ஊழல் புகார் அளிப்பவரையே சிக்க வைக்கும் `லோக்பால்' மசோதா

ஊழல் புகார் அளிப்பவரையே சிக்க வைக்கும் விதமாக, மத்திய அரசு முன் வைத்துள்ள லோக்பால் சட்ட மசோதா இருப்பதாக காந்தியவாதி அன்னா ஹசாரே தெரிவித்துள்ளார்.

கருத்து வேறுபாடு

ஊழல்வாதிகளை சட்டத்தின் முன் நிறுத்தி தண்டனை வழங்க வகை செய்யும் `மக்கள் கோர்ட்டு` உருவாக்க `லோக்பால் சட்டம்` கொண்டு வரப்படுகிறது. அந்த சட்டத்தில் பிரதமர் உள்ளிட்ட உயர் பதவிகளில் உள்ளவர்களையும் சேர்க்குமாறு காந்தியவாதி அன்னா ஹசாரே தலைமையிலான மக்கள் பிரதிநிதிகள் குழு வலியுறுத்துகிறது.

ஆனால், அதை மத்திய அரசு ஏற்கவில்லை. இரு தரப்புக்கும் இடையே சுமார் 10 பிரச்சினைகளில் கருத்து வேறுபாடு உள்ளது. எனவே, மத்திய அரசு சார்பாக முன் வைக்கப்பட்டுள்ள லோக்பால் மசோதா மற்றும் மக்கள் பிரதிநிதிகள் சார்பாக முன் வைக்கப்பட்டுள்ள லோக்பால் மசோதா ஆகியவை குறித்து கருத்து கேட்பதற்காக அடுத்த மாதம் அனைத்துக் கட்சி கூட்டம் நடைபெறுகிறது.

இந்த நிலையில், மத்திய அரசு கொண்டு வந்துள்ள `லோக்பால்` சட்ட மசோதாவை கண்டித்து அன்னா ஹசாரே தலைமையிலான சமூக ஆர்வலர்கள் குழு நேற்று வெளியிட்ட அறிக்கையில் கூறப்பட்டுள்ளதாவது:-

புகார் அளிப்பவருக்கு இலக்கு

மத்திய அரசு கொண்டு வரும் லோக்பால் சட்டத்தின் கீழ், ஊழல் புகார் விசாரணையில் இருந்து ஏராளமான அதிகாரிகளுக்கு விலக்கு அளிக்கப்படுகிறது. கிராம மட்டத்தில் செயல்படும் என்.ஜி.ஓ. அமைப்புகள் கூட, லோக்பால் வரம்புக்குள் கொண்டு வரப்பட்டுள்ளன. இதனால் விவசாயிகள், தொழிலாளர்கள், பழங்குடியினர் போன்றவருக்காக பாடுபடும் ஏதாவது ஒரு அமைப்புகள் கூட லோக்பால் சட்டத்துக்குள் சிக்கக் கூடும்.

அது மட்டுமல்ல, ஊழலுக்கு எதிராகவும் நில சுரண்டலுக்கு எதிராக போராடும் அமைப்புகளும் லோக்பால் சட்ட வளையத்துக்குள் சிக்கலாம். அதாவது, ஊழலுக்கு எதிராக யார் புகார் அளிக்கிறாரோ, அவரையே லோக்பால் சட்டத்தின் மூலமாக குறி வைக்க மத்திய அரசு முடிவு செய்துள்ளது.

உயர் அதிகாரிகளுக்கு விலக்கு

அனைத்து அரசு ஊழியர்களையும் லோக்பால் சட்டத்துக்கு கொண்டு வந்தால் மக்கள் கோர்ட்டுகளில் ஏராளமான வழக்குகள் சேர்ந்து விடும் என மத்திய அரசு கூறுகிறது. 40 லட்சம் மத்திய அரசு ஊழியர்கள் மற்றும் 80 லட்சம் மாநில அரசு ஊழியர்களில் இணை செயலாளர் பதவிக்கு மேல் உள்ள 65 ஆயிரம் உயர் அதிகாரிகளுக்கு விலக்கு அளிக்கப்பட்டிருக்கிறது.

ஒரு சிறிய கிராமத்தில் அதிகாரிகள் ஊழல் செய்வதை இளைஞர்கள் குழு கண்டு பிடிப்பதாக வைத்துக் கொள்வோம். லோக்பால் அமைப்பிடம் அந்த இளைஞர்கள் புகார் அளிக்க முடியும். ஆனால், புகார் கூறப்படும் வட்டார வளர்ச்சி அதிகாரி உள்ளிட்டோரை விசாரிக்கும் அதிகாரம் லோக்பாலுக்கு கிடையாது.

இதுபோல, டெல்லியில் உள்ள அரசு அதிகாரிகள் யாரையுமே லோக்பால் சட்டத்தின் மூலமாக விசாரிக்க முடியாது. ஆனால், ராமலீலா அல்லது துர்கா பூஜை போன்ற நிகழ்ச்சிகளுக்கு நன்கொடை வசூலிக்கும் அனைத்து உள்ளூர் அமைப்புகளையும் லோக்பால் அமைப்பு விசாரிக்கும்.

இவ்வாறு அன்னா ஹசாரே குழு தெரிவித்துள்ளது.

ஹசாரே எச்சரிக்கை

இதற்கிடையே, கடுமையான விதிகளுடன் கூடிய லோக்பால் சட்டத்துக்காக துப்பாக்கிக் குண்டுகளை எதிர் கொள்ள தயாராக இருப்பதாக அன்னா ஹசாரே நேற்று மீண்டும் உறுதிபட தெரிவித்துள்ளார். மராட்டிய மாநிலத்தில் உள்ள அவருடைய சொந்த கிராமத்துக்கு செல்லும் வழியில் புனே நகரில் அவர் பேட்டியளித்தார்.

அப்போது, ஹசாரே கூறியதாவது:-

மக்கள் பாடம் புகட்டுவார்கள்

சாவைக் கண்டு அன்னா ஹசாரே பயப்படவில்லை. எங்கள் போராட்டத்தை நசுக்குவதற்காக தடியடி மட்டுமல்ல துப்பாக்கிக் குண்டுகளையும் பயன் படுத்தட்டும். அதை நாங்கள் எதிர் கொள்ள தயாராக இருக்கிறோம். ஆனால், இந்தியாவில் ஜனநாயக ஆட்சி தேவையா? சர்வாதிகார ஆட்சி தேவையா? என மக்கள் தீர்மானிப்பார்கள். மகாத்மா காந்தி, காமராஜர் போன்ற தலைவர்களோடு தொடர்புள்ள கட்சியாக தற்போதைய காங்கிரஸ் இருக்கிறதா?

போராடுவது ஒவ்வொரு குடிமகனுக்கும் உள்ள ஜனநாயக உரிமை. ஆனால், எங்களுடைய போராட்டத்தை நசுக்க காங்கிரஸ் முயற்சிப்பது தெளிவாக தெரிகிறது. ஆனால், வெறுமனே அன்னா ஹசாரே என்ற தனி ஆள் மட்டும் இல்லை என்பதை அவர்கள் நினைவில் கொள்ள வேண்டும். ஒட்டு மொத்த நாடே ஊழலுக்கு எதிராக திரண்டு நிற்கிறது. அவர்களுக்கு தகுந்த பாடத்தை மக்கள் புகட்டுவார்கள்.

இவ்வாறு ஹசாரே தெரிவித்தார்.

தினதந்தி

மக்கள் சக்தி மகத்தானது !!!!இதை மக்கள் உணரவில்லை !!!!!!!!!!!