நீலாங்கரை அருகே ஆசிரியை தாக்கியதில் மாணவன் கண் பாதிப்பு

ரஞ்சித் · ரஞ்சித் Fri 24 Jun 2011 - 15:58

நீலாங்கரையை அடுத்த வெட்டுவாங்கேனி ஜான்சி தெருவைச் சேர்ந்தவர் மோகன். கட்டிட தொழிலாளி. இவரது மகன் தீபக் (வயது 12). அதே பகுதியில் உள்ள தனியார் பள்ளியில் 9-ம் வகுப்பு படித்து வருகிறான்.

நேற்று காலை கம்ப்யூட்டர் ஆசிரியை, வகுப்பில் பாடம் நடத்தி கொண்டிருந்தார். அப்போது தீபக்கின் பின்னால் இருந்த மாணவன் ஒருவன் அழுது கொண்டிருந்ததாக தெரிகிறது. இதுபற்றி அவனிடம் விசாரிப்பதற்காக அவன் எழுந்து சென்றான்.

இதனைப் பார்த்த ஆசிரியை அவனை கண்டித்தார். மேலும் ஆத்திரத்தில் “ஸ்கேலால்” தீபக்கின் முகத்தில் அடித்தார். இதில் அவனது கண்ணில் இருந்து ரத்தம் வழிந்தது. வலியால் அவன் அலறி துடித்தான். பயந்து போன ஆசிரியை இதுபற்றி பள்ளி நிர்வாகத்திடம் தெரிவித்தார். அவர்கள் பள்ளியிலேயே தீபக்கிற்கு முதலுதவி அளித்தனர்.

இதுபற்றி அறிந்ததும் தீபக்கின் பெற்றோர் பள்ளி நிர்வாகத்திடம் முறையிட்டனர். ஆனால் அவர்கள் எந்த பதிலும் சரியாக கூறவில்லை என்று தெரிகிறது. அவர்கள் காயம் அடைந்த தீபக்கை அருகில் உள்ள ஆஸ்பத்திரியில் சேர்த்தனர். அங்கு அவனுக்கு கண்ணில் தையல் போடப்பட்டுள்ளது. நீலாங்கரை போலீசில் அவர்கள் புகார் செய்துள்ளனர். போலீசார் விசாரணை நடத்தி வருகிறார்கள்.

மாலை மலர்