மூன்று மாதங்களில் அரசு கேபிள் டிவி: ஜெ. உறுதி

மூன்று மாதங்களில் அரசு கேபிள் டிவி: ஜெ. உறுதி
சென்னை, ஜூன் 23,2011

மூன்று மாதங்களில் அரசு கேபிள் டிவி நிறுவனம் கொண்டுவரப்படும் என முதல்வர் ஜெயலலிதா உறுதியளித்தார்.



முதல்வர் ஜெயலலிதாவை தலைமைச் செயலகத்தில் புதன்கிழமை கேபிள் டி.வி. ஆபரேட்டர்கள் சங்க நிர்வாகிகள் சந்தித்து கோரிக்கை மனு அளித்தனர்.

அப்போது, தமிழக கேபிள் டி.வி. உரிமையாளர்கள் சங்கப் பிரதிநிதிகள், அரசு கேபிள் டி.வி. ஒளிபரப்பாளர்கள் சங்கப் பிரதிநிதிகள் மற்றும் கேபிள் டி.வி. ஆபரேட்டர்களின் பிரதிநிதிகள் ஆகியோர் உடன் இருந்தனர்.

இந்த சந்திப்பின்போது, "தொலை தொடர்பு அமைப்பான 'டிராய்' கேபிள் டி.வி. இணைப்புக்கு வீடு ஒன்றுக்கு ரூ.75 கட்டணமாக வசூலிக்கலாம் என்று கூறி உள்ளது. கட்டணம் அந்த விகிதத்தில் அமைய வேண்டும். சென்னை தவிர மற்ற மாவட்டங்களில் தமிழ் சேனல்கள் கட்டண சேனல்களாக உள்ளன. சென்னை போன்று அனைத்து மாவட்டங்களிலும் தமிழ் சேனல்களை இலவசமாக வழங்க ஏற்பாடு செய்ய வேண்டும்.

மற்ற மாநிலங்களில் அந்தந்த மொழி சேனல்கள் இலவசமாகவே வழங்கப்படுகின்றன. எனவே இதற்கு உடனடி நடவடிக்கை எடுக்க வேண்டும் என்று கோரிக்கை வைத்தனர். சென்னையில் தனியார் கேபிள் மூலம்தான் கேபிள் டி.வி. இணைப்பு வழங்கப்படுகிறது. எனவே இங்கு விரைவில் அரசு கேபிள் கொண்டு வர வேண்டும்.

ஏற்கனவே தமிழ்நாட்டில் தஞ்சை, கோவை, நெல்லை, வேலூர் ஆகிய 4 இடங்களில் அரசு கேபிள் டி.வி. மையம் (எம்.எஸ்.ஓ.) உள்ளன. இந்த கட்டுப்பாட்டு அறைகள் மூலம் அனைவருக்கும் இணைப்பு வழங்க ஏற்பாடு செய்யவேண்டும். கேபிள் டி.வி.யை அரசுடமை ஆக்கினால் குறைந்த கட்டணத்தில் வீடுகளுக்கு கேபிள் இணைப்பு வழங்க முடியும். உள்ளாட்சி தேர்தலுக்கு முன்பு கேபிள் டி.வி.யை அரசுடமை ஆக்க வேண்டும்.

தனியார் ஆதிக்கத்தை நீக்கி கேபிள் டி.வி. வருமானத்தை அரசுக்கு, கொண்டு வர வேண்டும். இதனால் கேபிள் டி.வி. ஆபரேட்டர்கள் சுதந்திரமாக செயல்பட முடியும். மக்களுக்கும் குறைந்த விலையில் இணைப்பு கிடைக்கும் என்பது உள்பட பல்வேறு கருத்துக்கள் முதல்வரிடம் தெரிவிக்கப்பட்டன.

கேபிள் டி.வி. பிரதிநிதிகளின் கோரிக்கைகளை கவனமாக கேட்ட முதல்வர் ஜெயலலிதா, "உள்ளாட்சி தேர்தலுக்கு இன்னும் 3 மாதங்கள் ஆகும். அதுவரை பொறுத்து இருக்க வேண்டியதில்லை. உடனடியாக கேபிள் டி.வி.யை அரசுடமையாக்க நடவடிக்கை எடுக்கப்படும்," என்று உறுதி அளித்தார்.


நன்றி விகடன்