இல்லறத்தில் ஒரு எல்லைக்கோடு

“திருமணம் என்பது என்ன?’

“அது இரண்டு பேருக்கிடையில் உள்ள உறவு’

இன்ப துன்பங்கள் எல்லாவற்றிலும் ஒருவருக்கொருவர் துணையாக இருப்பதாக உறுதியெடுத்துக் கொள்கின்றவர்கள் அவர்கள். ஆனால், அவர்கள் மட்டும் இந்த உலகம் முழுவதும் தனியாக வாழும் இரண்டு உயிரினங்களாக இருந்துவிட்டால் எந்தப் பிரச்சினையும் இல்லை. ஆனால் உலகில் மற்றவர்களும் இருக்கிறார்களே.

மாமனார், மாமியார், அம்மா, அப்பா, மைத்துன மைத்துனிகள்... அவர்களோடு நிற்கவில்லை. நண்பர்கள் என்பவர்களும் அவர்கள் வாழ்வில் குறுக்கிடுவர்.

கணவன் என்பவருக்கு மனைவி மீது ஒரு விஷயத்தில் கோபம் வரக்கூடும். மனைவி அவரைப் பற்றித் தன் பிறந்தகத்து மனிதர்களிடம் ஏதோ குறைப்பட்டுக் கொள்வதாக அவருக்கு எரிச்சல் ஏற்படும் விஷயத்தில்தான்... மனைவி பெரும்பாலும் தன்னைப் போன்ற பெண்களுடன்தான் இம்மாதிரி குறைப்பட்டுக் கொள்வது நமது இந்தியப் பண்பாட்டுச் சூழல்.

ஆனால், கணவர்கள் இதில் அழுத்தக்காரர்கள் தாங்கள் எது நேரினும், உள்ளுக்குள்ளேயே விழுங்கிக் கொள்வார்கள். அடக்கிக் கொள்வார்கள். ஆண் பிள்ளைக்கு அழுத்தமான மனம் அல்லவா...?

ஆனால், சில ஆண்பிள்ளைகளும் எது நடந்தாலும் உள்ளுக்குள் விழுங்கிக் கொள்வார்கள்தான். அடக்கிக் கொள்வார்கள்தான். ஆனால், அதைத் தாங்க முடியாமல், வேறு எதையாவது விழுங்கி வைத்து, எங்கேயாவது தெருவோரத்தில் கூட விழுந்து கிடந்து உள்ளுக்குள் விழுங்கிக் கொண்டதையெல்லாம் அவர்கள் வெளியே கக்கிக் கொண்டிருக்கும் நிகழ்ச்சிகளும் நடக்கின்றன.

குடும்பத்தில் பிரச்சினைகள் வரும்போது ஆண் உள்ளுக்குள் விழுங்கிக் கொள்வதற்கும் ஒரு வரம்பு உள்ளது.

ஆண் இந்தப் பிரச்சினைகள் ஒரு வரம்பைத் தாண்டும் போது, புதியதாக ஒரு காபிப் பழக்கத்தையோ அல்லது ஒரு “ஹாபி’ப் பழக்கத்தையோ நாடிப் போகிறான். அல்லது, ஒரு “கேர்ல் பிரண்டு’ கூட அவன் நாடும் “ஹாபி’யாகக் கூட இருக்கலாம்.

குடும்பத்திற்குள்ளே தம்பதியர்க்கிடையில் மட்டுமே இருக்கவேண்டிய புனித ரகசியம் - அதாவது - ஸ்ரீலஷ்மணக்கோடு இருக்கின்றதே, அது இப்படியாகக் கூட வெளியே வந்துவிடலாம்.

ஆண் விஷயத்தில் இவ்வாறு சாதாரணமாக உள்ள விஷயம், பெண் விஷயத்தில் அவ்வளவு சீக்கிரம் வெளிப்படுவதில்லை.

அவள் தன் குறை வரம்புதாண்டும் போதுதான், தனக்கு நம்பிக்கையான தாயிடமோ, தமக்கை தங்கையரிடமோ, அல்லது தோழி முதலியோரிடமோ முறையிடும் அளவுக்கு இயல்பாகவே போய்விட நேரிடுகின்றது. ஆனால், அதுவேகூட ஆணினுடைய கண்ணுக்கு நம்பிக்கைத் துரோகம் என்பதாகத் தோன்றிவிடும்.

உண்மை என்னவென்றால், நல்ல திருமண வாழ்க்கை என்பது, ஸ்ரீ சீதாதேவியிடம் அன்று தம்பி லக்ஷ்மணன் வகுத்தவிட்டுச் சென் லக்ஷ்மணக் கோடு போல பெண் மட்டுமல்ல, ஆண்கூடத் தாண்டக்கூடாது என்பதே அது!

தம்பதிகளுக்கிடையில் உள்ள அந்தரங்கம், அவர்கள் இருவருக்கும் இடையில் மட்டும் இருக்க வேண்டும். மூன்றாவது நபர் அப்போதுதான் அவர்களை மதிப்பான். அதுவே சத்தியமான இல்லறம்.

பல்லவ சூரியன்

அருமையான தகவல் அண்ணா

சூப்பர் தல