தால், நான்கு அடி ஆழத்தில் பள்ளம் இருக்கும். அதைச் சுற்றிலும் சுவர் கட்டியுள்ளேன். நான் இறந்த பின், என்னை நாற்காலியில் உட்கார வைத்து பள்ளத்தில் இறக்கி, சுவற்றை மூட வேண்டும். சமாதி அமைத்த போது உறவினர்கள் கடும் எதிர்ப்பு தெரிவித்தனர்.அதைப் பொருட்படுத்தாமல், மனிதருக்கு மரணம் கட்டாயம் என்பதை உணர்ந்து, சமாதியை கட்டியுள்ளேன். இவ்வாறு சுப்பையா கூறினார்.
தினமலர்