பூநகரியை கைப்பற்றியது இலங்கை ராணுவம் : புலிகளின் கடைசி 'கோட்டை'யும் தகர்ந்தது

கொழும்பு : இலங்கையில் விடுதலைப் புலிகளின் முக்கிய தளமாக விளங்கிய பூநகரி என்ற நகரத்தை, ராணுவம் கைப்பற்றியுள்ளது. இதன் மூலம், இலங்கை மேற்கு கடற்கரை பகுதி முழுவதும் ராணுவத்தின் கட்டுப்பாட்டில் வந்துள்ளது. இந்த பகுதியில் தங்கள் வசமிருந்த கடைசி "கோட்டை'யையும் புலிகள் இழந்துள்ளனர். இலங்கையில் விடுதலைப் புலிகளின் கட்டுப்பாட்டில் உள்ள பகுதிகளை கைப்பற்ற, ராணுவம் தீவிரமாக சண்டையிட்டு வருகிறது. புலிகளின் தலைமையகமான கிளிநொச்சியைக் கைப்பற்ற, மும்முனை தாக்குதல் நடத்தி வருகிறது. தொடர் தாக்குதலில், புலிகளிடம் இருந்து பூநகரி நகரைக் கைப்பற்றியுள்ளதாக ராணுவம் அறிவித்துள்ளது.


இலங்கை ராணுவ அமைச்சகம் தெரிவித்துள்ளதாவது: கிளிநொச்சி மாவட்டத்தில் உள்ள பூநகரி என்ற நகரம், புலிகளின் முக்கிய தளமாக விளங்கி வந்தது. பூநகரியை மையமாக வைத்தே, கடல் புலிகளின் நடவடிக்கைகள் அமைந்திருந்தன. நாட்டின் மற்ற பகுதிகளிலிருந்து யாழ்ப்பாணத்தை இணைக்கக்கூடிய முக்கியமான சாலை, பூநகரியில் உள்ளது. பல ஆண்டுகளாக இந்த நகரம், புலிகளின் கட்டுப்பாட்டில் இருந்து வந்தது. கடந்த இரு நாட்களாக இங்கு கடும் சண்டை நடந்தது. பூநகரியின் தெற்கு பகுதி வழியாக, புலிகள் மீது ராணுவத்தினர் கடும் தாக்குதல் நடத்தினர். இதன் எதிரொலியாக, பூநகரி-பரந்தன் இடையேயான சாலை ராணுவம் வசம் வந்தது. பின்னர், "பி 69' சாலை வழியாக 10 கி.மீ., தூரம் முன்னேறிய ராணுவ வீரர்கள், இன்று(நேற்று)அதிகாலை பூநகரியைக் கைப்பற்றி, தங்கள் கட்டுப்பாட்டின் கீழ் கொண்டு வந்தனர். இதையடுத்து, மிகப் பெரிய தோல்வியை புலிகள் தழுவியுள்ளனர். பூநகரியைக் கைப்பற்றியதன் மூலம், நாட்டின் மேற்கு கடற்கரை பகுதி முழுவதுமாக ராணுவத்தின் கட்டுப்பாட்டில் வந்துள்ளது. மேற்கு கடற்கரை பகுதியில் தங்கள் வசமிருந்த கடைசி நிலப் பரப்பையும் புலிகள் இழந்துள்ளனர். மேலும், யாழ்ப்பாணத்தில் உள்ள படையினருக்கு, சாலை வழியாகவும் பொருட்களை கொண்டு செல்ல இந்த வெற்றி வழி வகுத்துள்ளது. இந்த சண்டையின் போது, புலிகள் கடும் எதிர் தாக்குதல் நடத்தினர். ராணுவ வீரர்கள் அதை முறியடித்து முன்னேறியுள்ளனர். கிளிநொச்சிக்கு மிக அருகில் ராணுவம் நெருங்கி விட்டது. எந்த நேரத்திலும் கிளிநொச்சியும் ராணுவத்தின் வசம் வந்து விடும். இவ்வாறு ராணுவ அமைச்சகம் தெரிவித்துள்ளது.


இலங்கை அதிபர் ராஜபக்சே கூறுகையில், "பூநகரியை இலங்கை ராணுவம் கைப்பற்றியுள்ளது. இதன் மூலம் யாழ்ப்பாணத்திற்கு செல்லும் நெடுஞ்சாலை நம் வசம் வந்துள்ளது. இந்த நேரத்தில், புலிகள் தலைவர் பிரபாகரனுக்கு ஒன்றைச் சொல்ல விரும்புகிறேன். ஆயுதத்தை கீழே போட்டு விட்டு சரணடையுங்கள். பின்னர், பேச்சுவார்த்தை நடத்தலாம். ஆயுதங்களை கீழே போடுவது என்பது, வடக்கு பகுதியில் வசிக்கும் மக்களுக்கு நீங்கள் செய்யும் மிகப் பெரிய உதவியாக இருக்கும்' என்றார்.


பிள்ளையன் செயலர் சுட்டுக் கொலை: இலங்கை போலீஸ் செய்தி தொடர்பாளர் ரஞ்சித் கூறியதாவது: இலங்கை, கிழக்கு மாகாண முதல்வராக இருப்பவர் பிள்ளையன். இவர், விடுதலைப் புலிகள் அமைப்பில் இருந்து பிரிந்து சென்ற கருணாவின் ஆதரவாளர். நேற்று முன்தினம் இவரது செயலர் குமாரசாமி நந்தகோபன் என்ற ரகு, கொழும்பு அருகே காரில் வந்து கொண்டிருந்தார். திடீரென காரை வழிமறித்த அடையாளம் தெரியாத கும்பல், ரகுவையும், டிரைவர் நசீரையும் நோக்கி சரமாரியாக சுட்டது. இதில், இருவரும் சம்பவ இடத்திலேயே பலியாயினர். விடுதலைப் புலிகள் தான், இந்த தாக்குதலை நடத்தியுள்ளதாக சந்தேகம் எழுந்துள்ளது. இவ்வாறு ரஞ்சித் கூறினார்.