மன்னிப்பு கேட்கும்வரை காவல் நிலையத்தில் வைக்கப்பட்ட எம்.எல்.ஏ.!

அப்துல்லாஹ் · அப்துல்லாஹ் Sun Jun 26, 2011 6:15 pm

சேலம் அருகே ஓமலூர் காவல் நிலையத்தில், உதவி ஆய்வாளரை திட்டியதற்கு மன்னிப்பு கேட்கும்வரை, எம்.எல்.ஏ.வை வெளியே செல்ல அனுமதிக்காமல் சுமார் 2 மணி நேரம் நிறுத்தி வைத்திருந்த சம்பவம் நிகழ்ந்துள்ளது.

கடந்த வெள்ளிக்கிழமை இரவு மேட்டூர் தொகுதி எம்.எல்.ஏ., எஸ்.ஆர்.பார்த்திபன் அவரது சகாக்கள் புடை சூழ ஓமலூர் காவல் நிலையத்திற்கு வந்து, அவரது கட்சிக்காரர் ஒருவர் கொடுத்த புகாருக்கு என்ன நடவடிக்கை எடுக்கப்பட்டுள்ளது எனக் கேட்டுள்ளார். வழக்கு பதியப்பட்டுள்ளது என்று காவலர்கள் கூறுவதற்கு முன்பே தகாத கெட்ட வார்த்தைகளை கூறி காவல்துறை உதவி ஆய்வாளரை திட்டியுள்ளார்.

காவலர்கள் மேலதிகாரிகளுக்கு தகவல் தெரிவித்து விட்டு, அடுத்த நடவடிக்கைக்காக எம்.எல்.ஏ.வை காவல் நிலையத்திலேயே இருக்கும்படி கேட்டுக்கொண்டனர். சுமார் இரண்டு மணி நேரம் அவர் காவல் நிலையத்திலேயே வைக்கப்பட்டிருந்தார். மன்னிப்பு கேட்ட பிறகு எம்.எல்.ஏ., காவல் நிலையத்திலிருந்து வெளியே செல்ல அனுமதிக்கப்பட்டுள்ளார்.

இந்நேரம்