சொரிமுத்து அய்யனார் கோவிலை களங்கப்படுத்துவதா?: “அவன்-இவன்” படத்தை தடை செய்ய வேண்டும்; ஐகோர்ட்டில் சிங்கம்பட்டி ஜமீன்தார் வழக்கு

சென்னை, ஜூன். 22-


பாலாவின் இயக்கத்தில் விஷால், ஆர்யா நடித்த “அவன்-இவன்” படம் ரிலீசாகி ஓடிக்கொண்டிருக்கிறது.

இந்த படத்தில் சிங்கம்பட்டி ஜமீனைப் பற்றியும் காரையார் சொரிமுத்து அய்யனார் கோவிலைப் பற்றியும் அவதூறான காட்சிகள் இடம் பெற்றுள்ளதாக எதிர்ப்புகள் கிளம்பியுள்ளன. அக்காட்சிகளை நீக்க வேண்டும் என்று சிங்கம்பட்டி ஜமீன்தார் முருகதாஸ் தீர்த்தபதி வற்புறுத்தினார்.

நெல்லை மாவட்டம் முழுவதும் பாலாவை கண்டித்து போஸ்டர்கள் ஒட்டப்பட்டு உள்ளன. புகழ் பெற்ற சிங்கம்பட்டி ஜமீன் பெயரில் கேரக்டரை உருவாக்கி அவர் மது அருந்துவது போன்றும் நிர்வாணமாக ஓடவிட்டு அடிப்பது போலவும் காட்சிகள் வைத்திருப்பது அவதூறானது என்றும் எதிர்ப்பு தெரிவித்து உள்ளனர்.

ஆனால் இக்குற்றச்சாட்டுகளுக்கு பாலா பதில் அளிக்கவில்லை. காட்சிகளை நீக்குவது பற்றியும் முடிவு செய்யவில்லை.

இதையடுத்து “அவன்- இவன்” படத்திற்கு தடை விதிக்க கோரி சிங்கம்பட்டி ஜமீன்தார் முருகதாஸ் தீர்த்தபதியின் தம்பி தாயப்பராஜா சென்னை ஐகோர்ட்டில் வழக்கு தொடர்ந்துள்ளார்.

இதுகுறித்து சிங்கம் பட்டி ஜமீன்தார் முருகதாஸ் தீர்த்தபதி கூறியதாவது:-

என்னை பொறுத்தவரை ஆன்மீகத்தில் ஈடுபாடு கொண்டு துறவியாகி விட்டேன். நான் எதை பற்றியும் கவலைப்படவில்லை. ஆனால் சிங்கம்பட்டி ஜமீனையும், காரையாறு கோவிலையும் களங்கப்படுத்தி இருப்பதை கண்டு மக்கள் கொதித்து போய் உள்ளனர். மதுரையில் 150க்கும் மேற்பட்ட பெண்கள் ரத்த கையெழுத்திட்டு முதல்- அமைச்சருக்கு மனு அனுப்ப உள்ளனர்.

“அவன்-இவன்” படத்திற்கு தடை விதிக்க கோரி எனது தம்பி தாயப்ப ராஜா சென்னை ஐகோர்ட்டில் வழக்கு தொடர்ந்துள்ளார். எனது மகன் ராஜாவும் வழக்கு தொடர உள்ளார்.

இவ்வாறு அவர் கூறினார்.

தென் மாவட்ட மக்களின் குல தெய்வமான சொரிமுத்து அய்யனாரை களங்கப்படுத்திய நடிகர் ஆர்யா மீது நடவடிக்கை எடுக்க வலியுறுத்தி கோவை போலீஸ் கமிஷனரிடம் இன்று புகார் மனு அளிக்கப்படும் என்று இந்து மக்கள் கட்சி மாநில பொதுச்செயலாளர் ஞானசம்பந்தம் அறிவித்து உள்ளார்.


மாலை மலர்

ஓசி விளம்பரம் படத்துக்கு !