மிகுந்த மரியாதையுடன் உபசரித்த முதல்வர்ஜெ.,வை சந்தித்த விவசாய சங்கத்தினர் நெகிழ்ச்சி

திருச்சி:"தமிழக முதல்வர் ஜெயலலிதா, எங்களை மிகுந்த மரியாதையுடன் உபசரித்தார்' என, அவரை சந்தித்த தமிழ்நாடு காவிரி நீர் பாசன விவசாயிகள் நலச் சங்கத்தினர் கூறினர்.தமிழக முதல்வர் ஜெயலலிதா திருச்சிக்கு வருவதை முன்னிட்டு, அவரை சந்திக்க அனுமதி கோரி தலைமை செயலருக்கு, தமிழ்நாடு காவிரி நீர் பாசன விவசாயிகள் நலச்சங்க நிர்வாகிகள், கோரிக்கை கடிதம் அனுப்பியிருந்தனர். முதல்வர் ஜெயலலிதாவுடன் சந்திப்புக்கு ஏற்பாடு செய்வதாக உறுதியளித்திருந்தனர். அதன்படி, நேற்று மாலை 4 மணிக்கு, தமிழ்நாடு காவிரி நீர் பாசன விவசாயிகள் நலச்சங்க நிர்வாகிகள் ஆறு பேர், சங்கம் ஹோட்டலில் தங்கியுள்ள முதல்வர் ஜெயலலிதாவை சந்திக்க அனுமதி வழங்கப்பட்டது. தலைவர் கனகசபை, செயலர் ரங்கநாதன், மகாதானபுரம் ராஜாராம், துணைச்செயலர் காந்திப்பித்தன், ஆலோசகர் கணபதி, ஆலோசகர் நடராஜன் ஆகியோர் நேற்று மாலை 4 மணிக்கு, சங்கம் ஹோட்டலுக்குச் சென்றனர்.

முதல்வர் ஜெயலலிதா, இவர்களை வரவேற்று ஏற்கனவே போடப்பட்டிருந்த ஆறு இருக்கைகளில் இவர்களை அமரும்படி கூறி, பேசினார். ஜெயலலிதாவின் வரவேற்பால் பூரித்துப் போயினர்.மகாதானபுரம் ராஜாராம் கூறியதாவது:
எங்களை, மாலை 4 மணிக்கு வரும்படி அழைத்தனர். முதல்வர் ஜெயலலிதாவை நேரடியாக சந்தித்தோம். முதல்வர் எங்களை மிகவும் மரியாதையாக நடத்தினார். காவிரி நடுவர்மன்ற இறுதி தீர்ப்பை கெஜட்டில் (அரசிதழில்) வெளியிட முழுமுயற்சி எடுத்து வரும் முதல்வர் ஜெயலலிதாவை, நேரில் சந்தித்து வாழ்த்தி, பாராட்டத் தான் சென்றோம்.மேட்டூர் அணைக்குக் கீழே கிடைக்கும் காவிரி பகுதி மழைநீரை சேமிக்க, பல இடங்களில் கதவணைகள் கட்ட வேண்டும் என, மனு கொடுத்தோம். பின், அவரிடம், ""ஆட்சி பொறுப்பேற்றதும் முத்தரசநல்லாரில் கதவணை கட்ட அடிக்கல் நாட்டியுள்ளீர்கள். இது முதல், நல்ல தொடக்கமாக இருக்கட்டும். காவிரி, கொள்ளிடத்தில் பல இடங்களில் கதவணை கட்டி ஒரு சொட்டு தண்ணீர் கூட கடலில் கலந்து வீணாகாமல் இருக்க நடவடிக்கை எடுக்க வேண்டும்,'' என்றோம்.
அதற்கு முதல்வர் ஜெயலலிதா, ""நான் ஆட்சிக்கு வந்து ஒரு மாதம் தான் ஆகிறது. ஐந்தாண்டில் எவ்வளவு நல்ல பல திட்டங்கள் செய்ய முடியுமோ அனைத்துக்கும் முயற்சி எடுப்பேன். உங்களையும் அடிக்கடி சந்திப்பேன்,'' என்றார்.மேலும், ""திருச்சியை தமிழகத்தின் இரண்டாவது தலைநகரமாக்குவது என்பது எம்.ஜி.ஆரின் கனவு. உங்கள் ஆட்சியில் திருச்சியை தமிழகத்தின் இரண்டாவது தலைநகரமாக்க வேண்டும்,'' என்றோம்.அதற்கு அவர், "அது பெரிய திட்டம்' என்றார்.இவ்வாறு ராஜாராம் கூறினார்.
நன்றி தினமலர்